ଲର୍ଡସ,୧୭।୮: ଟିମ ଇଣ୍ଡିଆର ଅଧିନାୟକ ବିରାଟ କୋହଲି ଆଉ ଏକ ରେକର୍ଡ କରିଛନ୍ତି। ଅଧିନାୟକ ଭାବରେ ଟେଷ୍ଟ ଜିତିବା ଦୃଷ୍ଟିରୁ ସେ ଚତୁର୍ଥ ନମ୍ବରରେ ପହଞ୍ଚିଛନ୍ତି। ଲର୍ଡସ ଗ୍ରାଉଣ୍ଡରେ ଖେଳାଯାଇଥିବା ଦ୍ୱିତୀୟ ଟେଷ୍ଟରେ ଟିମ ଇଣ୍ଡିଆ ଆୟୋଜକ ଇଂଲଣ୍ଡକୁ ୧୫୧ ରନ୍ରେ ପରାସ୍ତ କରିଛି। ଏହା ସହ ଦଳ ୫ ମ୍ୟାଚ ବିଶିଷ୍ଟ ସିରିଜରେ ୧-୦ ଅଗ୍ରଣୀ ହାସଲ କରିଛି। ଅଧିନାୟକ ଭାବରେ ଟେଷ୍ଟରେ ଏହା ବିରାଟ କୋହଲିଙ୍କ ୩୭ ତମ ବିଜୟ। ସେ ଏପର୍ଯ୍ୟନ୍ତ ୬୩ ଟି ଟେଷ୍ଟରେ ଟିମ ଇଣ୍ଡିଆର ଅଧିନାୟକ ହୋଇଛନ୍ତି। ଏଥିମଧ୍ୟରୁ ୧୫ଟି ଟେଷ୍ଟ ହାରିଥିବାବେଳେ ୧୧ଟି ଟେଷ୍ଟ ଡ୍ର ହୋଇଛି। କୋହଲି ୱେଷ୍ଟଇଣ୍ଡିଜର ପୂର୍ବତନ କିମ୍ବଦନ୍ତୀ କ୍ଲାଇଭ୍ ଲଏଡଙ୍କୁ ପଛରେ ପକାଇ ଦେଇଛନ୍ତି। କ୍ଲାଇଭ୍ଙ୍କ ଅଧିନାୟିକତ୍ୱରେ ୭୪ଟି ଟେଷ୍ଟ ମଧ୍ୟରୁ ୩୬ଟି ଜିତିଥିବାବେଳେ ୧୨ରେ ପରାସ୍ତ ହୋଇଥିଲେ। ୨୬ ଟି ମ୍ୟାଚ ଡ୍ର ହୋଇଥିଲା। କୋହଲି ମଧ୍ୟ ଭାରତର ସବୁଠାରୁ ସଫଳ ଟେଷ୍ଟ ଅଧିନାୟକ।
ଟେଷ୍ଟର ସବୁଠାରୁ ସଫଳ ଅଧିନାୟକ ବିଷୟରେ କହିବାକୁ ଗଲେ ଦକ୍ଷିଣ ଆଫ୍ରିକାର ଗ୍ରାମ ସ୍ମିଥ ନମ୍ବର -୧ରେ ଅଛନ୍ତି। ସେ ୧୦୯ ମଧ୍ୟରୁ ୫୩ଟି ଟେଷ୍ଟ ଜିତିଛନ୍ତି। ୨୯ଟି ହାରିଥିବାବେଳେ ୨୭ଟି ଟେଷ୍ଟ ଡ୍ର ରହିଥିଲା। ସେ ବିଶ୍ୱର ଏକମାତ୍ର ଅଧିନାୟକ ଯିଏକି ୫୦ରୁ ଅଧିକ ଟେଷ୍ଟ ଜିତିଛନ୍ତି। ଅଷ୍ଟ୍ରେଲିଆର ରିକି ପଣ୍ଟିଙ୍ଗ ଦ୍ୱିତୀୟ ଏବଂ ଅଷ୍ଟ୍ରେଲିଆର ଷ୍ଟିଭ ୱ ତୃତୀୟ ସ୍ଥାନରେ ଅଛନ୍ତି। ପଣ୍ଟିଂ ୭୭ଟି ଟେଷ୍ଟ ମଧ୍ୟରୁ ୪୮ଟି ଜିତିଥିଲେ। ୧୬ଟିରେ ହାରିଥିବାବେଳେ ୧୩ଟି ଡ୍ର ରହିଥିଲା। ଏଥି ସହିତ, ଷ୍ଟିଭ ୱ ୫୭ଟି ଟେଷ୍ଟ ମଧ୍ୟରୁ ୪୧ଟି ଜିତି ୯ଟିରେ ହାରିଥିଲେ। ୭ଟି ମ୍ୟାଚ ଡ୍ର ହୋଇଥିଲା।
