ଜଗତ୍ସିଂହପୁର ଅଫିସ, ୨୩ା୨: ମଙ୍ଗଳବାର ଜଗତ୍ସିଂହପୁର ଜିଲାରେ ୪ର୍ଥ ପର୍ଯ୍ୟାୟ ନିର୍ବାଚନ ଅନୁଷ୍ଠିତ ହୋଇଯାଇଛି। ଏହି ପର୍ଯ୍ୟାୟରେ କୁଜଙ୍ଗ ବ୍ଲକ ଅଞ୍ଚଳରେ ୮୨.୧୩% ମତଦାନ ହୋଇଛି। ଯେଉଁଥିରେ ବ୍ଲକର ୪ଟି ଜୋନ ମଧ୍ୟରୁ ବଗଦିଆ ପଞ୍ଚାୟତରେ ସର୍ବାଧିକ ୯୩.୩୫% ଓ କୁଜଙ୍ଗରେ ସର୍ବନିମ୍ନ ୭୩.୨୨% ମତଦାନ ସମ୍ଭବ ହୋଇପାରିଛି । ସେହିପରି ରଘୁନାଥପୁର ବ୍ଲକରେ ୮୦.୨୪% ମତଦାନ ହୋଇଛି। ଯେଉଁଥିରେ ବ୍ଲକର ୨ଟି ଜୋନ୍ରୁ ୮୨.୬୩% ମହିଳା ଓ ୭୭.୯୮% ପୁରୁଷ ମତଦାନ କରିଛନ୍ତି। ରଘୁନାଥପୁର ବ୍ଲକ ଅଞ୍ଚଳରେ କାଁ ଭାଁ ଉତ୍ତେଜନା ଦେଖା ଦେଇଥିଲେ ସୁଦ୍ଧା ନିୟନ୍ତ୍ରଣ ଭିତରେ ରହିଛି। କିନ୍ତୁ କୁଜଙ୍ଗର ଏକାଧିକ ସ୍ଥାନରେ ହିଂସା ସାଙ୍ଗକୁ ଅବ୍ୟବସ୍ଥା ପଦାକୁ ଆସିଛି। ତେବେ ମତଦାନ ପରେ କୁଜଙ୍ଗ, ରଘୁନାଥପୁର ବ୍ଲକ ଅଞ୍ଚଳରୁ ପୋଲିଂ ଦଳଗୁଡିକ ବାଲଟ ବାକ୍ସ ସାଙ୍ଗକୁ ଅନ୍ୟାନ୍ୟ ସାମଗ୍ରୀ ଧରି ଯଥାକ୍ରମେ ରାହାମାର ସାରଳା ମହାବିଦ୍ୟାଳୟ ଓ ରଘୁନାଥପୁରର ପୂର୍ଣ୍ଣଚନ୍ଦ୍ର ବିଦ୍ୟାମନ୍ଦିର ବିତରଣ କେନ୍ଦ୍ରରେ ପହଞ୍ଚତ୍ଥିଲେ। କୁଜଙ୍ଗ ବ୍ଲକର ୪ଟି ଜିଲା ପରିଷଦ ଜୋନ୍ ଅନ୍ତର୍ଗତ ୨୮ଟି ପଞ୍ଚାୟତ ପାଇଁ ୪୬୫ଟି ବୁଥ କରାଯାଇଥିଲା। ୧,୩୭,୯୦୩ ଜଣ ଭୋଟର ସେମାନଙ୍କ ମତଦାନ ସାବ୍ୟସ୍ତ କରିବା ସୁଯୋଗ ଥିଲା । କିନ୍ତୁ ୧,୧୩,୨୬୬ ଜଣ ଭୋଟ ଦେଇଥିଲେ। ସେହିପରି ରଘୁନାଥପୁର ବ୍ଲକର ୨ଟି ଜିଲା ପରିଷଦ ଜୋନ ଅନ୍ତର୍ଗତ ୧୯ଟି ପଞ୍ଚାୟତ ପାଇଁ ୩୧୩ଟି ବୁଥ୍ ହୋଇଥିଲା। ଯେଉଁଥିରେ ୬୯,୨୭୦ ଜଣ ଭୋଟର ଭୋଟ ଦେଇ ପାରିଥାନ୍ତେ। କିନ୍ତୁ ୫୫,୮୨୨ ଜଣ ମତଦାନ ସାବ୍ୟସ୍ତ କରି ପାରିଛନ୍ତି । ମୋଟ ଉପରେ ଉଭୟ ବ୍ଲକ ଅଞ୍ଚଳର ୧୬୫୧ ଜଣ ପ୍ରାର୍ଥୀଙ୍କ ଭାଗ୍ୟ ବାଲଟ ବାକ୍ସ ଭିତରେ ସିଲ୍ ହୋଇଯାଇଛି। ସେମାନଙ୍କ ମଧ୍ୟରୁ କୁଜଙ୍ଗର ୧୧୩୮ ଓ ରଘୁନାଥପୁର ବ୍ଲକର ୫୧୩ ଜଣ ପ୍ରାର୍ଥୀ ରହିଛନ୍ତି। କୁଜଙ୍ଗ ବ୍ଲକ ଅଞ୍ଚଳର ୧୩ ଜଣ ଜିଲା ପରିଷଦ, ୯୯ ସମିତି ସଭ୍ୟ, ୧୧୪ ସରପଞ୍ଚ ଓ ୯୧୨ ଜଣ ୱାର୍ଡ ସଭ୍ୟ ପ୍ରାର୍ଥୀ ନିର୍ବାଚନ ମଇଦାନରେ ଅବତୀର୍ଣ୍ଣ ହୋଇଥିଲେ। ୨୨ଟି ମୋବାଇଲ ପୋଲିସ ଦଳ ପାଟ୍ରୋଲିଂ ଦାୟିତ୍ୱରେ ଥିଲେ। ସେହିପରି ରଘୁନାଥପୁର ବ୍ଲକ ଅଞ୍ଚଳରେ ୭ଜଣ ଜିଲା ପରିଷଦ ସଭ୍ୟ, ୭୧ ସମିତି ସଭ୍ୟ, ୯୮ ସରପଞ୍ଚ ଓ ୩୩୭ ଜଣ ୱାର୍ଡ ସଭ୍ୟ ପ୍ରାର୍ଥୀ ରହିଛନ୍ତି। ପୋଲିଂ କର୍ମଚାରୀଙ୍କ ସହ ପୋଲିସକୁ ମିଶାଇ ମୋଟ ୩,୧୧୨ ଜଣ ନିର୍ବାଚନ କାର୍ଯ୍ୟରେ ନିୟୋଜିତ ଥିଲେ। ୧୭ଟି ପୋଲିସ ମୋବାଇଲ ଦଳ ଆଇନଶୃଙ୍ଖଳା ଦାୟିତ୍ୱରେ ଥିଲେ। ଉଭୟ ବ୍ଲକ ଅଞ୍ଚଳର ୫୧ଟି ଅତିସମ୍ବେଦନଶୀଳ ଓ ୧୨୪ ସମ୍ବେଦନଶୀଳ ବୁଥ ଚିହ୍ନଟ କରାଯାଇଥିଲା।
