ଡେରାବିଶ, ୧୦ା୯ (ସ୍ବ.ପ୍ର.): ଡେରାବିଶ ବ୍ଲକ ଛୋଟି ପଞ୍ଚାୟତ ରାମଚଣ୍ଡୀ ନୋଡାଲ ଶିକ୍ଷା ନିକେତନ ୫-ଟି ଯୋଜନାରେ ରୁପାନ୍ତରୀକରଣ କରାଯାଇଥିଲା। ଏହି କାମରେ ପ୍ରାୟ ୩୮ ଲକ୍ଷରୁ ଊର୍ଦ୍ଧ୍ୱ ଟଙ୍କା ବ୍ୟୟ ହୋଇଛି। ବ୍ଲକ ପ୍ରଶାସନ ତତ୍ତ୍ୱାବଧାନରେ ହୋଇଥିବା ଏହି କାମର ଶୀଘ୍ର ସମାପ୍ତି ପାଇଁ ତତ୍କାଳୀନ ବିଦ୍ୟାଳୟ ପରିଚାଳନା କମିଟି ଏକାଧିକ ଲୋକଙ୍କୁ ନିଯୁକ୍ତି ଦେବାର ସ୍ଥିର କରିଥିଲା। ହେଲେ ବ୍ଲକ ପ୍ରଶାସନ କମିଟିକୁ ବେଖାତିର କରି ଜଣେ ଠିକାଦାରଙ୍କ ଦ୍ୱାରା କାମ କରାଇଥିବା ନେଇ ପୂର୍ବତନ ସରପଞ୍ଚ କୁମାର ଚନ୍ଦ୍ର ବଳ ଅଭିଯୋଗ କରିଛନ୍ତି। ବିଦ୍ୟାଳୟର ବିଜ୍ଞାନ ଲାବୋରୋଟୋରୀ ଗୃହ, ଲାଇବ୍ରେରୀ ଗୃହ, ଛାତ୍ରୀଛାତ୍ରଙ୍କୁ ପାଠ ପଢାଇବା ପାଇଁ ସ୍ମାର୍ଟ କ୍ଲାସ ରୁମ୍, ନୂତନ ପରିଶ୍ରାଗାର ଓ ଶୋଚାଳୟ ଗୃହ ନୂତନ ଭାବେ ନିର୍ମାଣ କରାଯାଇଛି। ଏଥିସହ ସମସ୍ତ ଶ୍ରେଣୀ ଗୃହ, ଅଫିସ ଗୃହରେ ଟାଇଲ୍ସ ପକାଯିବା, ପୂରା ବିଦ୍ୟାଳୟ ପରିସରକୁ ଏକ ପ୍ରକାର ରଙ୍ଗ ଓ ବିଦ୍ୟାଳୟ ଭିତର ପରିସରରେ ଫେଭର ବ୍ଲକ ପକାଯାଇ କଳେବରକୁ ବଦଳା ଯାଇଥିଲା। ବିଦ୍ୟାଳୟ ପ୍ରବେଶ ପଥ ଅର୍ଥାତ ମୁଖ୍ୟ ଫାଟକକୁ ମଧ୍ୟ ଚକାଚକ ହୋଇଥିଲା। ମାତ୍ର ବିଦ୍ୟାଳୟର କାର୍ଯ୍ୟ ଅତ୍ୟନ୍ତ ନିମ୍ନମାନର ହୋଇଥିବା ନେଇ ସ୍ଥାନୀୟ ଅଞ୍ଚଳବାସୀଙ୍କ ପକ୍ଷରୁ ବାରମ୍ବାର ବ୍ଲକ ପ୍ରଶାସନଙ୍କ ନିକଟରେ ଅଭିଯୋଗ ହୋଇଥିଲା। ପ୍ରଶାସନ ଏହାକୁ ବେଖାତିର କରୁଛି। ଏବେ ଏହି ବିଦ୍ୟାଳୟର ମୁଖ୍ୟ ପ୍ରବେଶ ପଥରେ ପାଣି ଜମି ରହୁଛି। ଶ୍ରେଣୀ ଗୃହ ଓ ଶିକ୍ଷକ ଅଭାବ ସମସ୍ୟା ଶିକ୍ଷାଦାନରେ ବ୍ୟାଘତ ସୃଷ୍ଟି କରିଛି।
ସ୍ଥାନୀୟ ଜନସାଧାରଣ ଓ କେତେଜଣ ବଦାନ୍ୟ ବ୍ୟକ୍ତିଙ୍କ ସହଯୋଗରେ ୧୯୫୬ରେ ଏହି ବିଦ୍ୟାନିକେତନ ସ୍ଥାପିତ ହୋଇଥିଲା। ଏଠାରେ ପ୍ରଥମରୁ ୧୦ମ ଶ୍ରେଣୀ ପର୍ଯ୍ୟନ୍ତ କାର୍ଯ୍ୟକ୍ଷମ ରହିଛି। ଏହି ବିଦ୍ୟା ନିକେତନରେ ଚଳିତ ବର୍ଷ ମୋଟ ୩୯୬ଜଣ ଛାତ୍ରୀଛାତ୍ର ଅଧ୍ୟୟନ କରୁଛନ୍ତି। ଶ୍ରେଣୀ ଗୃହ ସମସ୍ୟା ପାଇଁ ୧ମରୁ ୩ୟ ଶ୍ରେଣୀ ପର୍ଯ୍ୟନ୍ତ ଛାତ୍ରୀଛାତ୍ରମାନଙ୍କୁ ଗୋଟିଏ ଶ୍ରେଣୀରେ ପାଠପଢା ଚାଲିଛି। ଅନ୍ୟ ସମସ୍ତ ଶ୍ରେଣୀ ଗୋଟିଏ ଗୋଟିଏ ଗୃହରେ ଚାଲିଛି। ନବମ ଶ୍ରେଣୀରେ ରହିଥିବା ୮୫ ଜଣ ଓ ଦଶମ ଶ୍ରେଣୀରେ ରହିଥିବା ୭୦ ଛାତ୍ରୀଛାତ୍ରଙ୍କୁ ଗୋଟିଏ ଶ୍ରେଣୀ ଗୃହରେ ଖୁନ୍ଦାଖୁନ୍ଦି ହୋଇ ବସି ପଢିବାକୁ ପଡୁଛି। ଅପରପକ୍ଷରେ ଏତେ ଛାତ୍ରୀଛାତ୍ରଙ୍କ ପାଇଁ ଆବଶ୍ୟକ ସଂଖ୍ୟକ ଶିକ୍ଷୟିତ୍ରୀଶିକ୍ଷକ ନ ଥିବାରୁ ପିଲାଙ୍କୁ ପାଠ ପଢାଇବା କଷ୍ଟଦାୟକ ହୋଇଯାଇଛି। ଏହି ଦୁଇ ସମସ୍ୟା ଏବେ ଛାତ୍ରୀଛାତ୍ରଙ୍କ ପାଠପଢାରେ ମୁଖ୍ୟ ପ୍ରତିବନ୍ଧକ ସାଜିଛି। ୨୦୧୬ମସିହାରୁ ଏହି ବିଦ୍ୟା ନିକେତନରେ ପ୍ରଧାନ ଶିକ୍ଷକ ପଦବୀ ଖାଲି ପଡିଛି। ଆଟର୍ସ ଗ୍ରାଜୁଏଟ୍ ଓ ଅନ୍ୟ ୩ ଶିକ୍ଷକ ପଦବୀ ମଧ୍ୟ ଦୀର୍ଘବର୍ଷ ହେଲା ଖାଲି ପଡିଛି। ବିଦ୍ୟାଳୟର କିରାଣି ପଦବୀ ଖାଲିପଡିଥିବା ବେଳେ ୩ ଜାଗାରେ ମାତ୍ର ଜଣେ ୪ର୍ଥ ଶ୍ରେଣୀ କର୍ମଚାରୀରେ ଚାଲିଛି। ବିଶେଷକରି ନିମ୍ନମାନର ରୂପାନ୍ତରଣ କାମ ଯୋଗୁ ବର୍ତ୍ତମାନ ବର୍ଷା ସମୟରେ ବିଦ୍ୟାଳୟ ପ୍ରବେଶ ପଥର ମୁଖ୍ୟ ଫାଟକ ଆଗରେ ବର୍ଷାପାଣି ଆଣ୍ଠୁଏ ଉଚ୍ଚର ଜମା ହୋଇ ରହିବାରୁ ଛାତ୍ରୀଛାତ୍ର ଓ ଅଭିଭାବକଙ୍କ ମଧ୍ୟରେ ତୀବ୍ର ଅସନ୍ତୋଷ ଦେଖାଦେଇଛି। ବିଦ୍ୟାଳୟର ସମସ୍ୟା ସମାଧାନ ପାଇଁ ତୁରନ୍ତ ଶିକ୍ଷା ବିଭାଗ ଓ ପ୍ରଶାସନ ପଦକ୍ଷେପ ନେବାକୁ ଅଞ୍ଚଳବାସୀ ଦାବି କରିଛନ୍ତି। ଏ ବିଷୟରେ ଜିଲା ଭାରପ୍ରାପ୍ତ ଶିକ୍ଷାଧିକାରୀ ଶୁଭଲକ୍ଷ୍ମୀ ନାୟକଙ୍କୁ ବାରମ୍ବାର ଯୋଗାଯୋଗ କରାଯାଇଥିଲା। ସେ ଏକ ମିଟିଂରେ ଥିବାରୁ ମତାମତ ଦେଇ ପାରିବେ ନାହିଁ ବୋଲି କହିଥିଲେ। ଏ ସମ୍ପର୍କରେ ବିଡିଓ ନମିତା ବାରିକଙ୍କୁ ପଚାରିବାରୁ ଅଭିଯୋଗ ପାଇବା ପରେ ବିଦ୍ୟାଳୟକୁ ପରିଦର୍ଶନରେ ଯାଇଥିଲି। ମୁଖ୍ୟ ଫାଟକ ନିକଟରେ ଜମି ରହୁଥିବା ପାଣିକୁ ନିଷ୍କାସନ ପାଇଁ ତୁରନ୍ତ ପଦକ୍ଷେପ ନିଆଯିବ ବୋଲି ସେ କହିଥିଲେ। ବିଦ୍ୟାଳୟରେ ଖାଲି ପଡ଼ିଥିବା ଶିକ୍ଷକ ପଦବୀ ତୁରନ୍ତ ପୂରଣ କରିବାକୁ ଜିଲା ଓ ବ୍ଲକ ଶିକ୍ଷାଧିକାରୀ ପଦକ୍ଷେପ ନେବାକୁ ବିଡିଓ ବାରିକ ପରାମର୍ଶ ଦେଇଥିବା କହିଥିଲେ।
