କାନପୁର,୨୩।୧୧: ନ୍ୟୁଜିଲାଣ୍ଡ ବିପକ୍ଷରେ ଖେଳାଯିବାକୁ ଥିବା ଦୁଇ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜ୍ ପୂର୍ବରୁ ଟିମ୍ ଇଣ୍ଡିଆକୁ ଶକ୍ତ ଧକ୍କା ଲାଗିଛି। ଆହତ ସମସ୍ୟା କାରଣରୁ ବାଦ୍ ପଡ଼ିଛନ୍ତି ସିନିୟର ଭାରତୀୟ ଓପନର ଲୋକେଶ ରାହୁଲ। ତାଙ୍କ ବାମ ଜଙ୍ଘରେ ମାଂସପେଶୀ ଟାଣି ହୋଇଯାଇଛି। ଏଣୁ ତାଙ୍କ ବଦଳରେ ମଧ୍ୟକ୍ରମରେ ବ୍ୟାଟିଂ କରୁଥିବା ସୂର୍ଯ୍ୟକୁମାର ଯାଦବଙ୍କୁ ସାମିଲ କରାଯାଇଛି ଦଳରେ। ସିରିଜ୍ର ପ୍ରଥମ ଟେଷ୍ଟ ଗୁରୁବାରଠାରୁ କାନପୁରରେ ଖେଳାଯିବ।
“ଟିମ୍ ଇଣ୍ଡିଆ ବ୍ୟାଟର ଲୋକେଶ ରାହୁଲଙ୍କ ମାଂସପେଶୀ ଟାଣି ହୋଇଯାଇଛି। ଏଥିଯୋଗୁ ସେ ନ୍ୟୁଜିଲାଣ୍ଡ ବିପକ୍ଷ ପୂରା ଟେଷ୍ଟ ସିରିଜ୍ରୁ ବାଦ୍ ପଡ଼ିଛନ୍ତି। ତାଙ୍କୁ ଏବେ ଏନ୍ସିଏଠାରେ ରିହାବିଲିଟେଶନରେ ରହିବାକୁ ପଡ଼ିବ” ବୋଲି ବିସିସିଆଇ ପକ୍ଷରୁ ଏକ ବିଜ୍ଞପ୍ତି ଜାରି କରାଯାଇଛି।
୨୯ ବର୍ଷୀୟ ରାହୁଲ ଏପର୍ଯ୍ୟନ୍ତ ଭାରତ ପାଇଁ ୪୦ ଟେଷ୍ଟ ଖେଳି ୩୫.୧୬ ହାରରେ ୨୩୨୧ ରନ୍ କରିଛନ୍ତି। ତାଙ୍କ ଓ ରୋହିତ ଶର୍ମାଙ୍କ ଅନୁପସ୍ଥିତିରେ ଶୁବମାନ ଗିଲ ଓ ମୟଙ୍କ ଅଗ୍ରଓ୍ବାଲ ଦଳ ପାଇଁ ଓପନିଂ କରିବେ ସ୍ପଷ୍ଟ ହୋଇଛି।
