ନୟାଗଡ ଅଫିସ,୧୩।୨: ଗୋଟିଏ ଗଛରେ ଫୁଟୁଛି ୫ କିସମର ଫୁଲ । ବାଇଗଣ ଗଛରେ ଫଳୁଛି ଲଙ୍କା ଓ ଟମାଟୋ । ପୁଣି ବିନା ମାଟିରେ ବଢୁଛି ବିଭିନ୍ନ ଗଛ । ଏହି ସବୁ କରିସ୍ମା କରି ଦେଖାଇଛନ୍ତି ନୟାଗଡ ସହର ଡିଆରଡିଏ ରୋଡର ରଞ୍ଜନ କୁମାର ଖଟେଇ । ସେଥିପାଇଁ ତାଙ୍କୁ ଜଣେ ସଫଳ ଚାଷୀର ମାନ୍ୟତା ମିଳିଛି । ଗଛରେ କଲମି କରିବାର କଳା ହିଁ ତାଙ୍କୁ ଏହି ସଫଳତା ଦେଇଛି ବୋଲି ସେ କହିଛନ୍ତି ।
ରଞ୍ଜନଙ୍କ ଘର ନୟାଗଡ଼ ଜିଲା ଓଡ଼ଗାଁ ବ୍ଲକ ଅଧୀନ ଆରଡା ଗାଁରେ । ସେ ବହୁଦିନ ହେଲା ନୟାଗଡରେ ରହୁଛନ୍ତି। ଗାଁରେ ଥିବା ନିଜର ୪ ଏକର ଜମିରେ ସେ ପୋଟଳ, ବାଇଗଣ, ଟମାଟୋ, କାକୁଡି ଆଦି ପନିପରିବା ଚାଷ କରିଛନ୍ତି । ହେଲେ ନୟାଗଡ଼ ଡିଆରଡିଏ ରାସ୍ତାର ନବୋଦୟ ସ୍କୁଲ ପଛପାଖରେ ଥିବା ତାଙ୍କ ଘର ବଗିଚାରେ ବହୁ କଲମି ଗଛରେ ସମ୍ଭାର ରହିଛି । ଘର ସମ୍ମୁଖ ରଙ୍ଗ ବେରଙ୍ଗର ଫୁଲ ଓ ଫଳରେ ପୂରି ଉଠୁଛି । ବିନା ମାଟିରେ ବଢୁଥିବା ଗଛରେ ଫୁଲ ଓ ଫଳ ଝୁଲୁଛି । ସେ ଜିଆଖତ, କୋକପିଟି, ପେରଲାଇଟ୍, ଭର୍ମିକୁଲଟକୁ ମିଶ୍ରଣ କରି ପୋଟିଂମିକ୍ସ ସୃଷ୍ଟି କରି ସେଥିରେ ଗଛ ଲଗାଇଛନ୍ତି। ତାଙ୍କ ବଗିଚାରେ ୭ କିସମର ଆମ୍ବ, ମଞ୍ଜିବିହୀନ ସ୍ବାଦିଷ୍ଟ ଲେମ୍ବୁ, ମୌସୁମୀ, କରମଙ୍ଗା, ବରକୋଳି, ଚେରି, ଟମାଟୋ, ଅଁଳା, ଅଙ୍ଗୁର ଗଛ ରହିଛି । ଆମ୍ବ ଗଛରୁ ଫଳ ତୋଳା ହେବା ପରେ ପୁଣି ବଉଳ ଆସୁଛି । ବର୍ଷ ତମାମ ଗଛରେ ଆମ୍ବ ଫଳୁଛି, ବଉଳ ଭରି ରହୁଛି। ସେହିପରି କରବର ଗଛରେ ନାଲି, ହଳଦିଆ, ଗୋଲାପି ଫୁଲ ଫୁଟୁଛି । ଭେଜିି ବାଇଗଣ ଗଛରେ କଲମି କରି କଳା ଓ ଧଳା ରଙ୍ଗର ବାଇଗଣ ସମେତ ଲଙ୍କା ଓ ଟମାଟୋ ଫଳୁଛି । ଗୋଟିଏ ମନ୍ଦାର ଗଛରେ ନାଲି, ହଳଦିଆ, ସୁନେଲି, ପାଉଁଶିଆ, ଗୋଲାପି ରଙ୍ଗର ଫୁଲ ଫୁଟୁଛି ।
ଏନେଇ ରଞ୍ଜନ କୁହନ୍ତି ମୁଁ କଲମି ଉପାୟରେ ୫ ବର୍ଷ ହେଲା ଫୁଲ ଓ ଫଳ ସୃଷ୍ଟି କରି ଆସିଛି। ଯୁକ୍ତ ୩ ପାସ କରିବା ପରେ କୌଣସି କର୍ମ ସଂସ୍ଥାନ ମିଳିଲା ନାହିଁ ା କିଛିଦିନ ବେକାର ରହିବା ପରେ ଏପରି ଚାଷକୁ ଆଦରି ନେଇଥିଲି । ଏଥିରୁ କିଛି ରୋଜଗାର ମିଳୁଛି। ବିଭିନ୍ନ ଗଛ ସମ୍ପର୍କରେ ଆସି ନିଜକୁ ଖୁସି ଲାଗୁଛି । ଏବେ କଲମି କରି ବିଭିନ୍ନ ଫୁଲ ଓ ଫଳ ଗଛ ଲଗାଇ ସମୟକୁ ଅତିବାହିତ କରୁଛି ବୋଲି ସେ କହିଛନ୍ତି। ଅନ୍ୟପକ୍ଷେ ନୟାଗଡ ଗ୍ରାମୀଣ ଷ୍ଟେଟବ୍ୟାଙ୍କ ଆମତ୍ ନିଯୁକ୍ତି ତାଲିମ କେନ୍ଦ୍ରର ଫାକଲ୍ଟି ଓ ରୁଟ୍ ସାଇଟ୍ର ଆସେସର ଭାବେ ରଞ୍ଜନ କାମ କରୁଛନ୍ତି । ଏପରି ନସର୍ର୍ରୀ ପରିଚାଳନା ପାଇଁ ସେ ବହୁ ଯୁବତୀଯୁବକଙ୍କୁ ତାଲିମ ପ୍ରଦାନ କରୁଛନ୍ତି । କଲମି ମାଧ୍ୟମରେ ଚାଷ କରିବାକୁ ସେ ଯୁବଗୋଷ୍ଠୀଙ୍କ ମଧ୍ୟରେ ଆଗ୍ରହ ସୃଷ୍ଟି କରୁଛନ୍ତି । କଲମି ଓ ପନିପରିବା ଚାଷ ଉପରେ ତାଲିମ ଦେବାକୁ ବୌଦ୍ଧ, ସୋନପୁର ଓ କନ୍ଧମାଳ ଜିଲାକୁ ଯାଇଛନ୍ତି ।
