ୟୁଏଇ,୨୨।୯: ଭାରତୀୟ ଅଧିନାୟକ ବିରାଟ କୋହଲିଙ୍କ କ୍ୟାରିୟରରେ ଏକ ପର୍ଯ୍ୟାୟ ଥିଲା, ଯେତେବେଳେ ସେ ପିଠି ଯନ୍ତ୍ରଣାରେ ଅତ୍ୟଧିକ ଚିନ୍ତିତ ଥିଲେ। କିନ୍ତୁ ଭାରତର ପୂର୍ବତନ ଫିଟନେସ କୋଚ ବାସୁ ଶଙ୍କରଙ୍କ ତତ୍ତ୍ୱାବଧାନରେ ସେ ଏଥିରୁ ମୁକ୍ତି ପାଇବାରେ ସଫଳ ହୋଇଥିଲେ। ବସୁ ଶଙ୍କରଙ୍କ ପୁସ୍ତକ ‘୧୦୦, ୨୦୦ ପ୍ରାକ୍ଟିକାଲ ଆପ୍ଲିକେସନ ଇନ ଷ୍ଟ୍ରେନ୍ଥ ଆଣ୍ଡ କଣ୍ଡିସନିଂନ୍’ର ମୁଖବନ୍ଧରେ କୋହଲି ଲେଖିଛନ୍ତି ଯେ, ଜଣେ ଫିଟନେସ କୋଚ ତାଙ୍କୁ ଓଜନ ଉଠାଇବା ପାଇଁ କିପରି ପ୍ରେରଣା ଦେଇଥିଲେ ଏବଂ ତାଙ୍କୁ ଦୁନିଆର ସବୁଠାରୁ ଭଲ କ୍ରିକେଟର ଭାବରେ ପରିଣତ କରିଥିଲେ।
କୋହଲି ଲେଖିଛନ୍ତି ଯେ ୨୦୧୪ ର ଶେଷ ମାସରେ, ମୁଁ ପିଠି ଯନ୍ତ୍ରଣା ଦ୍ୱାରା ବହୁତ ଅସୁବିଧାରେ ପଡିଥିଲି, ଯାହା ଯିବାର ନାମ ନେଉ ନ ଥିଲା। ପ୍ରତିଦିନ ସକାଳେ ମୋର ପିଠି ଢିଲା କରିବା ପାଇଁ ମୋତେ ୪୫ ମିନିଟ ବ୍ୟାୟାମ କରିବାକୁ ପଡୁଥିଲା, କିନ୍ତୁ ଦିନରେ କିଛି ସମୟରେ ଏହା ପୁଣି ଟାଣ ହୋଇଯାଉଥିଲା। ଏନେଇ ବାସୁ ସାର୍ ସହ କଥା ହୋଇଥିଲି। ପୂର୍ବରୁ ମୁଁ ଓଜନ ଉଠାଇବା ବିଷୟରେ ନିଶ୍ଚିତ ନ ଥିଲି, କିନ୍ତୁ ବାସୁ ସାର୍ ମୋତେ କେବଳ ଗୋଟିଏ କଥା କହିଥିଲେ ଯାହା ମୋତେ ବିଶ୍ୱାସଯୋଗ୍ୟ ଥିଲା। ତାଙ୍କର ଜ୍ଞାନ ଏବଂ ଅଭିଜ୍ଞତା ଉପରେ ମୋର ସମ୍ପୂର୍ଣ୍ଣ ବିଶ୍ୱାସ ଥିଲା।
ସୂଚନାଯୋଗ୍ୟ, ୨୦୧୫ ରୁ ୨୦୧୯ ପର୍ଯ୍ୟନ୍ତ ଜାତୀୟ ଦଳ ସହ କାର୍ଯ୍ୟ କରିଥିବା ଶଙ୍କର କୋହଲି ଏବଂ ଭାରତୀୟ ଦଳର ଫିଟନେସରେ ଏକ ସକରାତ୍ମକ ପରିବର୍ତ୍ତନ ଆଣିବାରେ ପ୍ରମୁଖ ଭୂମିକା ଗ୍ରହଣ କରିଥିଲେ।
