ନୂଆଦିଲ୍ଲୀ,୯।୯: ଗତ ମାର୍ଚ୍ଚରେ ବିରାଟ କୋହଲି ସଫଳତାର ସହ ଇଂଲଣ୍ଡ ବିପକ୍ଷ ୫ ମ୍ୟାଚ୍ ବିଶିଷ୍ଟ ଟି୨୦ ସିରିଜ୍ରେ ଓପନିଂ କରିଥିଲେ। ଆଉ ଟି୨୦ ବିଶ୍ୱକପ୍ରେ ରୋହିତ ଶର୍ମାଙ୍କ ଓପନିଂ ପାର୍ଟନର ହେବାକୁ ଚାହୁଁଥିବା ସ୍ବୀକାର କରିଥିଲେ ଅଧିନାୟକ କୋହଲି। କିନ୍ତୁ ଟି୨୦ ବିଶ୍ୱକପ୍ ଲାଗି ତାଙ୍କୁ ଓପନର ଭାବେ ବଛା ଯାଇ ନାହିଁ। ଦଳରେ ରୋହିତଙ୍କୁ ମିଶାଇ ୩ ଓପନରଙ୍କୁ ସାମିଲ କରାଯାଇଛି। ସେମାନେ ହେଲେ ଲୋକେଶ ରାହୁଲ ଓ ଇଶାନ କିଷନ। ଟି୨୦ ବିଶ୍ୱକପ୍ ଲାଗି ଭାରତୀୟ ଦଳର ଘୋଷଣା ବେଳେ ଏହା ସ୍ପଷ୍ଟ କରିଛନ୍ତି ଚୟନ କମିଟି ମୁଖ୍ୟ ଚେତନ ଶର୍ମା।
କିନ୍ତୁ ଯଦି ଟିମ୍ ମ୍ୟାନେଜମେଣ୍ଟ ଚିନ୍ତା କରେ, ପରିସ୍ଥିତି ଅନୁଯାୟୀ କୋହଲି ଓପନ କରିବା ଉଚିତ, ତେବେ ସେମାନେ ଏହା କରିପାରିବେ। କିନ୍ତୁ ରାହୁଲ, ରୋହିତଙ୍କ ମୁଖ୍ୟ ଓପନିଂ ପାର୍ଟନର। ଯଦି ଦରକାର ପଡ଼େ ସେ ଉଇକେଟ କିପିଂ କରିବେ। ଦଳରେ ତୃତୀୟ ଓପନର ଭାବେ କିଷନଙ୍କୁ ନିଆଯାଇଛି, କାରଣ ସେ ଦଳକୁ ଖୁବ୍ ବିକଳ୍ପ ଦେଉଛନ୍ତି। ସେ ଜଣେ ଓପନର ଭାବେ ଓ ମଧ୍ୟକ୍ରମରେ ବି ଖେଳିବା ପାଇଁ ଫିଟ୍। ଆଉ ସ୍ପିନରଙ୍କ ବିପକ୍ଷରେ ବଡ଼ ବଡ଼ ଶଟ୍ ଖେଳିବାର ଦକ୍ଷତା କାରଣରୁ ତାଙ୍କୁ ଶିଖର ଧାଓ୍ବନ ଓ ପୃଥ୍ବୀ ଶ’ଙ୍କ ବଦଳରେ ନିଆଯାଇଛି ବୋଲି ଚୟନ କମିଟି ମୁଖ୍ୟ କହିଛନ୍ତି।
