ହାଟଡିହୀ/ଛେନାପଦୀ,୯।୫ (ଶୁଭକାନ୍ତ ନାୟକ/ନିରାକାର ପରିଡା): ବାକି ଟଙ୍କା ଆଦାୟ କରିବାକୁ ଯାଇ ଜଣେ ବ୍ୟବସାୟୀ ଅପହରଣର ଶିକାର ହୋଇଛନ୍ତି। କେନ୍ଦୁଝରରୁ ଅପହରଣ କରି କଟକ ଅଭିମୁଖେ ନେଇ ଯାଉଥିବା ବେଳେ ଆନନ୍ଦପୁର ପୋଲିସ ଚଢ଼ାଉ କରି ଅପହୃତ ବ୍ୟକ୍ତିଙ୍କୁ ଉଦ୍ଧାର କରିବା ସହ ଦୁଇ ଜଣ ଅଭିଯୁକ୍ତଙ୍କୁ ଗିରଫ କରିଛି।
ସୂଚନା ଅନୁଯାୟୀ, ଗୁଜୁରାଟର ଲୁନାଗରିଆ ଜମନ ଭାଇ (୪୭) ନାମକ ଜଣେ ବ୍ୟକ୍ତି ଗତ ଶନିବାର ବାକି ଥିବା ୯ ଲକ୍ଷ ଟଙ୍କା ଆଦାୟ କରିବା ପାଇଁ କେନ୍ଦୁଝର ଆସିଥିଲେ। ସେଠାରେ ଅଭିଯୁକ୍ତ ବଜରଙ୍ଗ ଲାଲ ଟଙ୍କା ଦେବା ପରିବର୍ତ୍ତେ ଜମନଙ୍କୁ ନିଜ ଘରେ ବନ୍ଦୀ କରି ରଖିଥିଲେ। କେବଳ ସେତିକି ନୁହେଁ, ତାଙ୍କୁ ନିର୍ମମ ଭାବେ ମାଡ଼ ମାରିବା ସହ ହତ୍ୟା ଧମକ ଦେଇ ବଳପୂର୍ବକ ୧୪ ଲକ୍ଷ ୫୦ ହଜାର ଟଙ୍କା ଛଡ଼ାଇ ନେଇଥିଲେ। ଏପରିକି ଆହୁରି ୩୩ ଲକ୍ଷ ଟଙ୍କା ନଦେଲେ ଜୀବନରୁ ମାରିଦେବାକୁ ଅଭିଯୁକ୍ତ ବଜରଙ୍ଗ ଧମକ ଦେଇଥିବା ଅଭିଯୋଗ ହୋଇଛି।
ଅଭିଯୁକ୍ତ ଜମନଙ୍କୁ ଅପହରଣ କରି ଏକ ଧଳା ରଙ୍ଗର ଏକ୍ସୟୁଭି (OD ୨୨Y ୪୯୯୯) କାର୍ ଯୋଗେ କଟକ ନେଇ ଯାଉଥିଲା। ଏନେଇ ଖବର ପାଇବା ପରେ ଆନନ୍ଦପୁର ଉପଖଣ୍ଡ ଏସ୍ଡିପିଓ କମଳ କୁମାର ପଣ୍ଡାଙ୍କ ନେତୃତ୍ୱରେ ପୋଲିସ ଫୋର୍ସ ଶାଳପଡ଼ା ପୋଲ ନିକଟରେ ଜୋରଦାର ଚେକିଂ ଆରମ୍ଭ କରିଥିଲେ। ରାତି ପ୍ରାୟ ୯.୩୦ ସମୟରେ ଉକ୍ତ ଗାଡ଼ିଟିକୁ ଅଟକାଇ ଯାଞ୍ଚ କରିବା ପରେ ସେଥିରୁ ଜମନଙ୍କୁ ସୁରକ୍ଷିତ ଭାବେ ଉଦ୍ଧାର କରାଯାଇଥିଲା।
ଜମନଙ୍କ ଲିଖିତ ଅଭିଯୋଗ ଆଧାରରେ ଘସିପୁରା ଥାନାରେ କେସ ନଂ ୨୧୨/୨୦୨୬ ଏବଂ ବିଏନ୍ଏସ୍ର ବିଭିନ୍ନ ସଙ୍ଗୀନ ଦଫାରେ ମାମଲା ରୁଜୁ ହୋଇଛି। ପୋଲିସ ମୁଖ୍ୟ ଅଭିଯୁକ୍ତ ବଜରଙ୍ଗ ଲାଲ ଏବଂ ଗାଡ଼ି ଚାଳକ ମୁନିରାମଙ୍କୁ ଗିରଫ କରିଛି। ଗିରଫ ବଜରଙ୍ଗ ଲାଲଙ୍କ ପ୍ରକୃତ ଘର ରାଜସ୍ଥାନରେ। ସେ କେନ୍ଦୁଝରରେ “ମହାଲକ୍ଷ୍ମୀ ସାନିଟାରୀ ଏଣ୍ଡ ଟାଇଲ୍ସ” ନାମରେ ଏକ ଦୋକାନ କରି ବ୍ୟବସାୟ କରୁଥିଲେ ବୋଲି ଏସ୍ଡିପିଓ ଶ୍ରୀ ପଣ୍ଡା ସୂଚନା ଦେଇଛନ୍ତି। ଏହି ସଫଳ ଅପରେସନରେ ବିଭିନ୍ନ ଥାନାର ଅଧିକାରୀ ଓ ରାତ୍ରୀକାଳୀନ ପାଟ୍ରୋଲିଂ କର୍ମଚାରୀ ସାମିଲ ଥିଲେ।