ପାରଳାଖେମୁଣ୍ଡି, ୩ା୯ (ଡି.ଏନ୍.ଏ): ପର୍ଯ୍ୟଟକଙ୍କୁ ଆକୃଷ୍ଟ କରୁଛି ପ୍ରାକୃତିକ ସୌନ୍ଦର୍ଯ୍ୟଭରା ପର୍ଯ୍ୟଟନ ସ୍ଥଳୀ କିଚରଲିଙ୍ଗ। ପାହାଡ଼ ବକ୍ଷରେ ବୋହି ଯାଉଥିବା ଝରଣା ସହ ପ୍ରକୃତିର ମନଲୋଭା ସୃଷ୍ଟିର ଏଭଳି ଏକ ଆକର୍ଷଣୀୟ ସ୍ଥାନ ରହିଛି ଗଜପତି ଜିଲା ନୂଆଗଡ ବ୍ଲକ ସଦରମହକୁମା ଠାରୁ ମାତ୍ର ୫କିମି ଦୂରରେ। ପର୍ବତମାଳାର ପାଦଦେଶରେ କୁଳୁକୁଳୁ ନାଦରେ ବୋହିଯାଉଥିବା ଝରଣା, ଯାହା କିଛିଦୂରରେ ପୋଖରୀରେ ମିଶୁଥିବା ଦୃଶ୍ୟ ସୁଇମିଙ୍ଗ ପୋଲ୍ର ଭ୍ରମ ସୃଷ୍ଟି କରୁଛି। ଏଠାରେ ଥିବା କ୍ଷୁଦ୍ର ଜଳ ପ୍ରପାତରେ ଭିଜିବାର ମଜା ଖୁବ ନିଆରା। ପର୍ଯ୍ୟଟନର ବିକାଶ ଦୃଷ୍ଟିରୁ ଏହାର ଉନ୍ନତିକରଣ ଆବଶ୍ୟକ ବୋଲି କହିଛନ୍ତି ସ୍ଥାନୀୟ ବାସିନ୍ଦା ପୃଥିବୀରାଜ ପାଲ, ଇଫ୍ରିୟମ ପାଣି ପ୍ରମୁଖ।
ବର୍ଷା ଋତୁରେ ଝରଣାର ସ୍ରୋତ ପ୍ରଖର ରହୁଥିବାରୁ ପର୍ଯ୍ୟଟକଙ୍କୁ ବାରଣ କରାଯାଉଥିବା ବେଳେ ଶୀତ ଋତୁରେ ଏହା ଆକର୍ଷଣର କେନ୍ଦ୍ରବିନ୍ଦୁ ହୋଇଛି। ତେବେ ଏହି ସ୍ଥାନକୁ ଯିବା ନିମନ୍ତେ ରାସ୍ତା ନିର୍ମାଣ କାର୍ଯ୍ୟ ଜାରି ରହିଛି। ଝରଣା ମଧ୍ୟକୁ ପ୍ରବେଶ କରିବାକୁ ପାହାଚ ଓ ଅନ୍ୟାନ୍ୟ ସୁବିଧା ସୁଯୋଗ ସୃଷ୍ଟି କରିବା ପାଇଁ ବ୍ଲକ ପ୍ରଶାସନ ପକ୍ଷରୁ ପଦକ୍ଷେପ ନିଆଯାଉଛି। ଆସନ୍ତା ମାର୍ଚ୍ଚ ସୁଦ୍ଧା ରାସ୍ତା କାର୍ଯ୍ୟ ସଂପୂର୍ଣ୍ଣ ହେବ ବୋଲି କହିଛନ୍ତି ପଞ୍ଚାୟତ ନିର୍ବାହୀ ଅଧିକାରୀ ପି ଗୋପାଳ ରାଓ। ଆଗାମୀ ଦିନରେ ଅଧିକରୁ ଅଧିକ ପର୍ଯ୍ୟଟକ ଆସିବେ ବୋଲି ଆଶା କରାଯାଉଛି। ତେବେ ପ୍ରକୃତିର ଏହି ସୁନ୍ଦର ଅବଦାନକୁ ଆହୁରି ଆକର୍ଷଣ କରିବା ପାଇଁ ପର୍ଯ୍ୟାପ୍ତ ପରିମାଣର ଅନୁଦାନର ଆବଶ୍ୟକ ରହିଛି। ସେଥିପାଇଁ ବିଭାଗ ପକ୍ଷରୁ ସ୍ବତନ୍ତ୍ର ଦୃଷ୍ଟି ଦେବାକୁ ସ୍ଥାନୀୟ ବାସିନ୍ଦା ଦାବି କରିଛନ୍ତି।
