ଭୁବନେଶ୍ୱର,୪।୭(ବ୍ୟୁରୋ): ରାଜ୍ୟରେ ଏବେ ବନ୍ୟପ୍ରାଣୀ ଅସୁରକ୍ଷିତ ହୋଇପଡ଼ିଛନ୍ତି। ପ୍ରତିଦିନ କେଉଁଠି ନା କେଉଁଠି ବନ୍ୟପ୍ରାଣୀଙ୍କୁ ଶିକାର ଖବର ହେଉ କିମ୍ବା ବନ୍ୟପ୍ରାଣୀ ଅଙ୍ଗପ୍ରତ୍ୟଙ୍ଗ ଚୋରା କାରବାର ଘଟଣା ନଜରକୁ ଆସୁଛି। ଏସବୁ ଦେଖିଲେ ବନ ବିଭାଗ ଜଙ୍ଗଲ ଓ ବଣ୍ୟପ୍ରାଣୀଙ୍କ ସୁରକ୍ଷା କ୍ଷେତ୍ରରେ ଗୁରୁତର ଅବହେଳା କରୁଥିବା ଜଣାପଡ଼ୁଛି। ଆବଶ୍ୟକ ସଂଖ୍ୟକ ଫିଲ୍ଡ ଷ୍ଟାଫ୍ ବା ଗାର୍ଡ ଏବଂ ଫରେଷ୍ଟରଙ୍କ ଅଭାବ ସାଙ୍ଗକୁ ପଦବୀ ପୂରଣ ପାଇଁ ବନ ବିଭାଗର ଉଦାସୀନତା ଅନେକାଂଶରେ ରାଜ୍ୟରେ ବନ୍ୟପ୍ରାଣୀ ଓ ଜଙ୍ଗଲ ସୁରକ୍ଷା କ୍ଷେତ୍ରରେ ଅନ୍ତରାୟ ସାଜିଛି।
ରାଜ୍ୟରେ ଅନେକ ଫରେଷ୍ଟର ଓ ଗାର୍ଡ ପଦବୀ ଖାଲି ପଡ଼ିବା, ଓ୍ବାଚରଙ୍କୁ ଅଧିକାରୀଙ୍କ ଘରେ କାମ କରାଇବା ଯୋଗୁ ରାଜ୍ୟରେ ଜଙ୍ଗଲ ଓ ବନ୍ୟପ୍ରାଣୀ ସୁରକ୍ଷା କାର୍ଯ୍ୟ ପ୍ରଭାବିତ ହେଉଛି ବୋଲି ରାଜ୍ୟ ଅଣଗେଜେଟେଡ ବନ କର୍ମଚାରୀ ସଂଘ ସଭାପତି ଜଗବନ୍ଧୁ ପାତ୍ର ଅଭିଯୋଗ ଆଣିଛନ୍ତି। ସେ କହିଛନ୍ତି, ରାଜ୍ୟରେ ପ୍ରାୟ ୪୦୦ ଫରେଷ୍ଟର ଓ ୧୭୦୦ ଗାର୍ଡ ପଦବୀ ଖାଲିପଡ଼ିଛି। ଫଳରେ ସ୍ବାଭାବିକ ଭାବେ କାର୍ଯ୍ୟ ସମ୍ପନ୍ନ ନେଇ ଗୁରୁତର ବାଧା ଉପୁଜୁଛି। କୌଣସି ଡିଭିଜନରେ ସ୍ବତନ୍ତ୍ର ମୋବାଇଲ ସ୍କ୍ବାଡ୍ ମଧ୍ୟ ନାହିଁ। ଏଭଳି ଅଭାବୀ ପରିସ୍ଥିତିରେ ମଧ୍ୟ ରେଲୱେ ଭିଜିଲାନ୍ସ, ଇଣ୍ଟର୍ନାଲ ଭିଜିଲାନ୍ସ ସ୍କ୍ବାଡ୍କୁ ବନ କର୍ମଚାରୀଙ୍କୁ ଡେପୁଟେଶନରେ ପଠାଯାଉଛି। ସେହିଭଳି ବିଭାଗୀୟ ଉଚ୍ଚ ଅଧିକାରୀଙ୍କ ଘରେ ଗଜସାଥୀ ଓ ସୁରକ୍ଷା ୱାଚରଙ୍କ ମଧ୍ୟରୁ ଅର୍ଦ୍ଧାଧିକ କର୍ମଚାରୀଙ୍କୁ ରୋଷେଇ, ମାଳୀ, ଗେଟ୍କିପର ଆଦି କାମରେ ନିୟୋଜିତ କରାଯାଉଛି। ସେପଟେ କେଉଁ କର୍ମଚାରୀ ଆରାମ କରୁଛନ୍ତି ତ ଆଉ କାହାକୁ ବିଶ୍ରାମ ନାହିଁ। ବନ ବିଭାଗର ଡ୍ୟୁଟି ବଣ୍ଟନ ବ୍ୟବସ୍ଥା ଆଦୌ ପାରଦର୍ଶୀ ନୁହେଁ। ବ୍ୟବସ୍ଥା ଏମିତି ଯେ, ସିଲଭିକଲଚର, ୱାର୍କିଙ୍ଗପ୍ଲାନ, କେନ୍ଦୁପତ୍ର, ଟ୍ରେନିଂ ସର୍କଲ ପ୍ରଭୃତିରେ କାର୍ଯ୍ୟରତ ସହସ୍ରାଧିକ କର୍ମଚାରୀ ବନ୍ୟଜନ୍ତୁ/ନିଆଁ ସୁରକ୍ଷାରେ ନିୟୋଜିତ ହୁଅନ୍ତି ନାହିଁ। ତେଣୁ ସିଙ୍ଗିଲ ଉଇଣ୍ଡୋ ପରିଚାଳନା ନିମିତ୍ତ, ଇଣ୍ଟିଗ୍ରେଟେଡ ସର୍କଲ ରି-ଅର୍ଗାନାଇଜେଶନ ପାଇଁ ଅନେକ ଦିନରୁ ବାରମ୍ବାର ଦାବି କରୁଥିଲେ ମଧ୍ୟ ବିଭାଗ ଶୁଣୁନାହିଁ ବୋଲି ଜଗବନ୍ଧୁ ଅଭିଯୋଗ କରିଛନ୍ତି। ସବୁଠାରୁ ବଡ଼ କଥା ହେଲା, ବନ୍ୟପ୍ରାଣୀ ସୁରକ୍ଷା ପାଇଁ ୨୦୦୮ ମସିହାରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ସ୍ପେଶାଲ୍ ଷ୍ଟ୍ରାଇକିଂ ଫୋର୍ସ (ଏସ୍ଏସ୍ଏଫ୍) ଗଠନ କରିବା ପାଇଁ ଘୋଷଣା କରିଥିଲେ। ରାଜ୍ୟର ୫୦ଟି ସ୍ଥାନରେ ଏସ୍ଏସ୍ଏଫ୍ର ସ୍ତନ୍ତ୍ର ଟିମ୍ ମୁତୟନ ହୋଇ ବନ୍ୟପ୍ରାଣୀ ସୁରକ୍ଷା ପାଇଁ କାର୍ଯ୍ୟ କରିଥାଆନ୍ତେ। କିନ୍ତୁ ଦୀର୍ଘ ୧୪ ବର୍ଷ ପରେ ମଧ୍ୟ ଏସ୍ଏସ୍ଏଫ୍ ଗଠନ ହୋଇପାରିଲା ନାହିଁ। ଏଥିପାଇଁ କେବଳ ପିସିସିଏଫ୍ମାନେ ଦାୟୀ ବୋଲି ଜଗବନ୍ଧୁ କହିଛନ୍ତି। ସେହିପରି ଆଠଗଡ଼ରେ ହାତୀ କଙ୍କାଳ ଉଦ୍ଧାର ଘଟଣାରେ ଜଗବନ୍ଧୁ ପ୍ରତିକ୍ରିୟା ରଖି କହିଛନ୍ତି, ହାତୀର ମୃତ୍ୟୁ ଯେମିତି ବି ହେଉ (ସ୍ବାଭାବିକ, ବିଦ୍ୟୁତ୍ ଆଘାତ, ରେଳ/ଯାନ ଦୁର୍ଘଟଣା କିମ୍ବା ଶିକାର) ପଛେ ଗାର୍ଡ କିମ୍ବା ଫରେଷ୍ଟରଙ୍କୁ ବଳି ଦେଇ ସମସ୍ତେ ସୁରକ୍ଷିତ ରହିଯାଉଛନ୍ତି। ଆଠଗଡ଼ରେ ଯେଉଁଭଳି ଭାବେ ହାତୀ କଙ୍କାଳ ଜବତ ହେଲା, ସେହିଭଳି କିଛି ଉଦାହରଣ ଅଛି ଯେଉଁଥିରେ ଆର୍ସିସିଏଫ୍, ଡିଏଫ୍ଓ ଏବଂ ଏସିଏଫ୍ ସମସ୍ତେ ଜାଣି ମଧ୍ୟ ବିନା ମାମଲାରେ ପୋତା ହେଇଛି। ଏଭଳି ୪୦ ଉଦାହରଣ ସେ ଦେଇପାରିବେ ବୋଲି ଜଗବନ୍ଧୁ କହିିଛନ୍ତି। ଆଠଗଡ଼ ଘଟଣାର ତଦନ୍ତରେ ସମସ୍ତଙ୍କ ନାର୍କୋଟିକ ଟେଷ୍ଟ ପାଇଁ ଜଗବନ୍ଧୁ ଦାବି କରିଛନ୍ତି। ଏ ସମ୍ପର୍କରେ ଖୋର୍ଦ୍ଧା ଜିଲା ଅବୈତନିକ ବନ୍ୟପ୍ରାଣୀ ତତ୍ତ୍ୱାବଧାରକ ଶୁଭେନ୍ଦୁ ମଲ୍ଲିକ କହିଛନ୍ତି, ରାଜ୍ୟ ସରକାର ଯଥାଶୀଘ୍ର ବନ ଅଧିକାରୀଙ୍କର ଏସବୁ ବେଆଇନ କାମ ବନ୍ଦ କରିବା ସହ ସ୍ପେଶାଲ୍ ଷ୍ଟ୍ରାଇକିଂ ଫୋର୍ସ ଗଠନ ଲାଗି ପଦକ୍ଷେପ ନିଅନ୍ତୁ, ତା’ହେଲେ ଆଠଗଡ଼ ବନଖଣ୍ଡ ଭଳି ଘଟଣା ରୋକାଯାଇପାରିବ। ଅନ୍ୟପକ୍ଷରେ ଏ ନେଇ ପିସିସିଏଫ୍ (ବନ୍ୟପ୍ରାଣୀ) ଶଶୀ ପଲ୍ଙ୍କୁ ଯୋଗାଯୋଗ କରାଯାଇଥିଲେ ମଧ୍ୟ ତାଙ୍କ ପ୍ରତିକ୍ରିୟା ମିଳିପାରିନାହିଁ।
