ଭୁବନେଶ୍ୱର,୧୫।୩(ବ୍ୟୁରୋ): ଖଦିକୁ ଆହୁରି ଲୋକାଭିମୁଖୀ କରିବାର ଆବଶ୍ୟକତା ରହିଛି। ଏଥିପାଇଁ ଗ୍ରାମ୍ୟ ଶିଳ୍ପଗୁଡ଼ିକରେ ଅଧିକରୁ ଅଧିକ ଯୁବତୀଯୁବକଙ୍କୁ ସାମିଲ କରିପାରିଲେ ସେମାନେ ସ୍ବାବଲମ୍ବୀ ହେବା ସହ ଖଦିର ଉନ୍ନତି ହୋଇପାରିବ ବୋଲି ଶକ୍ତି, ଶିଳ୍ପ ଏବଂ ଅଣୁ, କ୍ଷୁଦ୍ର ଓ ମଧ୍ୟମ ଉଦ୍ୟୋଗ ବିଭାଗ ମନ୍ତ୍ରୀ ପ୍ରତାପ କେଶରୀ ଦେବ କହିଛନ୍ତି। ଖଦି ଓ ଗ୍ରାମୋଦ୍ୟୋଗ ବୋର୍ଡ ପକ୍ଷରୁ ମଙ୍ଗଳବାର ଖାରବେଳନଗରସ୍ଥିତ କାର୍ଯ୍ୟାଳୟ ପରିସରରେ ‘ଓଡ଼ିଶା ଖଦି ମେଳା ୨୦୨୩’କୁ ଉଦ୍ଘାଟନ କରି ମନ୍ତ୍ରୀ ଏହା କହିଛନ୍ତି। ସମ୍ମାନିତ ଅତିଥି ଭାବେ ବିଧାୟକ ଅନନ୍ତ ନାରାୟଣ ଜେନା ଯୋଗଦେଇ କହିଲେ, ବୋର୍ଡ ପରିସରରେ ଏକ ବହୁତଳ ବିଶିଷ୍ଟ ଭବନ ନିର୍ମାଣ ପାଇଁ ରାଜ୍ୟ ସରକାର ବିଚାର କରୁଛନ୍ତି। ଖଦି ବୋର୍ଡକୁ ୫ ମହଲା ମିଳିବାର ବ୍ୟବସ୍ଥା ରହିଛି ବୋଲି ବିଧାୟକ ଜେନା ସୂଚନା ଦେଇଛନ୍ତି। ବୋର୍ଡ ସଭାପତି ସଂଗ୍ରାମ କେଶରୀ ପାଇକରାୟ ସଭାପତିତ୍ୱ କରି ବୋର୍ଡ ପରିସରରେ ହେବାକୁ ଥିବା ଉତ୍କଳ ଖଦି ଭବନ ନିମନ୍ତେ ସରକାରୀ ସ୍ବୀକୃତିକୁ ତ୍ୱରାନ୍ବିତ କରିବାକୁ ମୁଖ୍ୟମନ୍ତ୍ରୀଙ୍କୁ ଅନୁରୋଧ କରିଥିଲେ। ଡ. ଦେବେନ୍ଦ୍ର କୁମାର ମାନସିଂହ, ଅଜୟ ନାୟକ, ସମୀର ସାମନ୍ତରାୟ, ସଦାଶିବ ଜେନା, ସଞ୍ଜୟ କୁମାର ମିଶ୍ର ଓ ଚନ୍ଦ୍ରହାସ ନାୟକ ପ୍ରମୁଖ ଉପସ୍ଥିତ ଥିଲେ। ସଚିବ ସୁଦାମ ଚରଣ ମଣ୍ଡଳ ଧନ୍ୟବାଦ ଦେଇଥିବାବେଳେ ଡ. ଶ୍ରୀନିବାସ ଘଟୁଆରୀ ସଭାକାର୍ଯ୍ୟ ପରିଚାଳନା କରିଥିଲେ।
ଚଳିତବର୍ଷ ମେଳାରେ ୬୫ଟି ଷ୍ଟଲ୍ ରହିଥିବାଳେ ବିଭିନ୍ନ ରାଜ୍ୟର ବ୍ୟବସାୟୀମାନେ ଖଦିରେ ପ୍ରସ୍ତୁତ ବିଭିନ୍ନ ବସ୍ତ୍ର ଓ ସାମଗ୍ରୀ ବିକ୍ରି କରୁଛନ୍ତି। କଟନ୍, ସିଲ୍କ ଓ ମସଲିନ୍ ଶାଢି ସହ ଜିଲା ସ୍ତରରୁ ଗ୍ରାମୋଦ୍ୟୋଗ ସମ୍ଭାର ଦେଖିବାକୁ ମିଳୁଛି। ଏଥିସହ ବିଭିନ୍ନ ଖଦି ଓ ଗ୍ରାମୋଦ୍ୟୋଗ ସାମଗ୍ରୀ ଯଥା ଘଣା, ପେଡ଼ା, ସୋରିଷ ତେଲ, ମହୁ, କନ୍ଧମାଳ ହଳଦୀ, ମସଲା, ଆଚାର, ଧୂପକାଠି, ଚାନ୍ଦୁଆ, ଶାଢ଼ି, ଗାମୁଛା, ପଞ୍ଜାବି, ଶାର୍ଟ ଆଦି ସାମଗ୍ରୀ ଉପଲବ୍ଧ ହେଉଛି। ଆଉ କେତେକ ଷ୍ଟଲ୍ରେ ଅରଟ ଓ ମେଶିନରେ କିଭଳି ସୂତା କଟା ହୁଏ ଏବଂ ତନ୍ତରେ ବୁଣା ହେଉଥିବା ଲୁଗାକୁ ଆଖି ସାମ୍ନାରେ ଦର୍ଶକ ଦେଖିବାକୁ ପାଉଛନ୍ତି। ଲୋକେ ମେଳା ବୁଲା ସହ କିଣାକିଣି କରୁଥିବାବେଳେ ମନୋରଞ୍ଜନ ପାଇଁ ସାଂସ୍କୃତିକ କାର୍ଯ୍ୟକ୍ରମ ଓ ଫୁଡ୍ ଷ୍ଟଲ୍ରେ ବିଭିନ୍ନ ସ୍ବାଦିଷ୍ଟ ଖାଦ୍ୟର ମଜା ଉଠାଇବାର ସୁଯୋଗ ରହିଛି। ତେବେ ପ୍ରଥମ ସାଂସ୍କୃତିକ ସନ୍ଧ୍ୟାରେ ନିରଞ୍ଜନ ସାହୁଙ୍କ ଦ୍ୱାରା ଯୋଡ଼ି ଶଙ୍ଖ ବାଦ୍ୟ, ଗୁରୁ ନିରଞ୍ଜନ ରାଉତଙ୍କ ଦଳ ଦ୍ୱାରା ଆମ ଓଡ଼ିଶା ଓ ଶାଶ୍ୱତ ଜୋଷୀ ଏବଂ ସାଥୀଙ୍କ ଦ୍ୱାରା ଫ୍ୟୁଜନ ନୃତ୍ୟ ବେଶ୍ ମନୋରଞ୍ଜନ ଯୋଗାଇଥିଲା। ଏହି ମେଳି ୧୦ଦିନ ଧରି ଅପରାହ୍ନ ୩ଟାରୁ ୯ଟା ପର୍ଯ୍ୟନ୍ତ ଚାଲିବ।
