ବେଙ୍ଗାଲୁରୁ, ୧୧।୮: ନୂଆ ଶିକ୍ଷାନୀତିକୁ ନେଇ ବିତର୍କ ଚାଲିଥିବାବେଳେ ଭାଷାକୁ ନେଇ ରାଜନୀତି ଆରମ୍ଭ ହୋଇଯାଇଛି। ହିନ୍ଦୀ ଭାଷାକୁ ନେଇ କର୍ନାଟକର ପୂର୍ବତନ ମୁଖ୍ୟମନ୍ତ୍ରୀ ଏଚ୍.ଡି. କୁମାରସ୍ବାମୀ ସମାଲୋଚନା କରିଛନ୍ତି। ହିନ୍ଦୀ ରାଜନୀତି ପାଇଁ ଦକ୍ଷିଣ ଭାରତୀୟ ନେତାମାନେ ପ୍ରଧାନମନ୍ତ୍ରୀ ହେବା ସୁଯୋଗରୁ ବଞ୍ଚତ୍ତ ହୋଇଥିବା ସେ କହିଛନ୍ତି।
ଡିଏମ୍କେ ଏମ୍ପି କାନିମୋଝି ହିନ୍ଦୀ ବୁଝିପାରୁ ନ ଥିବାରୁ ବିମାନବନ୍ଦରରେ ଅସୁବିଧାର ସମ୍ମୁଖୀନ ହୋଇଥିବା ସମ୍ପର୍କରେ ରବିବାର ଟୁଇଟ୍ କରିଥିଲେ। ସେ ଭାରତୀୟ ନୁହନ୍ତି କି ବୋଲି ଜଣେ ସିଆଇଏସ୍ଏଫ୍ ଅଫିସର ପ୍ରଶ୍ନ କରିଥିଲେ। କାନିମୋଝି ଉକ୍ତ ଅଫିସରଙ୍କୁ ତାମିଲ କିମ୍ବା ଇଂଲିଶରେ କହିବାକୁ ପରାମର୍ଶ ଦେବାରୁ ସେ ଏଭଳି କହିଥିଲେ। କାନିମୋଝିଙ୍କ ଟୁଇଟ୍ ପରେ କଂଗ୍ରେସ ଏମ୍ପି କନିକମ୍ ଟାଗୋର ଏବଂ କାର୍ତ୍ତି ଚିଦାମ୍ବରମ ଏଭଳି ଘଟଣାକୁ ନିନ୍ଦା କରିଥିଲେ। କୁମାରସ୍ବାମୀ କାନିମୋଝିଙ୍କୁ ସମର୍ଥନ ଜଣାଇଛନ୍ତି। ବିମାନବନ୍ଦରରେ ଯାହା ଘଟିଲା ତାହା ଭଉଣୀ କାନିମୋଝିଙ୍କ ପାଇଁ ଅପମାନ ବୋଲି ସେ କହିଛନ୍ତି। ହିନ୍ଦୀ ରାଜନୀତି ପାଇଁ ଦକ୍ଷିଣୀ ନେତାମାନଙ୍କଠାରୁ କିପରି ସୁଯୋଗ ଛଡ଼ାଇ ନିଆଯାଉଛି, ତାହା ଉପରେ ବିତର୍କର ସମୟ ଆସିଛି ବୋଲି କୁମାରସ୍ବାମୀ କହିଛନ୍ତି। ହିନ୍ଦୀ ରାଜନୀତି ଯୋଗୁ ଅନେକ ଦକ୍ଷିଣ ଭାରତୀୟ ନେତା ପ୍ରଧାନମନ୍ତ୍ରୀ ହେବାରୁ ବଞ୍ଚତ୍ତ ହୋଇଛନ୍ତି। ଏଚ୍.ଡି. ଦେବେଗୌଡା, କରୁଣାନିଧି, କାମରାଜ ଦକ୍ଷିଣ ଭାରତର ପ୍ରମୁଖ ନେତା। ଯଦିଓ ଦେବେଗୌଡ଼ା ଏହି ପ୍ରତିବନ୍ଧକକୁ ଭାଙ୍ଗିବାରେ ସଫଳ ହୋଇଥିଲେ, ତେବେ ଭାଷାକୁ ନେଇ ଅନେକ ସମୟରେ ତାଙ୍କୁ ସମାଲୋଚନା କରାଯିବା ସହ ବ୍ୟଙ୍ଗ କରାଯାଉଥିଲା। ଲାଲ୍କିଲ୍ଲାରେ ଦେବେଗୌଡ଼ାଙ୍କୁ ହିନ୍ଦୀରେ ଭାଷଣ ଦେବା ପାଇଁ ବାଧ୍ୟ କରାଯାଇଥିଲା ବୋଲି କୁମାରସ୍ବାମୀ କହିଛନ୍ତି।
