ହିଞ୍ଜିଳିକାଟୁ, ୫ା୧୦(ଡି.ଏନ୍.ଏ.): ଗଞ୍ଜାମ ଜିଲା ହିଞ୍ଜିଳିକାଟୁ ଥାନା ଗୋଦରାପଲ୍ଲୀର ଜଣେ ବ୍ୟକ୍ତିଙ୍କୁ ମଙ୍ଗଳବାର ପିଟି ହତ୍ୟା କରାଯାଇଛି। ପରେ ମୃତଦେହ କେନାଲକୁ ଫିଙ୍ଗି ଦିଆଯାଇଛି। ମୃତକ ହେଲେ ପି. ଧର୍ମରାଓ (୬୦)। ପୂର୍ବ ଶତ୍ରୁତାକୁ କେନ୍ଦ୍ର କରି ତାଙ୍କୁ ହତ୍ୟା କରାଯାଇଥିବା ପୋଲିସର ପ୍ରାଥମିକ ତଦନ୍ତରୁ ଜଣାପଡ଼ିଛି।
ସୂଚନାନୁସାରେ, ଧର୍ମରାଓଙ୍କର ତାଙ୍କ ଗ୍ରାମର ଏକ ପରିବାର ସହ କୌଣସି କାରଣକୁ ନେଇ ଶତ୍ରୁତା ଲାଗି ରହିଥିଲା। ମଙ୍ଗଳବାର ସମ୍ପୃକ୍ତ ପରିବାରର ବାପ ପୁଅ ମିଶି ଧର୍ମରାଓଙ୍କୁ ଗାଁରୁ ବଳପୂର୍ବକ ଏକ ଅଟୋରେ ନେଇଯାଇଥିଲେ। ଗ୍ରାମଠାରୁ କିଛି ଦୂର ମୋହନାପଳ୍ଲୀ ଋଷିକୂଲ୍ୟା ନଦୀର ୯ନଂ. କେନାଲ ନିକଟରେ ଉଭୟେ ଧର୍ମଙ୍କୁ ନିସ୍ତୁକ ପିଟି ତାଙ୍କୁ କେନାଲକୁ ଫିଙ୍ଗି ଦେଇଥିଲେ। ସେ ସମୟରେ ପାଖାପାଖି ଅଞ୍ଚଳର କେତେଜଣ ଲୋକ ଏହା ଦେଖିବାରୁ ଅଭିଯୁକ୍ତ ବାପ, ପୁଅ ଫେରାର୍ ଅଛନ୍ତି। ଖବରପାଇ ହିଞ୍ଜିଳିକାଟୁ ଥାନା ଏସ୍ଆଇ ବାସୁଦେବ ଭୋଇ ଓ ଟିମ ସେଠାରେ ପହଞ୍ଚିଥିଲେ। ସ୍ଥାନୀୟ ଦମକଳ ବାହିନୀ ସହାୟତାରେ କେନାଲରୁ ଧର୍ମରାଓଙ୍କ ମୃତହେଦ ଜବତ କରାଯାଇଥିଲା। ଆସିକା ଏସ୍ଡିପିଓ ଉମା ଶଙ୍କର ସିଂ, ପାଟପୁର ଓ ଶେରଗଡ଼ ଥାନା ପୋଲିସ ପହଞ୍ଚି ପହଞ୍ଚି ତଦନ୍ତ କରିଥିଲେ। ପୋଲିସ କେତେଜଣ ପ୍ରତ୍ୟକ୍ଷଦର୍ଶୀଙ୍କ ବୟାନ ରେକର୍ଡ଼ କରିଛି। ସାଇଣ୍ଟିଫିକ ଟିମ୍ ମଧ୍ୟ ତଦନ୍ତ କରିଛି। ମୃତଦେହ ବ୍ୟବଚ୍ଛେଦ ନିମନ୍ତେ ବ୍ରହ୍ମପୁର ବଡ଼ ମେଡିକାଲ ପଠାଯାଇଛି। ଏ ନେଇ ମୃତକଙ୍କ ପୁତୁରାଙ୍କ ଅଭିଯୋଗକ୍ରମେ ହିଞ୍ଜିଳିକାଟୁ ଥାନାରେ ନଂ.୫୨୭/୨୧ରେ ଏକ ହତ୍ୟା ମାମଲା ରୁଜୁ କରାଯାଇଛି।
