ଚଣ୍ଡିଖୋଲ,୨୦ା୫(ଡି.ଏନ.ଏ.): ଯାଜପୁର ଜିଲା ଦର୍ପଣ ତହସିଲ ଅନ୍ତର୍ଗତ ବନ୍ଦରେଶ୍ୱର ରାଜସ୍ବ ନିରୀକ୍ଷକ ସୋମନାଥ ସାମଲଙ୍କୁ ଅପହରଣ କରାଯିବା ସହ ମାଡ଼ ମରାଯାଇଛି। ଏହି ଅଭିଯୋଗରେ ବାଲିଚନ୍ଦ୍ରପୁର ପୋଲିସ ବରଦା ଗ୍ରାମର ଅନନ୍ତ ନାରାୟଣ ଧଳଙ୍କୁ ଅଟକ ରଖିଛି।
ପୋଲିସ ସୂଚନା ମୁତାବକ, ରାଜସ୍ବ ନିରୀକ୍ଷକ ସାମଲ ଗୁରୁବାର ବନ୍ଦରେଶ୍ୱରସ୍ଥିତ ତାଙ୍କ କାର୍ଯ୍ୟାଳୟରେ କାର୍ଯ୍ୟ କରୁଥିବା ସମୟରେ ଅନନ୍ତଙ୍କ ନେତୃତ୍ୱରେ ୫ଜଣ ଯୁବକ ହଠାତ୍ ସେଠାରେ ପହଞ୍ଚି ଲିଗାଲହେୟାର ସାର୍ଟିଫିକେଟରେ ତଦନ୍ତ ରିପୋର୍ଟ ହେରଫେର ପାଇଁ ଧମକ ଦେଇଥିଲେ। ଏଥିରେ ସୋମନାଥ ରାଜି ନ ହେବାରୁ ସେମାନେ ତାଙ୍କୁ ଜୋରଜବରଦସ୍ତ ଏକ ଗାଡ଼ିରେ ଅପହରଣ କରିନେଇଥିଲେ। ସେଠାରେ ତାଙ୍କୁ ବନ୍ଧୁକ ଦେଖାଇ ଧମକ ଚମକ ଦେବା ସହ ମାଡ଼ ମଧ୍ୟ ମାରିଥିଲେ।
ଏନେଇ ରାଜସ୍ବ ନିରୀକ୍ଷକ ଦର୍ପଣ ତହସିଲଦାର ପ୍ରଦୀପ କୁମାର ସେଠୀଙ୍କୁ ଜଣାଇଥିଲେ। ତହସିଲଦାର ଘଟଣା ସମ୍ପର୍କରେ ବାଲିଚନ୍ଦ୍ରପୁର ଥାନାଧିକାରୀଙ୍କୁ ଜଣାଇଥିଲେ। ପୋଲିସ ତରଫରୁ ଯୋଗାଯୋଗ କରାଯିବା ପରେ ସେମାନେ ରାଜସ୍ବ ନିରୀକ୍ଷକଙ୍କୁ ଛାଡ଼ି ଦେଇଥିଲେ। ଏନେଇ ରାଜସ୍ବ ନିରୀକ୍ଷକଙ୍କ ଏତଲାକ୍ରମେ ପୋଲିସ ବିକ୍ରମତିରଣ ଗ୍ରାମରେ ଚଢ଼ାଉ କରି ଅନନ୍ତଙ୍କୁ କାବୁ କରିଥିଲା। ସୂଚନାଥାଉକି, ପୂର୍ବରୁ ବାଲିଚନ୍ଦ୍ରପୁର ଥାନା ଅନ୍ତର୍ଗତ ଭରତପୁରଠାରେ ୨ଟି ପୋଲିସ ଗାଡ଼ି ପୋଡ଼ି ଘଟଣା ଓ ଗଣ୍ଡଗୋଳରେ ଅନନ୍ତଙ୍କ ସମ୍ପୃକ୍ତି ରହିଥିଲା। ଏହାସହ ଅନନ୍ତଙ୍କ ନାମରେ ବାଲିଚନ୍ଦ୍ରପୁର ଥାନାରେ ଏକାଧିକ ମାମଲା ରହିଛି। ବିଭିନ୍ନ ଆପରାଧିକ ମାମଲାରେ ଜଡିତ ଥିବାରୁ ଅତିରିକ୍ତ ଜିଲାପାଳଙ୍କ କୋର୍ଟରେ ପୋଲିସ ପକ୍ଷରୁ ତାଙ୍କ ନାମରେ ୧୧୦ ସିଆରପିସିରେ ମାମଲା ମଧ୍ୟ ରୁଜୁ କରାଯାଇଥିଲା।
