ନୂଆଦିଲ୍ଲୀ,୧।୩: ଭାରତୀୟ ଉଇକେଟକିପର ବ୍ୟାଟର ସଞ୍ଜୁ ସାମସନ ଘରୋଇ କ୍ରିକେଟ ଓ ଆଇପିଏଲରେ ନିୟମିତ ଭଲ ପ୍ରଦର୍ଶନ କରୁଛନ୍ତି। କିନ୍ତୁ ଅନ୍ତର୍ଜାତୀୟ କ୍ୟାରିୟରରେ ତାଙ୍କୁ ଏ ପର୍ଯ୍ୟନ୍ତ ଭଲ ଆରମ୍ଭ ମିଳିନାହିଁ। ସେ ଏବେ ବି ଦଳରେ ସ୍ଥାନ ପାଇବା ପାଇଁ ସଂଘର୍ଷ କରୁଛନ୍ତି। ନିକଟରେ ଶେଷ ହୋଇଥିବା ଶ୍ରୀଲଙ୍କା ବିପକ୍ଷ ଟି୨୦ ସିରିଜ୍ରେ ସଞ୍ଜୁ ନିଜକୁ ପ୍ରମାଣ କରିବାର ସୁଯୋଗ ପାଇଥିଲେ। ପ୍ରଥମ ଟି୨୦ରେ ବ୍ୟାଟିଂ ପାଇ ନ ଥିବା ବେଳେ ଅନ୍ତିମ ଦୁଇ ମ୍ୟାଚ୍ରେ ୩୯ ଓ ୧୮ ରନ୍ର ଇନିଂସ ଖେଳିଥିଲେ। ହେଲେ ୨୭ ବର୍ଷୀୟ କ୍ରିକେଟରଙ୍କ ପ୍ରଦର୍ଶନରେ ପ୍ରଭାବିତ ନୁହେଁ ପୂର୍ବତନ ପାକିସ୍ତାନ ଅଧିନାୟକ ସଲମାନ ବଟ୍ଟ।
“ସାମସନ କିଛି ଚମତ୍କାର ଶଟ୍ ଖେଳିଥିଲେ। ମାତ୍ର ୧୮,୧୯, ୨୦ ଓ ୩୦ ରନ୍ର ଇନିଂସ ଯଥେଷ୍ଟ ନୁହେଁ। ତାଙ୍କ ପାଖରେ ନିଶ୍ଚିତ ରୂପେ ପ୍ରତିଭା ରହିଛି। କିନ୍ତୁ ଦଳରେ ସ୍ଥାନ ପାଇବା ଲାଗି ଦାବିଦାର ହେବା ପାଇଁ ତାଙ୍କୁ ପ୍ରଦର୍ଶନ କରିବାକୁ ପଡ଼ିବ। କାରଣ ଭାରତୀୟ ଦଳରେ ସ୍ଥାନ ହାତେଇବା ପାଇଁ ଅନେକ ଖେଳାଳି ପ୍ରତିଦ୍ୱନ୍ଦ୍ୱିତା କରୁଛନ୍ତି। ଯଦି ତୁମେ ଦଳରେ ରହିବାକୁ ଚାହୁଁଛ, ତେବେ ତୁମକୁ ଅନ୍ୟ ପ୍ରତିଦ୍ୱନ୍ଦ୍ୱୀଙ୍କ ଅପେକ୍ଷା ଅସାଧାରଣ ହେବାକୁ ପଡ଼ିବ। ଏଣୁ ଏହା ପ୍ରତିଭା ନୁହେଁ, ଆଉଟ୍ ପୁଟ୍ ଉପରେ ସବୁ କିଛି ନିର୍ଭର କରେ” ବୋଲି ସଲମାନ ତାଙ୍କ ୟୁଟ୍ୟୁବ ଚ୍ୟାନେଲରେ କହିଛନ୍ତି।
