ଭବାନୀପାଟଣା,୨୧।୮(ଉତ୍ତମ କୁମାର ଦାଶ): କଳାହାଣ୍ଡି ଜିଲା ଜୁନାଗଡ଼ ବ୍ଲକ ଡୁମେରବାହାଲ ଗାଁର ବସ୍ତିପଡ଼ାରେ କଲବଲ କରୁଛି କିଡ୍ନୀ ରୋଗ। ଏହି ଗାଁରେ ଚଳିତବର୍ଷ କିଡ୍ନୀ ରୋଗର ୩ଜଣଙ୍କ ମୃତ୍ୟୁ ହୋଇଥିବା ବେଳେ ଏବେବି ୧୬ଜଣ ଲୋକ ଚିକିତ୍ସିତ ହେଉଛନ୍ତି। ସତେ ଯେମିତି ଏମାନଙ୍କୁ ମଧ୍ୟ ମୃତ୍ୟୁର ଫାସ ଜଗି ବସିଛି କିଡ୍ନୀ ରୋଗ। ଅନେକ ଲୋକ ଏହି ରୋଗ ପାଇଁ ସଞ୍ଚତ୍ତ ଟଙ୍କା ଖର୍ଚ୍ଚ କରିଥିବା ବେଳେ ଜମିବାଡ଼ି ମଧ୍ୟ ବିକ୍ରି କରି ଚିକିତ୍ସିତ ହେଉଛନ୍ତି। ଅନ୍ୟପକ୍ଷରେ କିଛି ଲୋକଙ୍କ ହାତରେ ଟଙ୍କା ନ ଥିବା ଯୋଗୁ ଚିକିତ୍ସିତ ନ ହୋଇ ଜୀବନ ମୃତ୍ୟୁ ସହିତ ସଂଗ୍ରାମ କରି ଘରେ ପଡିଥିବା ବେଳେ କିଛି ଲୋକ ଚେରିମୂଲି ଭରସାରେ ଅଛନ୍ତି। ପ୍ରକାଶ ଯେ, ଡୁମେରବାହାଲ ଗାଁର ବସ୍ତିପଡାରେ ୫୦୦ରୁ ଊଦ୍ଧର୍ବ ଲୋକ ବାସ କରୁଥିବା ବେଳେ ୫ଟି ନଳକୂପ ରହିଛି। ୨ଟି ନଳକୂପରେ ଲୁହାଗୁଣ୍ଡ, ମାଟି ଗୁଣ୍ଡ ବାହାରୁଥିବା ଗ୍ରାମବାସୀ ଅଭିଯୋଗ କରିଛନ୍ତି। ଅନ୍ୟପକ୍ଷରେ ପିଇବା ପାଣି ନା ଖାଦ୍ୟପେୟ ଯୋଗୁ କିଡ୍ନୀ ରୋଗ ବ୍ୟାପିଛି ତାହା ଜଣାପଡୁନାହିଁ। ଆଜି ବି ଲୋକଙ୍କୁ ପରୀକ୍ଷା କଲେ ଅନେକ ଲୋକ କିଡ୍ନୀ ରୋଗ ଆକ୍ରାନ୍ତ ଥିବା ଜଣାପଡିବ ବୋଲି ଗ୍ରାମବାସୀ କହିଛନ୍ତି। ଜିଲା, ବ୍ଲକ ପ୍ରଶାସନ, ରାଜନେତାଠାରୁ ଅନେକ ଲୋକଙ୍କୁ ଏ ନେଇ ଅବଗତ କଲେ ମଧ୍ୟ କୌଣସି ସୁବିଧା ମିଳୁ ନ ଥିବା ନେଇ ଗ୍ରାମବାସୀ ଅଭିଯୋଗ କରିଛନ୍ତି। ଗ୍ରାମବାସୀଙ୍କ ପାଇଁ ବସୁଧା ଯୋଜନା ଫେଲ ମାରିଛି। ଗୋଟିଏ ସୋଲାର ପମ୍ପ ଲାଗିଥିଲା, ତାହା ବର୍ଷେ ହେବ ଅଚଳ ହୋଇ ପଡ଼ିଛି। ଅନ୍ୟ କୌଣସି ସୁବିଧା ନ ଥିବା ଯୋଗୁ ଲୋକେ ବାଧ୍ୟ ହୋଇ ନଳକୂପର ପାଣି ପିଉଛନ୍ତି। ଗତ ଜାନୁୟାରୀରେ ଜୟସିଂ ମାଝିଙ୍କ ମୃତ୍ୟୁ ହୋଇଥିବା ବେଳେ ଗତ ଜୁନରେ ଧ୍ୱଜ କାଣ୍ଡଙ୍କ ମୃତ୍ୟୁ ହୋଇଥିଲା। ଗତ ୯ ତାରିଖ (ମଙ୍ଗଳବାର) କୁମୁଦ କାଣ୍ଡଙ୍କ ଜୀବନ ନେଇଛି କିଡ୍ନୀ ରୋଗ। ବର୍ତ୍ତମାନ ଏହି ଗାଁର ଗୋଟିଏ ପରିବାରର ୨ଜଣଙ୍କ ମୃତ୍ୟୁ ହୋଇଥିବା ବେଳେ ୫ଜଣ ଏବେବି ଆକ୍ରାନ୍ତ ହୋଇଛି ଚିକିତ୍ସିତ ହେଉଛନ୍ତି। ଡୁମେରବାହାଲ ଗାଁରେ କିଡନୀ ରୋଗ ମୃତ୍ୟୁର ଫାସ ପକାଇଥିବା ବେଳେ ଆଉ କେତେ ମୁଣ୍ଡ ଗଡ଼ିଲେ ପ୍ରଶାସନ ଓ ରାଜନେତା ଚେଇଁବ। ପ୍ରଶାସନ ଓ ସାସ୍ଥ୍ୟ ବିଭାଗ କିଡ୍ନୀ ରୋଗ ବ୍ୟାପିବାର ନିରାକରଣ ନ କଲେ ଏହି ରୋଗ ଆହୁରି ଅନେକ ଲୋକଙ୍କ ଜିବନ ନେବା ସହ ଅନେକ ଲୋକ ରୋଗାକ୍ରାନ୍ତ ହେବେ ବୋଲି ଗ୍ରାମବାସୀ ଦାବି କହିଛନ୍ତି।
