ଢେଙ୍କାନାଳ ଅଫିସ, ୧୧।୧୦: ଭାଇଚାରା ଏବଂ ପରମ୍ପରାକୁ ନେଇ ସମୃଦ୍ଧ ଢେଙ୍କାନାଳର ଗଣପର୍ବ ଲକ୍ଷ୍ମୀପୂଜାରେ ଅନ୍ୟତମ ଆକର୍ଷଣ ସାଜିଛି କଳାକୁଞ୍ଜ ଏବଂ ବିଭିନ୍ନ ମୁଦ୍ରାରେ ବିରାଜମାନ କରିଥିବା ଦେବଦେବୀଙ୍କ ମୃଣ୍ମୟୀ ପ୍ରତିମା। କିମିଆ କରୁଛି ପୌରାଣିକ କଥାବସ୍ତୁ ଆଧାରରେ ପେଣ୍ଡାଲରେ ହୋଇଥିବା ଚିତ୍ତାକର୍ଷକ ସାଜସଜ୍ଜା। ୮୦ ବର୍ଷ ପୁରାତନ ଲକ୍ଷ୍ମୀପୂଜା ପାଇଁ ସାରା ନଗର ନବବଧୂ ଭଳି ସଜେଇ ହୋଇଥିବାବେଳେ ମା’ଙ୍କ ସନ୍ଧ୍ୟାଦର୍ଶନ ପାଇଁ ଜମୁଛି ଅସମ୍ଭାଳ ଭିଡ଼।
ଏବେ ଡିଜିଟାଲ୍ ଯୁଗ। ଅଙ୍ଗୁଳି ଟିପରେ ସାରା ବିଶ୍ୱ। କ୍ଷଣିକ ମଧ୍ୟରେ ମିଳିଯାଉଛି ଯାବତୀୟ ସୂଚନା। ସମସ୍ତଙ୍କୁ ଘାରିଛି ମୋବାଇଲ ଭଳି ସହଜଲବ୍ଧ ଉପକରଣର ମାୟା। ବୈଷୟିକ ଜ୍ଞାନକୌଶଳର ଏଭଳି ଦୌଡ଼ରେ ପ୍ରାଚୀନ ସଂସ୍କୃତି ଓ ପରମ୍ପରା ଖାପଛଡ଼ା ହୋଇଯାଉଥିବାବେଳେ ଢେଙ୍କାନାଳର ଗଣପର୍ବରେ ଉଜ୍ଜୀବିତ ହୋଇଛି ସନାତନ ଧର୍ମର ସମୃଦ୍ଧ ପୌରାଣିକ ଇତିହାସ।
ସହରର ଦ୍ୱିତୀୟ ମେଢ଼ ତଥା ୭୮ବର୍ଷ ପୁରାତନ ଜବାହରଚୌକ ପୂଜା ପ୍ରତିଷ୍ଠାନ ପକ୍ଷରୁ ଚଳିତବର୍ଷ ପେଣ୍ଡାଲରେ ହୋଇଛି ନିଆରା ଢଙ୍ଗରେ ସାଜସଜ୍ଜା। ଏଠାରେ ଅନନ୍ତ ନାଗ ଉପରେ ବିରାଜମାନ କରିଛନ୍ତି ମହାପ୍ରଭୁ ଶ୍ରୀଜଗନ୍ନାଥ। ଶ୍ରୀଜୀଉଙ୍କ ଡାହାଣପାର୍ଶ୍ୱରେ ବସିବା ମୁଦ୍ରାରେ ଶୋଭା ପାଉଛନ୍ତି ଲକ୍ଷ୍ମୀ ଠାକୁରାଣୀ। ଠାକୁରଙ୍କ ବାମପାର୍ଶ୍ୱରେ ମା’ଙ୍କ ବାହନ ପେଚା ଶୋଭାବର୍ଦ୍ଧନ କରୁଛି। ରୁପା କିରୀଟ, ସୁବର୍ଣ୍ଣ ଅଳଙ୍କାରରେ ଦେବୀ ଝଟକୁଛନ୍ତି। ଠାକୁରଙ୍କ ପଛପାର୍ଶ୍ୱରେ ଫେନିଳ ସମୁଦ୍ରକୁ ଚିତ୍ରିତ କରାଯାଇଛି। ପୌରାଣିକ କଥାବସ୍ତୁ ଆଧାରିତ ଏଭଳି ସାଜସଜ୍ଜା ଦେଖିବାକୁ ଶ୍ରଦ୍ଧାଳୁଙ୍କ ମଧ୍ୟରେ ସୃଷ୍ଟି ହୋଇଛି ବିପୁଳ ଉତ୍କଣ୍ଠା। ସେହିପରି
