ଭୁବନେଶ୍ୱର,୪।୭: ଭାଜପା ନେତା ଜଗନ୍ନାଥ ପ୍ରଧାନଙ୍କୁ ଭୁବନେଶ୍ୱର ମହାନଗର ନିଗମ (ବିଏମ୍ସି)ର ଅତିରିକ୍ତ କମିଶନର ରତ୍ନାକର ସାହୁଙ୍କ ଉପରେ ଆକ୍ରମଣ ଅଭିଯୋଗରେ ଗିରଫ କରାଯାଇଛି। ଗୁରୁବାର ସଂଧ୍ୟାରେ ସେ ଭୁବନେଶ୍ୱର ଡିସିପି କାର୍ଯ୍ୟାଳୟରେ ଆତ୍ମସମର୍ପଣ କରିଥିଲେ, ପରେ ତାଙ୍କୁ ଗିରଫ କରାଯାଇ ଝାରପଡ଼ା ଜେଲକୁ ପଠାଯାଇଛି। ଏହି ଘଟଣା ଓଡ଼ିଶାରେ ହଇଚଇ ସୃଷ୍ଟି କରିଛି। ଓଡ଼ିଶା ପ୍ରଶାସନିକ ସେବା (ଓଏଏସ) ସଂଘ ଏହାର ତୀବ୍ର ବିରୋଧ କରି ଆନ୍ଦୋଳନ କରିଥିଲା। ପ୍ରଧାନଙ୍କ ଗିରଫଦାରୀ ପରେ ଏହି ଆନ୍ଦୋଳନ ପ୍ରତ୍ୟାହୃତ ହୋଇଛି।
ଜାମିନ୍ ନାମଞ୍ଜୁର ପରେ ୧୪ ଦିନ ପାଇଁ ବିଚାର ବିଭାଗୀୟ ହାଜତକୁ ଗଲେ ଭାଜପା ନେତା ଜଗନ୍ନାଥ ପ୍ରଧାନ । ବିଏମସି ଅତିରିକ୍ତ କମିସନର ରତ୍ନାକର ସାହୁଙ୍କୁ ଆକ୍ରମଣ ଘଟଣାରେ ଆତ୍ମସମର୍ପଣ ପରେ ଗୁରୁବାର ରାତିରେ ଭାଜପା ନେତା ଜଗନ୍ନାଥ ପ୍ରଧାନଙ୍କୁ ଗିରଫ କରିଥିଲା।
ଜଗନ୍ନାଥ ପ୍ରଧାନ ଭୁବନେଶ୍ୱରରେ ଭାଜପାର ଜଣେ ପ୍ରମୁଖ ନେତା ଭାବେ ପରିଚିତ। ୨୦୨୪ ବିଧାନସଭା ର୍ନିବାଚନରେ ସେ ଭୁବନେଶ୍ୱର ମଧ୍ୟ ଆସନରୁ ପ୍ରତିଦ୍ୱନ୍ଦ୍ୱିତା କରିଥିଲେ, କିନ୍ତୁ ମାତ୍ର ୩୭ ଭୋଟ ଅନ୍ତରରେ ପରାଜିତ ହୋଇଥିଲେ। ୨୦୧୪ ର୍ନିବାଚନରୁ ସେ ଏହି ଆସନରୁ ଚାରିଥର ପ୍ରତିଦ୍ୱନ୍ଦ୍ୱିତା କରିଛନ୍ତି, ଯେଉଁଥିରେ ଗୋଟିଏ ଥର ସ୍ବାଧୀନ ପ୍ରାର୍ଥୀ ଭାବେ ଏବଂ ତିନିଥର ଭାଜପା ପ୍ରାର୍ଥୀ ଭାବେ॥
ତାଙ୍କ ସମ୍ପତ୍ତି: ଜଗନ୍ନାଥ ପ୍ରଧାନଙ୍କ ନାମରେ ଭୁବନେଶ୍ୱରରେ ବିଭିନ୍ନ ସ୍ଥାନରେ ଜମି ଓ ଘର ରହିଛି। ତାଙ୍କ ନେଟ ଓ୍ବର୍ଥ ଲକ୍ଷାଧିକ ଟଙ୍କା ରହିଛି, ଯେଉଁଥିରେ ତାଙ୍କର ଅଚଳ ଓ ଚଳ ସମ୍ପତ୍ତି ଅନ୍ତର୍ଭୁକ୍ତ। ତେବେ, ଏହାର ସଠିକ ଆକଳନ ପାଇଁ ଅଧିକୃତ ର୍ନିବାଚନୀ ହଲଫନାମା ଉପରେ ର୍ନିଭର କରାଯାଇଛି। ର୍ନିବାଚନ କମିଶନଙ୍କ ତଥ୍ୟ ଅନୁଯାୟୀ, ତାଙ୍କ ସମ୍ପତ୍ତିରେ ରିଅଲ ଇଷ୍ଟେଟ, ବ୍ୟାଙ୍କ ଜମା ଏବଂ ଅନ୍ୟାନ୍ୟ ବିନିଯୋଗ ଅନ୍ତର୍ଭୁକ୍ତ ରହିଛି।