ବ୍ରହ୍ମପୁର ଅଫିସ,୧୦।୮: ବ୍ରହ୍ମପୁର ମହାନଗର ନିଗମ (ବିଏମ୍ସି) ପକ୍ଷରୁ ବ୍ରହ୍ମପୁର ସହରର ଖୋଲା ସ୍ଥାନଗୁଡିକରେ ଶିଶୁ ଉଦ୍ୟାନ ନିର୍ମାଣ କରାଯାଇଛି। ସହରରେ ଏଭଳି ଭାବେ ପ୍ରାୟ ୫୦ରୁ ଊର୍ଦ୍ଧ୍ୱ ଶିଶୁ ଉଦ୍ୟାନ ରହିଛି। ଯେଉଁ ଉଦ୍ୟାନଗୁଡିକରେ ଶିଶୁଙ୍କ ନିମନ୍ତେ ବିଭିନ୍ନ ଖେଳଣା ସରଞ୍ଜାମ ଉପଲବ୍ଧ ରହିଛି। ଏଥିସହ ପାର୍କ ମଧ୍ୟରେ ଚଲାପଥ ନିର୍ମାଣ କରାଯାଇଛି। ଯାହାଦ୍ୱାରା ସ୍ଥାନୀୟ ବାସିନ୍ଦାଙ୍କ ଆମୋଦ ପ୍ରମୋଦ ସାଙ୍ଗକୁ ଛୋଟ ଶିଶୁଙ୍କ କ୍ରୀଡା କ୍ଷେତ୍ରରେ ସହାୟକ ହୋଇପାରିବ। କିନ୍ତୁ ନିଗମ ପକ୍ଷରୁ ନିର୍ମାଣ କରାଯାଇଥିବା ଏହି ପାର୍କଗୁଡିକର ଠିକ୍ ରକ୍ଷଣାବେକ୍ଷଣ ହୋଇପାରୁ ନ ଥିବାରୁ ଉଦ୍ୟାନଗୁଡିକ ବର୍ତ୍ତମାନ ଅବହେଳିତ ଅବସ୍ଥାରେ ପଡି ରହିଛି। ପାର୍କରେ ଅନାବନା ଘାସ ଉଠିବାରୁ ପାର୍କଟି ବ୍ୟବହାର ଉପଯୋଗୀ ହୋଇପାରୁ ନାହିଁ।
ସୂଚନାଯୋଗ୍ୟ, ବିଏମ୍ସି ପକ୍ଷରୁ ମୁକ୍ତା ଯୋଜନାରେ ବହୁ ଉନ୍ନୟନମୂଳକ କାର୍ଯ୍ୟ ହେଉଛି। ଏହି ଯୋଜନାରେ ସ୍ବୟଂ ସହାୟକ ଗୋଷ୍ଠୀଙ୍କୁ କାର୍ଯ୍ୟ ପ୍ରଦାନ କରାଯାଇଛି। କିନ୍ତୁ ଅନେକ ସ୍ବୟଂ ସହାୟକ ଗୋଷ୍ଠୀ ଠିକ୍ ଭାବେ କାର୍ଯ୍ୟ କରୁ ନ ଥିବାରୁ ଉନ୍ନୟନମୂଳକ କାଯର୍ର୍ୟଗୁଡିକ ଠପ୍ ହୋଇ ପଡିଛି। ଫଳରେ ମୁକ୍ତା ଯୋଜନାରେ ଅନେକ ଉନ୍ନୟନମୂଳକ କାର୍ଯ୍ୟ ସଫଳ ହୋଇପାରୁ ନ ଥିବା ଅଭିଯୋଗ ହୋଇଛି। ଯାହାକୁ ନେଇ ସହରବାସୀଙ୍କ ମହଲରେ ଅସନ୍ତୋଷ ଦେଖାଦେଇଛି। ଏଭଳି ବିଏମ୍ସି ୪୧ ନଂ.