ନୂଆଦିଲ୍ଲୀ,୧୪।୨: କଥାରେ ଅଛି ଯିଏ ଯେତେ ଶୀଘ୍ର ଉପରକୁ ଉଠେ, ସେତେ ଶୀଘ୍ର ଭୂମିରେ ଲୋଟିଥାଏ। ଠିକ୍ ଏଭଳି ଏକ ଉଦାହରଣ ହେଲେ କେକେଆର୍ର ମିଷ୍ଟ୍ରି ସ୍ପିନର ବରୁଣ ଚକ୍ରବର୍ତ୍ତୀ। ସେ ଟିମ୍ ଇଣ୍ଡିଆ ପକ୍ଷରୁ କେବଳ ୩ ଟି୨୦ ମ୍ୟାଚ୍ ଖେଳିଛନ୍ତି। ୨୦୨୧ରେ ତାଙ୍କୁ ଟି୨୦ ବିଶ୍ୱକପ୍ ଲାଗି ବିରାଟ କୋହଲିଙ୍କ ନେତୃତ୍ୱାଧୀନ ଟିମ୍ରେ ସାମିଲ କରାଯାଇଥିଲା। ହେଲେ ଟୁର୍ନାମେଣ୍ଟ ଶେଷ ହେବା ତୁରନ୍ତ ପରେ ତାଙ୍କୁ ବାଦ୍ କରିଦିଆଯାଇଥିଲା। ସେଦିନଠାରୁ ସେ ଜାତୀୟ ଦଳକୁ ଫେରିନାହାନ୍ତି। ଏବେ ବରୁଣ ଦଳରୁ ବାଦ୍ ପଡ଼ିବା ନେଇ ବଡ଼ ଖୁଲାସା କରିଛନ୍ତି। ତାଙ୍କୁ ଦଳରୁ ବାହାର କରିବା ଲାଗି ଆହତ ହେବାର ଗୁଜବ ସୃଷ୍ଟି କରାଯାଇଥିଲା ବୋଲି ସେ କହିଛନ୍ତି।
ଏକ ସାକ୍ଷାତକାରରେ ବରୁଣ କହିଛନ୍ତି, ବିଶ୍ୱକପ୍ ଶେଷ ହେବା ପରେ ମୋତେ ବଡ଼ ଧରଣର ଆଘାତ ଲାଗି ନ ଥିଲା। ତାହା ବହୁତ ସାମାନ୍ୟ ଥିଲା। ପୁଣିଥରେ ଖେଳିବା ଲାଗି ଫିଟ୍ ହେବାକୁ ମାତ୍ର ୨ ନଚେତ ୩ ସପ୍ତାହ ଲାଗିଥାନ୍ତା। ହେଲେ ତା ପରେ ମୋତେ ବାଦ୍ କରିଦିଆଯାଇଥିଲା। ଲୋକେ ବାହାନା କରିଥିଲେ ଯେ ମୁଁ ଆହତ ହୋଇଛି। ଏହା ଗୁଜବ ଥିଲା କି ଦଳରୁ ବାହାର କରିବାକୁ କେହି ମୋ ବିଷୟରେ ଏଭଳି ଅପପ୍ରଚାର କରୁଥିଲେ ଜଣାନାହିଁ ବୋଲି ସେ କହିଛନ୍ତି।
କହିରଖୁଛୁ, ଆଇପିଏଲ୍ ୨୦୨୦ ଏବଂ ୨୦୨୧ ସିଜନରେ ବରୁଣ କୋଲକାତା ପକ୍ଷରୁ ଜବରଦସ୍ତ ପ୍ରଦର୍ଶନ କରିଥିଲେ। ୨୦୨୦ରେ ସେ ୧୭ ଉଇକେଟ ନେଇଥିବା ବେଳେ ୨୦୨୧ରେ ୧୮ ଉଇକେଟ ନେଇଥିଲେ। କେବଳ ଏତିକି ନୁହେଁ ଆଇପିଏଲ୍ର ପୂର୍ବ ସିଜନରେ ସେ ୨୦ ଉଇକେଟ ନେଇଛନ୍ତି।
