ଖୋର୍ଦ୍ଧା ଅଫିସ, ୩।୮ଖୋର୍ଦ୍ଧା ଜିଲାରେ ପ୍ରାୟ ଦୁଇମାସ ହେଲା ବର୍ଷା ନାହିଁ। ଚାଷଜମି ଫାଟି ଆଁ କଲାଣି। ଏଥର ଖରିଫ ଚାଷ ବାଟ ହୁଡ଼ିପାରେ ବୋଲି ଆଶଙ୍କା ସୃଷ୍ଟି ହେଲାଣି। ତେଣୁ ଚାଷୀ ଚିନ୍ତାରେ ପଡ଼ିଛନ୍ତି।
ପାଣିପାଗ ବିଭାଗ ସୂଚନା ଅନୁଯାୟୀ, ଜୁନ ପହିଲାରୁ ଜୁଲାଇ ଶେଷ ସପ୍ତାହ ପର୍ଯ୍ୟନ୍ତ ସ୍ବାଭାବିକଠାରୁ କମ୍ ପରିମାଣର ବର୍ଷା ହୋଇଛି। ଏହି ସମୟରେ ଖୋର୍ଦ୍ଧା ଜିଲାରେ ୪୬ ପ୍ରତିଶତ କମ୍ ବର୍ଷା ହୋଇଛି। ପରିବେଶବିତ୍ ଧନେଶ୍ୱର ବିଧାର କହିଛନ୍ତି, ଯଦି ସପ୍ତାହକ ମଧ୍ୟରେ ବର୍ଷା ନ ହୁଏ ତାହାହେଲେ ମରୁଡ଼ି ଆଶଙ୍କାକୁ ଏଡ଼ାଇ ଦିଆଯାଇ ନ ପାରେ। ଏପରି କି ଖରିଫ ଧାନ ଚାଷ ଲକ୍ଷ୍ୟ ଧାର୍ଯ୍ୟ ବାଟବଣା ହୋଇପାରେ। ତେବେ ଲଘୁଚାପ ବର୍ଷା ସମ୍ଭାବନା ଚାଷୀଙ୍କ ମନରେ ଆଶା ଆଣିଛି। ଅନ୍ୟପକ୍ଷରେ କରୋନା ଲକ୍ଡାଉନ ବେଳେ ପରିବା ଚାଷୀମାନେ ଲକ୍ଷାଧିକ ଟଙ୍କାର କ୍ଷତି ସହିଥିଲେ। ହାଟ ବଜାର ଓ ଗାଡ଼ି ଚଳାଚଳ ବନ୍ଦ ଯୋଗୁ ପନିପରିବା ବିକ୍ରି ହୋଇ ନ ପାରି ବିଲରେ ପଚି ଶଢିଥିଲା। ଏବେ ପୁଣି ଧାରକରଜ କରି ଧାନଚାଷ କରିଥିବା ଲୋକଙ୍କୁ ପରିବାର ଚଳାଇବା ଓ ଋଣ ଶୁଝିବା ଚିନ୍ତା ଘାରିଲାଣି। ଏଭଳି ସମୟରେ ରାଜ୍ୟ ସରକାର କାଳିଆ ଟଙ୍କା ଫେରସ୍ତ ଲାଗି ନୋଟିସ ଜାରିି କରିବାକୁ ଭାଜପା ନେତା ନିକୁଞ୍ଜ ପଟ୍ଟନାୟକ ସମାଲୋଚନା କରିଛନ୍ତି। ଚାଷୀଙ୍କ ବିକାଶ ଲାଗି କହୁଥିବା ସରକାର ଏବେ ଚାଷୀଙ୍କଠାରୁ ମୁହଁ ଫେରାଇ ନେଉଛନ୍ତି ବୋଲି ସେ ଅଭିଯୋଗ ଆଣିଛନ୍ତି। ଖୋର୍ଦ୍ଧା ଜିଲାରେ ଖରିଫ ଚାଷ ପ୍ରତି ବିଭାଗୀୟ କର୍ତ୍ତୃପକ୍ଷ ଏବଂ ସରକାର ସ୍ବତନ୍ତ୍ର ଦୃଷ୍ଟି ଦେବାକୁ ସେ ଦାବି କରିଛନ୍ତି।
ଏ ନେଇ ଜିଲା କୃଷି ଅଧିକାରୀ ଭାସ୍କର ବାରିକ କହିଛନ୍ତି, ଖରିଫ ଧାନ ଚାଷ ଲାଗି ଠିକ୍ ସମୟରେ ବିହନ, ସାର, କୀଟନାଶକ ଆଦି ଚାଷୀଙ୍କୁ ଯୋଗାଇବାର ବ୍ୟବସ୍ଥା କରାଯାଇଛି। ସୁଲଭ ମୂଲ୍ୟରେ କୃଷି ଯନ୍ତ୍ରପାତି ଯୋଗାଇ ଦେବାକୁ ଯୋଜନା ରହିଛି। ପ୍ରାକୃତିକ ଦୁର୍ବିପାକ ସମୟରେ ଫସଲ କ୍ଷତି ଲାଗି ପ୍ରଧାନମନ୍ତ୍ରୀ ଫସଲ ବୀମା ଯୋଜନା (ପିଏମ୍ଏଫ୍ବିୱାଇ)ରେ ଜିଲାରେ ୬୭ହଜାର ଚାଷୀଙ୍କୁ ଅନ୍ତର୍ଭୁକ୍ତ କରାଯିବା ଯୋଜନା ରହିଛି। ଚଳିତବର୍ଷ ଜିଲାରେ ୨୩୦ ହେକ୍ଟର ଜମିରେ ଧନିଚା ଏବଂ ରାଜ୍ୟ ଯୋଜନାରେ ୬ଶହ ହେକ୍ଟର ଜମିରେ ଧାଡ଼ିରୁଆ ଧାନଚାଷ ଉପରେ ସରକାର ଗୁରୁତ୍ୱ ଦେଇଛନ୍ତି। ୨୦୨୦-୨୧ ବର୍ଷରେ ୪୦ ପ୍ରତିଶତ ହେକ୍ଟର ଜମିରେ ମିଶ୍ରିତ ଚାଷ ଏବଂ ୪୨.୨୭ ହେକ୍ଟର ଜମିରେ ଧାନ ଏବଂ ଅଣଧାନ ଅମଳ ଯୋଜନା ରହିଛି। ଏଥିଲାଗି ଜଳନିଧି ଓ ସୌର ପ୍ରକଳ୍ପ ଯୋଜନା ଉପରେ ଗୁରୁତ୍ୱ ଦିଆଯାଇଛି।
