ଥୁଆମୂଳ ରାମପୁର, ୩ା୪ (ଦୁର୍ଗା କୀର୍ତ୍ତି): କଳାହାଣ୍ଡି ଜିଲା ଥୁଆମୂଳ ରାମପୁର ବ୍ଲକ କୁରୁକୁଟି ମୌଜାରେ ପ୍ରସ୍ତାବିତ ଥଇଥାନ କଲୋନୀ ନିର୍ମାଣକୁ ନେଇ ଚାଲିଥିବା ବିବାଦ ଆଜି ୧୩ ଦିନରେ ପହଞ୍ଚିଛି। ଗତ ମାସ ୨୨ ତାରିଖରୁ ଆରମ୍ଭ ହୋଇଥିବା ଏହି ଜନ ଆନ୍ଦୋଳନର ସମାଧାନ ପାଇଁ ପ୍ରଶାସନ ପକ୍ଷରୁ ପ୍ରୟାସ ଜାରି ରହିଥିଲେ ହେଁ ସ୍ଥିତି ଏବେ ମଧ୍ୟ ଜଟିଳ ରହିଛି। ଆଜି ଶୁକ୍ରବାର ଘଟଣାସ୍ଥଳରେ ଜିଲା ପ୍ରଶାସନର ବହୁ ଉଚ୍ଚପଦସ୍ଥ ଅଧିକାରୀ ପହଞ୍ଚି ଗ୍ରାମବାସୀଙ୍କ ସହ ଦୀର୍ଘ ସମୟ ଧରି ଆଲୋଚନା କରିଛନ୍ତି।
ଆଜି କୁରୁକୁଟି ମୌଜାରେ କଳାହାଣ୍ଡି ଜିଲାପାଳ ପାୱାର ସଚିନ ପ୍ରକାଶ, ଏସପି ନାଗରାଜ ଦେବର୍ କୋଣ୍ଡା, ଭବାନୀପାଟଣା ଉପ-ଜିଲ୍ଲାପାଳ ପ୍ରଭାତ ପରିଡ଼ା, ବିଡ଼ିଓ ଧ୍ରୁବ ଚରଣ ମୁଦୁଲି, ବ୍ଲକ ଅଧ୍ୟକ୍ଷ ଦୟାନିଧି ମାଝୀ ଏବଂ ସ୍ଥାନୀୟ ସରପଞ୍ଚ ସୁଜାତା ମାଝୀଙ୍କ ସମେତ ବହୁ ସରକାରୀ ଅଧିକାରୀ ଓ ସଶସ୍ତ୍ର ପୋଲିସ ଫୋର୍ସ ଉପସ୍ଥିତ ଥିଲେ। ବିସ୍ଥାପିତଙ୍କ ଥଇଥାନ ଓ କଲୋନୀ ନିର୍ମାଣର ଆବଶ୍ୟକତା ସମ୍ପର୍କରେ ଜିଲା ପ୍ରଶାସନ ପକ୍ଷରୁ ଲୋକଙ୍କୁ ବୁଝାଶୁଝା କରାଯାଇଥିଲା। ବିଶେଷ କରି ଉପ-ଜିଲାପାଳ ପ୍ରଭାତ ପରିଡ଼ା ପୂର୍ବରୁ ଆସି ଲୋକଙ୍କ ସହ ଆଲୋଚନା କରିଥିବା ବେଳେ ଆଜି ପୁଣି ଥରେ ଜିଲାପାଳଙ୍କ ଉପସ୍ଥିତିରେ ସମାଧାନର ବାଟ ବାହାର କରିବାକୁ ଚେଷ୍ଟା କରାଯାଇଥିଲା।
ପ୍ରଶାସନିକ ଅଧିକାରୀଙ୍କ ସହ ଆଲୋଚନା ବେଳେ ଖଣ୍ଡୁଆଳମାଳି ସ୍ଥାୟୀ ସୁରକ୍ଷା ସମିତି ଓ ସ୍ଥାନୀୟ ବାସିନ୍ଦାମାନେ ପୁନର୍ବାର ଗ୍ରାମସଭା ଓ ଜଙ୍ଗଲ ଅଧିକାର ଆଇନର ଦୁହାଇ ଦେଇଛନ୍ତି। ବିନା ଗ୍ରାମସଭା ସମ୍ମତିରେ ପ୍ରଶାସନର କୌଣସି ପଦକ୍ଷେପକୁ ସେମାନେ ଗ୍ରହଣ କରିବେ ନାହିଁ ବୋଲି ସ୍ପଷ୍ଟ କରିଛନ୍ତି। ପ୍ରଥମେ ସ୍ଥାନୀୟ ଭୂମିହୀନଙ୍କୁ ଜମି ପ୍ରଦାନ ଓ ପରେ ଜନହିତକର କାର୍ଯ୍ୟ ପାଇଁ ଜମି ବିନିଯୋଗ କରିବାକୁ ଦାବି ହୋଇଛି। ଉପ-ଜିଲ୍ଲାପାଳଙ୍କ ପୂର୍ବ ଗସ୍ତ ସମୟରେ ହୋଇଥିବା କଥା କଟାକଟି ଓ ଆଦିବାସୀଙ୍କ ପାରମ୍ପରିକ ଅସ୍ତ୍ରଶସ୍ତ୍ରକୁ ନେଇ ସୃଷ୍ଟି ହୋଇଥିବା ବିବାଦକୁ ନେଇ ମଧ୍ୟ ଲୋକଙ୍କ ମଧ୍ୟରେ ଅସନ୍ତୋଷ ଲାଗି ରହିଛି।
ସିଜିମାଳୀ ବିସ୍ଥାପିତଙ୍କ ପାଇଁ କୁରୁକୁଟି ମୌଜାର ଥୁଆଗୁଡ଼ା ଗ୍ରାମ ନିକଟରେ ଇଡକୋ ଅଧୀନରେ ଚାଲିଥିବା ପ୍ରକଳ୍ପ କାର୍ଯ୍ୟ ଏବେ ମଧ୍ୟ ଠପ୍ ହୋଇପଡ଼ିଛି। ଟ୍ରକ, ଜେସିବି ଓ ଅନ୍ୟାନ୍ୟ ସରଞ୍ଜାମ ଅଚଳ ହୋଇ ପଡ଼ିଥିବା ବେଳେ ପୋଲିସ ମୁତୟନ ଯୋଗୁ ଅଞ୍ଚଳରେ ଏକ ପ୍ରକାର ଚାପା ଉତ୍ତେଜନା ବିରାଜମାନ କରୁଛି। ଜିଲ୍ଲାପାଳ, ଏସପି ଓ ଉପ-ଜିଲ୍ଲାପାଳଙ୍କ ଗସ୍ତ ପରେ ମଧ୍ୟ କୌଣସି ନିର୍ଦ୍ଦିଷ୍ଟ ସମାଧାନର ବାଟ ବାହାରି ପାରିନାହିଁ। ଜଳ, ଜଙ୍ଗଲ ଓ ଜମି ପାଇଁ ଆଦିବାସୀଙ୍କ ଏହି ସଂଗ୍ରାମ ଆଗକୁ କେଉଁ ରୂପ ନେଉଛି, ତାହା ଉପରେ ସମସ୍ତଙ୍କ ନଜର ରହିଛି।
