କୋରାପୁଟ,୨୧ା୧୦(ଅମିତାଭ ବେହେରା): କୋରାପୁଟର ଆଦିବାସୀମାନେ ଚାଷ କରୁଥିବା ପାରମ୍ପରିକ ଔଷଧୀୟ ଧାନ ପୁଷ୍ଟିର ସୁରକ୍ଷା ଦେବ। ରୋଗ ପ୍ରତିରୋଧକ ଶକ୍ତି ବଢାଇବ ବୋଲି କହିଛନ୍ତି ବିଶ୍ୱବିଦ୍ୟାଳୟର ଜୈବ ବିବିଧତା ପ୍ରାକୃତିକ ସଂରକ୍ଷଣ ବିଭାଗ ସହାୟକ ପ୍ରଫେସର ଡ. ଦେବବ୍ରତ ପଣ୍ଡା।
କୋରାପୁଟ ମାଳଭୂମିରେ ଅଧିବାସୀମାନେ ଚାଷ କରୁଥିବା ୮ ପ୍ରକାର ରଙ୍ଗିନ ଓ ଔଷଧୀୟ ଧାନ ଯଥା କଳାଚୁଡ଼ି, ଭାଟମଲ୍ଲି, କାନ୍ଦୁଲକଠି, ହଳଦୀଗଣ୍ଠି, ଟିକିଚୁଡ଼ି, ବେଡ଼ାଗୁରୁମୁଖୀ, ପରାଧାନ ଓ ମାଲିମକଡାର ଗୁଣାତ୍ମକ ମାନ ଓ ଉପକାରିତା ଉପରେ ଗବେଷଣାକରି ସେ ଏହି ତଥ୍ୟ ଦର୍ଶାଇଛନ୍ତି। ଗବେଷଣାରୁ ଜଣାପଡ଼ିଛି, ୩ ପ୍ରକାର ପାରମ୍ପରିକ ଧାନ କଳାଚୁଡ଼ି, ବେଡ଼ାଗୁରୁମଖୀ ଓ କାନ୍ଦୁଲକାଠିରେ ଅଧିକ ପରିମାଣରେ ଆଇରନ, ଜ଼ିଙ୍କ୍, ଭିଟାମିନ୍ ସି, ଭିଟାମିନ୍ ଇ, ଫ୍ଲାବନୟାଡ୍ ଓ ଆଣ୍ଟିଅକ୍ସିଡାଣ୍ଟ ରହିଛି। ଏଥିସହ ପରାଧାନ, ଭାଟମଲ୍ଲି ଓ ହଳଦୀଗଣ୍ଠିରେ ଅଧିକ ପ୍ରୋଟିନ ଓ ଏନର୍ଜି ରହିଛି। ଏହି ତଥ୍ୟ ସେ ନିକଟରେ ଡିସ୍କୋଭରି ଫୁଡ୍ ଜର୍ନାଲରେ ତାଙ୍କର ରିସର୍ଚ୍ଚ ସ୍କଲାର କଳ୍ପନାରାଣୀ, ପ୍ରଫୁଲ୍ଲ ବେହେରା, ଭୁବନେଶ୍ୱର ପ୍ରଧାନ ଓ ସଂଗ୍ରାମ ଲେଙ୍କାଙ୍କ ସହିତ ମିଶି ଗତ ୧୬ରେ ପ୍ରକାଶ କରିଥିଲେ। ଏହି ଧାନର ଚାଉଳ ଦେଖିବାକୁ କଳା, ନାଲି, ଧୂସର ଓ ନୀଳ ରଙ୍ଗର। ଏହି ଧାନକୁ ଅଧିବାସୀମାନେ ବିଭିନ୍ନ ଔଷଧରେ ଲଗାଇଥାନ୍ତି। ଏହା ଆଦିବାସୀଙ୍କ କୁପୋଷଣ ରୋକିବା ସହ ରୋଗ ପ୍ରତିରୋଧକ ଶକ୍ତି ବଢ଼ାଇଥାଏ। କୋରାପୁଟର ଏହି ବିରଳ ଧାନ ବିଲୁପ୍ତହେବା ପୂର୍ବରୁ ଏହାର ସଂରକ୍ଷଣ ଓ ଚାଷକୁ ଉତ୍ସାହିତ କରିବାର ଆବଶ୍ୟକତା ରହିଛି। ଅଧିକ ପ୍ରଚାର, ପ୍ରସାର ଓ ବ୍ୟବହାର ଉପରେ ଧ୍ୟାନଦେବା ଆବଶ୍ୟକ ବୋଲି ଡ. ପଣ୍ଡା ସୂଚନା ଦେଇଛନ୍ତି। ଏହି ଔଷଧୀୟ ଚାଉଳକୁ ବିଭିନ୍ନ ଭାଲ୍ୟୁଏଡେଡ୍ ପ୍ରଡକ୍ଟରେ ବ୍ୟବହାର ଓ ଷ୍ଟାର୍ଟଅପ୍ ମାଧ୍ୟମରେ ପ୍ରଚାର ପ୍ରସାର କଲେ ଏହା କୋରାପୁଟକୁ ଏକ ସ୍ବତନ୍ତ୍ର ପରିଚୟ ଦେବ ଏଥିରେ ସନ୍ଦେହ ନାହିଁ।
