ନୂଆଦିଲ୍ଲୀ, ୧୩।୯ : ଅଶୋଧିତ ତୈଳ ପାଇପଲାଇନ ପାଇଁ କେନ୍ଦ୍ର ସରକାର ଜମି ଅଧିଗ୍ରହଣ ପ୍ରକ୍ରିୟା ଆରମ୍ଭ କରିଛନ୍ତି। ଗୁଜରାଟର କଚ୍ଛ ଜିଲାର ଚୁଡୱା ଠାରୁ ଅଶୋଧିତ ତୈଳ ପାଇପଲାଇନ ବିଛାଇବା ଲାଗି ଇଣ୍ଡିଆନ ଅଏଲ କର୍ପୋରେଶନ ଲିମିଟେଡ କାର୍ଯ୍ୟ ଆରମ୍ଭ କରିବ। ଗତ ସପ୍ତାହରେ ରାଜସ୍ଥାନର ବିଭିନ୍ନ ଜିଲାରେ ଜମି ଅଧିଗ୍ରହଣ ସମ୍ପର୍କରେ ପେଟ୍ରୋଲିୟମ ମନ୍ତ୍ରଣାଳୟ ପକ୍ଷରୁ ଏକ ଘୋଷଣା କରାଯାଇଥିଲା। ଏହି ପାଇପଲାଇନ ରାଜସ୍ଥାନର ନାଗୌର, ଜାଲୋର, ଝୁନୁଞ୍ଜୁନୁ, ସିକର, ଯୋଧପୁର ଏବଂ ପାଲି ଜିଲା ଦେଇ ଯିବ।
ଗୁଜରାଟର ମୁନ୍ଦ୍ରାରୁ ହରିୟାଣାର ପାନିପତ ପର୍ଯ୍ୟନ୍ତ ଏକ ନୂତନ ଅଶୋଧିତ ତୈଳ ପାଇପଲାଇନ ନିର୍ମାଣ ପାଇଁ କେନ୍ଦ୍ର ସରକାର ୯,୦୨୮ କୋଟି ଟଙ୍କା ବିନିଯୋଗ କରିବେ। ବାର୍ଷିକ ୧୭.୫ ନିୟୁତ ଟନ କ୍ଷମତା ବିଶିଷ୍ଟ ମୁନ୍ଦ୍ରା-ପାନିପତ ପାଇପଲାଇନ ବ୍ୟବସ୍ଥା ପାଇଁ ଇଣ୍ଡିଆନ ଓଏଲ ନିବେଶ ପ୍ରସ୍ତାବକୁ ଅନୁମୋଦନ କରିଛି। ଏହି ପ୍ରକଳ୍ପ ପାନିପତ ରିଫାଇନାରୀର କ୍ଷମତା ବାର୍ଷିକ ୧୫ ନିୟୁତ ଟନ ରୁ ୨୫ ନିୟୁତ ଟନକୁ ବୃଦ୍ଧି ଯୋଗୁ ଅଶୋଧିତ ତୈଳର ବର୍ଦ୍ଧିତ ଆବଶ୍ୟକତାକୁ ପୂରଣ କରିବାକୁ ସକ୍ଷମ ହେବ।
