ନୂଆଦିଲ୍ଲୀ,୧।୩: ପ୍ରତିଦିନ ଲକ୍ଷଲକ୍ଷ ଲୋକ ଟ୍ରେନରେ ଯାତ୍ରା କରିଥା’ନ୍ତି। ଅନ୍ୟାନ୍ୟ ପରିବହନ ସୁବିଧା ତୁଳନାରେ ଟ୍ରେନରେ ଯାତ୍ରା କରିବା ଅତି ସହଜ ଓ ସୁବିଧାଜନକ ଅଟେ। ଯାତ୍ରୀ ଯେପରି ସୁବିଧାରେ ନିଜ ଗନ୍ତବ୍ୟରେ ପହଞ୍ଚି ପାରିବେ ସେଥିପାଇଁ ଇଣ୍ଡିଆନ ରେଲଓ୍ବେ ଅନେକ ପ୍ରକାର ସୁବିଧା ଯୋଗାଇଛି। ତନ୍ମଧ୍ୟରୁ ଏପରି କିଛି ସୁବିଧା ଅଛି ଯାହା ସମ୍ପର୍କରେ ଅଧିକାଂଶ ଲୋକ ଜାଣି ନାହାନ୍ତି। ଯଦି ଆପଣ ଟ୍ରେନରେ ଦୀର୍ଘକାଳୀନ ଯାତ୍ରା କରୁଛନ୍ତି। ଗନ୍ତବ୍ୟ ସ୍ଥଳରେ ପହଞ୍ଚିବାକୁ ବହୁତ ଦିନ ସମୟ ଲାଗିଥାଏ। ତେବେ ଜାଣିଛନ୍ତି କି, Indian Railway ଏଥିପାଇଁ ଏକ ଉପଯୋଗୀ ଟ୍ରାଭେଲ ନିୟମ ରଖିଛି ଯେଉଁଥିରେ ଆପଣ ଯାତ୍ରାରୁ ବ୍ରେକ୍ ନେଇ ପୁଣି ଯାତ୍ରା କରିପାରିବେ। ଅର୍ଥାତ୍ ଟ୍ରେନ୍ ଚଢିବା ଓ ଓହ୍ଲାଇବା ଭିତରେ ଦୁଇ ଦିନର ବ୍ରେକ୍ ନେଇ ପୁଣି ସେହି ଟିକେଟରେ ପୁଣି ନିଜ ଗନ୍ତବ୍ୟ ସ୍ଥଳକୁ ଯାତ୍ରା କରିପାରିବେ। ତେବେ ଆସନ୍ତୁ ଜାଣିବା ଏସମ୍ପର୍କରେ…
ଆପଣ ଯେଉଁ ଷ୍ଟେଶନରୁ ଟ୍ରେନରେ ଚଢିବେ ସେଠାରେ ପହଞ୍ଚିବାକୁ ଡେରି ହୋଇଯାଏ। କିମ୍ବା ଆପଣ ଟ୍ରେନ୍ ମିସ୍ କରି ଦେଉଛନ୍ତି ତେବେ ଆପଣ ପରବର୍ତ୍ତୀ ଦୁଇଟି ଷ୍ଟପେଜ ପରେ ମଧ୍ୟ ଟ୍ରେନ ଧରି ପାରିବେ। ରେଳ ନିୟମ ଅନୁଯାୟୀ, ଆପଣଙ୍କ ସିଟକୁ TTE ପରବର୍ତ୍ତୀ ଦୁଇଟି ଷ୍ଟେସନ ପର୍ଯ୍ୟନ୍ତ କାହାକୁ ଦେଇପାରିବ ନାହିଁ । ଯଦି ଦୁଇଟି ଷ୍ଟେସନ ପରେ ବି ଆପଣ ପହଞ୍ଚି ପାରିବେନି ତେବେ ଟିଟିଇ RAC PNR ଥିବା ଯାତ୍ରୀଙ୍କୁ ଆପଣଙ୍କ ସିଟ ଦେଇ ପାରନ୍ତି।
ସାଧାରଣତଃ ଟ୍ରେନରେ ଆପଣ ଗନ୍ତବ୍ୟ ସ୍ଥଳରେ ହିଁ ଓହ୍ଲାଇଥା’ନ୍ତି। କିନ୍ତୁ ଯଦି ଆପଣ ଗନ୍ତବ୍ୟ ସ୍ଥଳର ଆଗକୁ ଯିବାକୁ ଚାହାନ୍ତି କିମ୍ବା ନିଜ ଷ୍ଟପେଜରେ ଓହ୍ଲାଇବାକୁ ଭୁଲି ଯାଇଛନ୍ତି ତେବେ ଟେନଶନ ନେବାର କୌଣସି କଥା ନାହିଁ। ଟ୍ରେନ୍ରେ ବସି ଆପଣ ପରବର୍ତ୍ତୀ ଯାତ୍ରା ପାଇଁ ଟିକେଟ୍ କରିପାରିବେ। ଏଥିପାଇଁ ଆପଣଙ୍କୁ TTE ଙ୍କ ସହ କଥା ହେବାକୁ ପଡିବ। ଟିଟିଇ ରାଜି ହୋଇ ଟିକେଟ୍ କାଟିଦେଲେ ଆରାମରେ ପରବର୍ତ୍ତୀ ଯାତ୍ରା କରିପାରିବେ।
ଏବେ ଆଲୋଚନା କରିବା ସବୁଠାରୁ ଗୁରୁତ୍ୱପୂର୍ଣ୍ଣ ବିଷୟ ଉପରେ। ଯଦି ଦୀର୍ଘକାଳୀନ ଯାତ୍ରା କରୁଛନ୍ତି ତେବେ ଏହି ସମୟରେ ଆପଣ ବ୍ରେକ୍ ମଧ୍ୟ ନେଇପାରିବେ। ଅର୍ଥାତ ୧୦୦୦କିମି କିମ୍ବା ତା’ ଠାରୁ ଅଧିକ ଯାତ୍ରା କରୁଛନ୍ତି ତେବେ ୫୦୦କିମି ଯାତ୍ରା କରିବା ପରେ ଆପଣ ବ୍ରେକ୍ ନେଇପାରିବେ। ୫୦୦କିମି ଯାତ୍ରା ପରେ ଟ୍ରେନ୍ରୁ ଯେକୌଣସି ଷ୍ଟେଶନରୁ ଓହ୍ଲାଇ ୨ଦିନ ବ୍ରେକ୍ ନେଇ ବୁଲିବାକୁ ଯାଇ ପାରିବେ। ଏହାପରେ ପୁଣି ଟ୍ରେନରେ ଚଢି ନିଜ ଗନ୍ତବ୍ୟ ସ୍ଥଳକୁ ଯାତ୍ରା କରିପାରିବେ। କିନ୍ତୁ ଧ୍ୟାନ ରଖନ୍ତୁ ଏହି ନିୟମ ଶତାଦ୍ଦୀ, ରାଜଧାନୀ ଏବଂ ଜନ ଶତାଦ୍ଦୀ ଏକ୍ସପ୍ରେସ ପରି ପ୍ରିମିୟମ ଟ୍ରେନ ପାଇଁ ପ୍ରଯୁଜ୍ୟ ନୁହେଁ ।
