ମୁମ୍ବାଇ, ୨୭ା୧୨ (ପି.ଟି.)- ନବ ନିଯୁକ୍ତ ଜାତୀୟ ଚୟନକର୍ତ୍ତା ଆବେ କୁରୁଭିଲ୍ଲାଙ୍କ ବିରୋଧରେ ସ୍ବାର୍ଥ ନିହିତ ଦ୍ୱନ୍ଦ୍ୱ ଅଭିଯୋଗ ଆଣିଛନ୍ତି ମଧ୍ୟପ୍ରଦେଶ କ୍ରିକେଟ ଆସୋସିଏଶନର ପୂର୍ବତନ ସଦସ୍ୟ ସଞ୍ଜୀବ ଗୁପ୍ତା। କୁରୁଭିଲ୍ଲା ବର୍ତ୍ତମାନ ଦୁଇଟି ପଦବୀରେ ରହିଥିବା ସେ ଉଲ୍ଲେଖ କରିଛନ୍ତି। ଗୁପ୍ତା ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ)ର ଏଥିକ୍ସ ଅଫିସର ଜଷ୍ଟିସ୍ (ଅବସରପ୍ରାପ୍ତ) ଡି.କେ. ଜୈନଙ୍କ ନିକଟରେ ଅଭିଯୋଗ କରିଛନ୍ତି। କୁରୁଭିଲ୍ଲା ଡି. ଓ୍ବାଇ ପାଟିଲ ଏକାଡେମୀର ନିର୍ଦ୍ଦେଶକ ରହିଥିବାବେଳେ ବର୍ତ୍ତମାନ ଜାତୀୟ ଚୟନକର୍ତ୍ତା ହୋଇଛନ୍ତି। କୁରୁଭିଲ୍ଲା ଭାରତ ତରଫରୁ ୧୦ ଟେଷ୍ଟ ଏବଂ ୨୫ ଅନ୍ତର୍ଜାତୀୟ ଦିନିକିଆ ମ୍ୟାଚ ଖେଳିଛନ୍ତି। ମଦନଲାଲ, ଆର୍.ପି. ସିଂ ଏବଂ ସୁଲକ୍ଷଣା ନାଏକଙ୍କୁ ନେଇ ଗଠିତ ବିସିସିଆଇର କ୍ରିକେଟ ଉପଦେଷ୍ଟା କମିଟି (ସିଏସି) ଗୁରୁବାର ଜାତୀୟ ସିଲେକ୍ସନ ପ୍ୟାନେଲ ମନୋନୀତ କରିଛି। ଗୁପ୍ତା ଏହି ଭଳି ଏକ ଅଭିଯୋଗ ମୁମ୍ବାଇ କ୍ରିକେଟ ଆସୋସିଏଶନ (ଏମ୍ସିଏ) ସଭାପତି ବିଜୟ ପାଟିଲଙ୍କ ବିରୋଧରେ ଆଣିଛନ୍ତି।
