ଖୋର୍ଦ୍ଧା ଅଫିସ,୧୧।୧୨: ଖୋର୍ଦ୍ଧା ବ୍ଲକ ଅନ୍ତର୍ଗତ ଗୁଡୁମ ଗ୍ରାମର କୃଷ୍ଣଚନ୍ଦ୍ର ସାହୁ। ବୟସ ପାଖାପାଖି ୬୫ ଛୁଇଁଲାଣି। ହେଲେ ସେ ଥକି ପଡ଼ିନାହାନ୍ତି। ଏହି ବୟସରେ ବି ସେ ଦିନକୁ ୮କି.ମି. ସାଇକେଲରେ ଯାତ୍ରା କରି ୨୦୦ରୁ ୩୦୦ଲିଟର ପାଣି ବୋହି ବିଭିନ୍ନ ଦୋକାନରେ ଯୋଗାଉଛନ୍ତି। ୩୫ବର୍ଷ ଧରି ଏହି କାର୍ଯ୍ୟ କରୁଥିବା କୃଷ୍ଣଚନ୍ଦ୍ର କହିଛନ୍ତି।
କୃଷ୍ଣଚନ୍ଦ୍ର ଭୋରରୁ ନିତ୍ୟକର୍ମ ସାରି ସାଇକଲ ଧରି ଖୋର୍ଦ୍ଧାକୁ ବାହାରିପଡ଼ନ୍ତି। ସାଥିରେ ୪ଟି ୧୫ଲିଟର ପ୍ଲାଷ୍ଟିକ ବ୍ୟାରେଲ ଧରି ଆସିଥାନ୍ତି। ସାଇକଲରେ ୮କି.ମି. ଯାତ୍ରା ପରେ ଖୋର୍ଦ୍ଧାରେ ପହଞ୍ଚିଥାନ୍ତି। ପରେ ନିକଟ ନଳକୂପରୁ ବ୍ୟାରେଲରେ ପାଣି ଭର୍ତ୍ତି କରି ବିଭିନ୍ନ ଦୋକାନରେ ଦେଇଥାନ୍ତି। ପାଣି ବୋହିବା କାମ ସାରିବା ପରେ, ପୁରୁଣା ବସଷ୍ଟାଣ୍ଡରେ ଖବରକାଗଜ ବିତରକ ଷ୍ଟଲରେ ପହଞ୍ଚି ପେପର ସଜାଇବା କାମରେ ବିଭିନ୍ନ ଖବରକାଗଜ ଏଜେଣ୍ଟଙ୍କୁ ସହଯୋଗ କରିଥାନ୍ତି। ସକାଳ ୯ଟା ପରେ ସେଠାରୁ ଖବରକାଗଜ ଧରି ଘରକୁ ଯାଇଥାନ୍ତି। କାମ ଛୋଟ ହେଉ କି ବଡ, ଏଥିରେ ନିଷ୍ଠା ରହିବା ଆବଶ୍ୟକ। ଏହା ଅନ୍ୟଙ୍କ ଦୃଷ୍ଟିରେ ଛୋଟ କାର୍ଯ୍ୟ ହୋଇଥିଲେ ମଧ୍ୟ, ମୁଁ ଏଥିରେ ବହୁତ ଖୁସି। ଦୈନିକ ୨ଶହରୁ ୩ଶହ ଟଙ୍କା ରୋଜଗାର ହୋଇଥାଏ। ମୋର ଅଧିକ ଟଙ୍କା ପାଇବା ଆଶା ନାହିଁ। ଏହି ରୋଜଗାରରେ ମୋ ପରିବାର ଚଳିଥାଏ। କରୋନା ମହାମାରୀ ସମୟରେ ହୋଟେଲ, ଦୋକାନ ବନ୍ଦ ଥିବାରୁ କୌଣସି କାମଧନ୍ଦା ନ ଥିଲା। ଫଳରେ ବହୁ ଅସୁବିଧାର ସମ୍ମୁଖୀନ ହେବାକୁ ପଡ଼ିଛି। ତଥାପି ଭାଙ୍ଗିନି। ଏହି କାର୍ଯ୍ୟରେ ମୋତେ ବହୁତ ଆନନ୍ଦ ମିଳେ ବୋଲି କୃଷ୍ଣଚନ୍ଦ୍ର କହିଛନ୍ତି। ବରିଷ୍ଠ ଖବରଦାତା ପ୍ରଭାତ ମିଶ୍ର କହିଛନ୍ତି, ଦୀର୍ଘ ବର୍ଷ ଧରି କୃଷ୍ଣଚନ୍ଦ୍ରଙ୍କୁ ଦେଖି ଆସୁଛି। ପେଟ୍ରୋଲ ପମ୍ପ ନିକଟରେ କେତେକ ହୋଟେଲ, ଦୋକାନକୁ ସେ ପାଣି ବୋହି ଯୋଗାଇଥାନ୍ତି। ପେପର ପଏଣ୍ଟରେ ବସି ପେପର ପଢ଼ିବା ସହ ସହଯୋଗ କରିଥାନ୍ତି। ଖୋର୍ଦ୍ଧା ଅଞ୍ଚଳରେ ଅନେକ ଲୋକ ତାଙ୍କୁ କୃଷ୍ଣ ମଉସା ବୋଲି ସମ୍ବୋଧନ
କରିଥାନ୍ତି ବୋଲି ସେ କହିଛନ୍ତି।
