ଭୁବନେଶ୍ୱର, ୨୭।୯(ବ୍ୟୁରୋ):ଦେଶର ସର୍ବଶ୍ରେଷ୍ଠ ୱାଇଲ୍ଡଲାଇଫ୍ ଗାଇଡ୍ ଭାବେ ଓଡ଼ିଶାର ଲଳିତ ମୋହନ ପଣ୍ଡା ଜାତୀୟ ପର୍ଯ୍ୟଟନ ପୁରସ୍କାର ପାଇବାକୁ ମନୋନୀତ ହୋଇଛନ୍ତି। ମଙ୍ଗଳବାର ନୂଆଦିଲ୍ଲୀର ବିଜ୍ଞାନ ଭବନରେ ଉପରାଷ୍ଟ୍ରପତି ଏହି ପୁରସ୍କାର ପ୍ରଦାନ କରିବାର କାର୍ଯ୍ୟକ୍ରମ ରହିଛି। ୨୦୧୮-୧୯ ପାଇଁ ଏହି ପୁରସ୍କାର ଦିଆଯିବ। ପର୍ଯ୍ୟଟନ ମନ୍ତ୍ରଣାଳୟ ପକ୍ଷରୁ ଶ୍ରେଷ୍ଠ ୱାଇଲ୍ଡଲାଇଫ୍ ଗାଇଡ୍ ଶ୍ରେଣୀରେ ପୂର୍ବ, ପଶ୍ଚିମ ଓ କେନ୍ଦ୍ର, ଉତ୍ତର, ଦକ୍ଷିଣ ଏବଂ ଉତ୍ତରପୂର୍ବ ଭଳି ୫ ଜୋନ୍ରୁ ୫ଟି ପୁରସ୍କାର ପାଇଁ ଦରଖାସ୍ତ ଆହ୍ବାନ କରାଯାଇଥିଲା। ପୂର୍ବ ଜୋନ୍ ପାଇଁ ଲଳିତ ମୋହନ ଏହି ଦରଖାସ୍ତ ପକାଇଥିଲେ। କିନ୍ତୁ ସାରା ଦେଶରୁ ଏକମାତ୍ର ୱାଇଲ୍ଡଲାଇଫ ଗାଇଡ୍ ଭାବେ କେବଳ ଲଳିତଙ୍କୁ ହିଁ ଏହି ପୁରସ୍କାର ପାଇଁ ଚୟନ କରାଯାଇଛି। ସେହିଭଳି ଶ୍ରେଷ୍ଠ ହୋଟେଲ, ଶ୍ରେଷ୍ଠ ସେଫ୍, ଶ୍ରେଷ୍ଠ ଟୁର୍ ଅପରେଟର, ଶ୍ରେଷ୍ଠ ରାଜ୍ୟ, ଶ୍ରେଷ୍ଠ ପର୍ଯ୍ୟଟନ ସ୍ଥଳୀ ଆଦି ବିଭିନ୍ନ ବର୍ଗରେ ଦେଶର ମୋଟ ୨୮ଜଣଙ୍କୁ ବିଭିନ୍ନ ବର୍ଗରେ ଜାତୀୟ ପର୍ଯ୍ୟଟନ ପୁରସ୍କାର ଦିଆଯିବ।
ବାଙ୍କୀର ଲଳିତ ମୋହନ ଭୁବନେଶ୍ୱରସ୍ଥିତ ଇଣ୍ଡିଆନ୍ ଇନ୍ଷ୍ଟିଚ୍ୟୁଟ୍ ଅଫ୍ ଟୁରିଜମ୍ ମ୍ୟାନେଜମେଣ୍ଟରୁ ଡିଗ୍ରୀ ହାସଲ କରିବା ପରେ ପ୍ରଫେସନାଲ ଗାଇଡ୍ ଭାବେ ପ୍ରଶିକ୍ଷଣ ନେଇ ଗତ ୮ବର୍ଷ ହେବ ରାଜ୍ୟ ଗାଇଡ୍ ଭାବେ ଫ୍ରିଲାନ୍ସ କାର୍ଯ୍ୟ କରୁଛନ୍ତି। ଏଥିସହିତ ସେ ମଧ୍ୟ ସ୍ନେକ ହେଲ୍ପଲାଇନର ସଦସ୍ୟ ଭାବେ ବାଙ୍କୀ ଓ ଏହାର ଆଖପାଖ ଅଞ୍ଚଳରୁ ବହୁ ସାପ ଉଦ୍ଧାର କରିଛନ୍ତି। ପୂର୍ବରୁ ଖୋର୍ଦ୍ଧା ସବ୍ଡିଭିଜନ ତରଫରୁ ଲଳିତଙ୍କୁ ୨୦୧୮ରେ ଡିଭିଜନସ୍ତରୀୟ ବିଜୁ ପଟ୍ଟନାୟକ ବନ୍ୟପ୍ରାଣୀ ପୁରସ୍କାର ଦିଆଯାଇଥିଲା। ଏବେ ଜାତୀୟ ପର୍ଯ୍ୟଟନ ପୁରସ୍କାର ପାଇଁ ମନୋନୀତ ହୋଇ ରାଜ୍ୟ ପାଇଁ ଗୌରବ ଆଣିଥିବାରୁ ଲଳିତଙ୍କୁ ସ୍ନେକ୍ ହେଲ୍ପଲାଇନ ସାଧାରଣ ସମ୍ପାଦକ ଶୁଭେନ୍ଦୁ ମଲ୍ଲିକ ଅଭିନନ୍ଦନ ଜଣାଇଛନ୍ତି।