ତଥ୍ୟ ଅନୁସାରେ ଜଗନ୍ନାଥ ପ୍ରଧାନଙ୍କ ମୋଟ ସମ୍ପତ୍ତି ୧୭ କୋଟି। ୨୦୨୨-୨୦୨୩ରେ ତାଙ୍କ ରୋଜଗାର ୪,୭୩,୮୯୦ ଥିଲେ । ତାଙ୍କ ନାମରେ ନଗଦ ୮୦ ହଜାର ଟଙ୍କା ଥିବା ବେଳେ ପତ୍ନୀଙ୍କ ନାମରେ ୨୫ ହଜାର ଟଙ୍କା ଥିବା ନେଇ ଉଲ୍ଲେଖ ରହିଛି । ନ୍ୟୁ ଇଣ୍ଡିଆନ ଏକ୍ସପ୍ରେସ ୨୦୨୪ରେ ପ୍ରକାଶିତ ଏକ ରିପୋର୍ଟ ଅନୁସାରେ ଜଗନ୍ନାଥ ପ୍ରଧାନ ଭୁବନେଶ୍ୱର ମଧ୍ୟ ବିଧାନସଭା ନିର୍ବାଚନମଣ୍ଡଳୀର ସବୁଠାରୁ ଧନୀ ପ୍ରାର୍ଥୀ ରୂପେ ବିବେଚିତ ହୋଇଥିଲେ ।
ଜଗନ୍ନାଥଙ୍କ ନାମରେ ଏସବିଆଇ ବ୍ୟାଙ୍କରେ ଏକଲକ୍ଷରୁ ଅଧିକ, କାନାରା ବ୍ୟାଙ୍କରେ ୧୦ ଲକ୍ଷ ଓ ଏକ୍ସିସ ବ୍ୟାଙ୍କରେ ୮୬ ହଜାର ଟଙ୍କା ରହିଛି । ବଣ୍ଡ, କମ୍ପାନୀ ସେୟାର ଭାବରେ ମୋଟ ୩ଟି ସେୟାରରେ ୩ ଲକ୍ଷ ଟଙ୍କା ରହିଛି । ଏହା ଛଡା ତାଙ୍କ ନାମରେ ଏଲଆଇସିର ଭିନ୍ନ ଭିନ୍ନ ପଲିସିରେ ୯ ଲକ୍ଷ ଓ ୮୮ ହଜାର, ରିଲାଏନ୍ସ ନିପ୍ପନରେ ୧୪ ଲକ୍ଷ,ଏକ୍ସସାଇଡ ଲାଇଫ ଇନ୍ୟୁରାନ୍ସ ପଲିସିରେ ୨ ଲକ୍ଷ ଜମା ଅଛି । ଜଗନ୍ନାଥ ପ୍ରଧାନଙ୍କ ନାମରେ କୌଣସି ଗାଡ଼ି ଓ ଋଣ ନାହିଁ। ଗହଣା ଭାବରେ ଜଗନ୍ନାଥ ପ୍ରଧାନଙ୍କ ୭ ଲକ୍ଷ ଟଙ୍କାର ସୁନା ମୁଦି ଓ ଚେନ ଅଛି। ତାଙ୍କ ନାମରେ ଥିବା କୃଷି ଜମିର ମୂଲ୍ୟ ୭ କୋଟି ଥିବା ବେଳେ ୬ କୋଟିର ଅଣ ଚାଷ ଜମି ରହିଛି । ୯୦ ଲକ୍ଷର କମର୍ସିଆଲ ବିଲିଂ ସହ ୮୫ ଲକ୍ଷର ବାସଭବନ ରହିଛି
ଜୁନ ୩୦ରେ ବିଏମ୍ସି ଅତିରିକ୍ତ ଆୟୁକ୍ତ ରତ୍ନାକର ସାହୁଙ୍କୁ କାର୍ଯ୍ୟାଳୟରୁ ଟାଣି ନେଇ ଆକ୍ରମଣ କରାଯାଇଥିବା ଅଭିଯୋଗ ହୋଇଛି। ଏହି ଘଟଣାର ଭିଡିଓ ସୋସିଆଲ ମିଡିଆରେ ଭାଇରାଲ ହେବା ପରେ ରାଜ୍ୟବ୍ୟାପୀ ତୀବ୍ର ପ୍ରତିକ୍ରିୟା ଦେଖାଦେଇଥିଲା। ଓଏଏସ ସଂଘ ଏହାକୁ ଏକ ଜଘନ୍ୟ କାର୍ଯ୍ୟ ଭାବେ ଅଭିହିତ କରି ପ୍ରଧାନଙ୍କ ଗିରଫଦାରୀ ଦାବି କରିଥିଲା। ଏହି ଘଟଣାରେ ଅନ୍ୟ ୫ ଜଣଙ୍କୁ ମଧ୍ୟ ଗିରଫ କରାଯାଇଛି, ଯେଉଁମାନେ ପ୍ରଧାନଙ୍କ ସମର୍ଥକ ବୋଲି ଅଭିଯୋଗ ହୋଇଛି।
ପ୍ରଧାନ ନିଜେ ଏହି ଆକ୍ରମଣରେ ସମ୍ପୃକ୍ତତା ଅସ୍ବୀକାର କରିଛନ୍ତି ଏବଂ ତଦନ୍ତରେ ସହଯୋଗ କରିବାକୁ ପ୍ରସ୍ତୁତ ଥିବା କହିଛନ୍ତି। ସେ କହିଛନ୍ତି, ମୁଁ ଏହି ଘଟଣାରେ ଜଡ଼ିତ ନାହିଁ। ମୋ ଓ ମୋ ଦଳର ନାମ ଖରାପ କରିବାକୁ ଏକ ଯୋଜନାବଦ୍ଧ ଚେଷ୍ଟା ହୋଇଛି।