ମହାବୀର ବଜାର ପ୍ରତିଷ୍ଠାନ ମଣ୍ଡପରେ ମା’ ଗଜଲକ୍ଷ୍ମୀ ଅଭୟମୁଦ୍ରାରେ ଛିଡ଼ା ହୋଇଛନ୍ତି। ମା’ଙ୍କ ସମ୍ମୁଖରେ ଦୁଇଟି ଧବଳ ହସ୍ତୀ ଶୋଭା ବଢ଼ାଉଥିବାବେଳେ ପଛପଟେ ଚିତ୍ରିତ କରାଯାଇଛି ଶ୍ରୀମନ୍ଦିରର ପ୍ରତିରୂପ। କୋଟି ଓଡ଼ିଆଙ୍କ ପ୍ରାଣର ଠାକୁର ମହାପ୍ରଭୁ ଶ୍ରୀଜଗନ୍ନାଥ, ଶ୍ରୀମନ୍ଦିର ସହ ଲକ୍ଷ୍ମୀ ଠାକୁରାଣୀଙ୍କ ନିଗୂଢ଼ ସମ୍ପର୍କକୁ ସ୍ଥାନିତ କରିବାକୁ ପୂଜା ପ୍ରତିଷ୍ଠାନ ପକ୍ଷରୁ ଯେଉଁ ଉଦ୍ୟମ କରାଯାଇଛି, ତାହାକୁ ସବୁ ମହଲରେ ପ୍ରଶଂସା କରାଯାଇଛି।
ଆଧ୍ୟାତ୍ମିକ ବାତାବରଣ ସୃଷ୍ଟି କରୁଛି
୧୯୪୪ରୁ ଜବାହରଚୌକ ପୂଜା କମିଟି ପକ୍ଷରୁ ମା’ଙ୍କ ପୂଜା ଆରମ୍ଭ ହୋଇଛି। ପୌରାଣିକ କଥାବସ୍ତୁ ଏବଂ ସାମାଜିକ ଜୀବନର ଚିତ୍ରକୁ ପ୍ରତିଫଳନ କରିବା ଭଳି ମୂର୍ତ୍ତି ନିର୍ମାଣ କରାଯାଉଛି, ଯାହା ପୂଜାରେ ଆଧ୍ୟାତ୍ମିକ ବାତାବରଣ ସୃଷ୍ଟି କରୁଛି।
-ନବୀନଚନ୍ଦ୍ର ନାରାୟଣ ଦାସ,
ସଭାପତି, ଜବାହର ଚୌକ ପୂଜା କମିଟି
ସଚେତନ ହେଉଛନ୍ତି ଭବିଷ୍ୟତ ପିଢ଼ି
ଭବିଷ୍ୟତ ପିଢ଼ିଙ୍କୁ ପ୍ରାଚୀନ ସଂସ୍କୃତି, ପରମ୍ପରା, ପୌରାଣିକ ଆଖ୍ୟାନ ବିଷୟରେ ସଚେତନ କରିବାକୁ ସବୁବର୍ଷ ଉଦ୍ୟମ କରାଯାଉଛି। ୨ବର୍ଷ ପରେ ଅତି ଆଡମ୍ବର ସହକାରେ ପୂଜା ହେଉଥିବାରୁ ପ୍ରବଳ ଭିଡ଼ ଜମୁଛି।
-ସୁଧାଂଶୁ କୁମାର ଦଳେଇ,
ସମ୍ପାଦକ, ଜବାହର ଚୌକ ପୂଜା କମିଟି
ମନମୋହୁଛି ସାଜସଜ୍ଜା
ଭାଇଚାରା, ଐତିହ୍ୟ, ସଂସ୍କୃତି ଏବଂ ପରମ୍ପରା ପାଇଁ ଢେଙ୍କାନାଳ ଲକ୍ଷ୍ମୀପୂଜା ପ୍ରସିଦ୍ଧ। ଯୁଗ ଯେତେ ଡିଜିଟାଲ ହେଲେ ବି ବିଭିନ୍ନ ବଜାର ପକ୍ଷରୁ ପୌରାଣିକ ଓ ସାମାଜିକ କଥାବସ୍ତୁ ଆଧାରରେ ପଣ୍ଡପରେ ସାଜସଜ୍ଜା କରାଯାଇଛି, ଯାହା ମନମୋହୁଛି ।
-ଅବନୀ ମିଶ୍ର,
ଉପସଭାପତି , ରାଜ୍ୟ ଲୋକକଳା ସଂଘ
(ରତନ ନାୟାର)