ୱାର୍ଡ ଅନ୍ତର୍ଗତ ଅଲେଖ ନଗର ଦ୍ୱିତୀୟ ଲେନ୍ଠାରେ ଥିବା ଶିଶୁ ଉଦ୍ୟାନ ଏହାର ଜ୍ୱଳନ୍ତ ଉଦାହରଣ । ଉଦ୍ୟାନ ମଧ୍ୟରେ ଥିବା ଦୋଳି ଓ ଚେୟାର ଭାଙ୍ଗିରୁଜି ଯାଇଛି। ପାର୍କରେ କୌଣସି ରକ୍ଷଣାବେକ୍ଷଣ କରାଯାଉ ନ ଥିବାରୁ ବର୍ଷା ହେବା ଫଳରେ ପାର୍କ ପରିସର କାଦୁଅରେ ପରିପୂର୍ଣ୍ଣ ହୋଇଛି। ଏହି ଉଦ୍ୟାନଟି ବରିଷ୍ଠ ନାଗରିକ ଓ ଛୋଟ ଶିଶୁଙ୍କ ନିମନ୍ତେ ଅବସର ବିନୋଦନ ନିମନ୍ତେ ଏକମାତ୍ର ସାହାରା ଥିବା ବେଳେ ବର୍ତ୍ତମାନ ଏହା ଅବହେଳିତ ହୋଇ ପଡିଛି। ଅନ୍ୟପଟେ ବିଏମ୍ସି ପକ୍ଷରୁ ମୁକ୍ତା ଯୋଜନାରେ ପାର୍କର ଉନ୍ନତୀକରଣ ନିମନ୍ତେ ସ୍ବୟଂ ସହାୟକ ଗୋଷ୍ଠୀକୁ ହସ୍ତାନ୍ତର କରାଯାଇଥିଲା। କିନ୍ତୁ ଉକ୍ତ ସ୍ବୟଂ ସହାୟକ ଗୋଷ୍ଠୀ କୌଣସି କାର୍ଯ୍ୟ ନ କରିବାରୁ ବର୍ତ୍ତମାନ ପାର୍କଟି ଶୋଚନୀୟ ହୋଇ ପଡିଛି। ବର୍ତ୍ତମାନ ପୁଣି ଥରେ ୱାର୍କ ଅର୍ଡର କରାଯିବ। ଏହାପରେ ଅନ୍ୟ ଏକ ସ୍ବୟଂ ସହାୟକ ଗୋଷ୍ଠୀକୁ କାମ କରିବାକୁ କାର୍ଯ୍ୟାଦେଶ ଦିଆଯିବ ବୋଲି ଉକ୍ତ ୱାର୍ଡର କନିଷ୍ଠ ଯନ୍ତ୍ରୀ ଗଣେଶ ପାତ୍ର କହିଛନ୍ତି। ପାର୍କରେ ପ୍ଲଭର ବୋର୍ଡ, ଶିଶୁଙ୍କ ନିମନ୍ତେ ଅଧିକ କ୍ରୀଡା ସରଞ୍ଜାମ ଓ ଅନ୍ୟାନ୍ୟ ଭିତ୍ତିଭୂମିର ଉନ୍ନତୀକରଣ କରାଯିବ ବୋଲି ସେ କହିଛନ୍ତି। ଅନ୍ୟପଟେ ଉଦ୍ୟାନର ପୁନରୁଦ୍ଧାର ଓ ରକ୍ଷଣାବେକ୍ଷଣ ନିମନ୍ତେ ତୁରନ୍ତ ପଦକ୍ଷେପ ଗ୍ରହଣ କରିବା ପାଇଁ ମାନବ ଅଧିକାର ସୁରକ୍ଷା ମଞ୍ଚ ଦାବି କରିଛି। ଏହି ଉଦ୍ୟାନର ପୁନରୁଦ୍ଧାର କରାଗଲେ ବରିଷ୍ଠ ନାଗରିକ ସାଙ୍ଗକୁ ଛୋଟ ଶିଶୁମାନେ ମଧ୍ୟ ଉପକୃତ ହେବେ ବୋଲି ସ୍ଥାନୀୟ ବାସିନ୍ଦା ମତ ପ୍ରକାଶ କରିଛନ୍ତି।
