ଢେଙ୍କାନାଳ,୨୩ା୫(ରତନ ନାୟାର): ନିର୍ବାଚନ ପ୍ରଚାରର ଅନ୍ତିମ ପର୍ଯ୍ୟାୟରେ ଢେଙ୍କାନାଳ ବିଧାନସଭା ଆସନର କଂଗ୍ରେସ ପ୍ରାର୍ଥୀ ସୁସ୍ମିତା ସିଂହଦେଓଙ୍କ ପାଇଁ ବୁଧବାର ଅପରାହ୍ନରେ ପ୍ରଚାର କରିଥିଲେ ବରିଷ୍ଠ କଂଗ୍ରେସ ନେତା ତଥା ପୂର୍ବତନ କେନ୍ଦ୍ରମନ୍ତ୍ରୀ କାମାକ୍ଷା ପ୍ରସାଦ ସିଂହଦେଓ। ସୁସ୍ମିତା ହେଉଛନ୍ତି କାମାକ୍ଷା ପ୍ରସାଦଙ୍କ ପୁତୁରା ବୋହୂ। ସେ ଢେଙ୍କାନାଳ ବିଧାନସଭା ନିର୍ବାଚନମଣ୍ଡଳୀ ଅଧୀନ ଗଁଦିଆ ବ୍ଲକର ଚନ୍ଦ୍ରଶେଖରପୁର ଓ ନେଉଳପୋଇ ଅଞ୍ଚଳ ବୁଲି ସୁସ୍ମିତାଙ୍କ ପାଇଁ ଭୋଟ ମାଗିଥିଲେ। ଏହି ଅବସରରେ ଗଣମାଧ୍ୟମକୁ କାମାକ୍ଷା ପ୍ରସାଦ ସିଂହଦେଓ କହିଲେ, ଲୋକମାନେ ତାଙ୍କୁ ଢେଙ୍କାନାଳରୁ ୬ଥର ଏମ୍ପି କରି ପଠାଇଥିଲେ। ଚଳିତ ନିର୍ବାଚନରେ ତାଙ୍କ ବୋହୂ ସୁସ୍ମିତା କଂଗ୍ରେସରୁ ବିଧାନସଭା ପ୍ରାର୍ଥୀ ହୋଇଛନ୍ତି। ତାଙ୍କୁ ସମସ୍ତେ ଆଶୀର୍ବାଦ କରିବା ପାଇଁ କେପି ସିଂହଦେଓ ଲୋକମାନଙ୍କୁ ନିବେଦନ କରିଥିଲେ। ଏହି ପ୍ରଚାର ସମୟରେ ସୁସ୍ମିତାଙ୍କ ସ୍ବାମୀ ରାଜୀବ ଲୋଚନ ସିଂହଦେଓଙ୍କ ସମେତ ସମର୍ଥକମାନେ ଯାଇଥିଲେ। ଦୀର୍ଘଦିନ ପରେ ନିର୍ବାଚନରେ କଂଗ୍ରେସ ପ୍ରାର୍ଥୀଙ୍କ ପାଇଁ ବରିଷ୍ଠ କଂଗ୍ରେସ ନେତା କାମାକ୍ଷା ପ୍ରସାଦ ସିଂହଦେଓ ପ୍ରଚାର କରିବା ସାଧାରଣରେ ଆଲୋଚନାର ବିଷୟ ହୋଇଛି।
