ବ୍ରହ୍ମପୁର ଅଫିସ,୨୮ା୨: ଚଳିତ ବର୍ଷ ବ୍ରହ୍ମପୁର ସହରରେ ମହାଶିବରାତ୍ରି ପାଳନକୁ ନେଇ ରେଶମ ନଗରବାସୀଙ୍କ ମଧ୍ୟରେ ଉତ୍ସାହ ରହିଥିବା ଦେଖିବାକୁ ମିଳିଛି। ଏବେ କେତକୀ ଫୁଲ ଚାହିଦା ବୃଦ୍ଧି ପାଇଛି। ପୂର୍ବ ବର୍ଷ ଭଳି ଚଳିତ ବର୍ଷ ବ୍ରହ୍ମପୁର ସହରରେ କେତକୀ ଫୁଲ ବ୍ରିକି ଆରମ୍ଭ ହୋଇଛି। ହିନ୍ଦୁ ବିଶ୍ୱାସ ଅନୁସାରେ, ଅଭିଶାପ ହେତୁ ଭଗବାନଙ୍କ ପୂଜାରୁ ବର୍ଜିତ ହୋଇଥିବା କେତକୀ ଫୁଲ କେବଳ ମହାଶିବରାତ୍ରି ଅବସରରେ ମହାଦେବଙ୍କୁ ଲାଗି କରାଯାଇଥାଏ। ରାତିରେ ମହାଦେବଙ୍କୁ ଦୀପଦାନ ସହ କେତକୀ ଫୁଲ ଚଢ଼ାଇବା ଦ୍ୱାରା ସେମାନଙ୍କ ମନସ୍କାମନା ପୂର୍ଣ୍ଣ ହୋଇଥାଏ। ଏଣୁ ଭକ୍ତଙ୍କ ମଧ୍ୟରେ କେତକୀ ଫୁଲର ଚାହିଦା ଏହି ଦିନ ଅଧିକ ରହିଥାଏ। ପ୍ରତିବର୍ଷ ଭଳି ଚଳିତ ବର୍ଷ ମଧ୍ୟ ବ୍ରହ୍ମପୁର ସହରର ଗିରି ମାର୍କେଟ, ଏସ୍ଏନ୍ଟି ରୋଡ୍, ବଡ଼ବଜାର ଓ ସାନବଜାର ରାସ୍ତାରେ କେତକୀ ଫୁଲ ବିକ୍ରି ହେଉଛି। ବ୍ରହ୍ମପୁର ସହରର ବହୁ ପୁରାତନ କେତକୀ ଫୁଲ ବ୍ୟବସାୟୀ ଶ୍ରୀଧର ସାହୁଙ୍କ କହିବାନୁସାରେ ପୂର୍ବରୁ ତାଙ୍କ ପିତା କେତକୀ ଫୁଲ ପ୍ରତିବର୍ଷ ବିକ୍ରି କରିଥାନ୍ତି। ମହାଶିବରାତ୍ରିର ଦୁଇ, ତିନିି ଦିନ ପୂର୍ବରୁ କେତକୀ ଫୁଲ ବିକ୍ରି ହୋଇଥାଏ। ବ୍ରହ୍ମପୁର ବଜାରରେ ବିକ୍ରି ହେଉଥିବା ଫୁଲ ମୁଖ୍ୟତଃ ଆଠଗଡ଼ରୁ ସଂଗ୍ରହ ହୋଇଥାଏ। ଚଳିତ ବର୍ଷ କେତକୀ ଫୁଲ ଦର ଆକାଶଛୁଆଁ ରହିଛି। ଫୁଲ ଗୋଟା ପିଛା ୩୦୦ରୁ ୯୦୦ ଟଙ୍କା ପର୍ଯ୍ୟନ୍ତ ରହିଛି। ଅନ୍ୟପଟେ ବିଗତ ଦୁଇ ବର୍ଷ କରୋନା ମହାମାରୀରୁ ଭକ୍ତଙ୍କୁ ମନ୍ଦିର ପ୍ରବେଶ ଉପରେ କଟକଣା ଲାଗିଥିବାରୁ ଆଶାନୁରୂପ ବ୍ୟବସାୟ ହୋଇପାରିନଥିଲା। କିନ୍ତୁ ଚଳିତ ବର୍ଷ କରୋନା ସଂକ୍ରମଣ ନିୟନ୍ତ୍ରଣରେ ଥିବାରୁ ଭକ୍ତଙ୍କ ମଧ୍ୟରେ ଶିବରାତ୍ରି ପାଳନକୁ ନେଇ ଉତ୍ସାହ ରହିଛି। ଏହା ସହ କେତକୀ ଫୁଲର ଚାହିଦା ପୂର୍ବ ୨ବର୍ଷ ତୁଳନାରେ ଅଧିକ ଥିବା ଯୋଗୁ ଦର ବୃଦ୍ଧି ପାଇଛି ବୋଲି ବ୍ୟବସାୟୀଙ୍କଠାରୁ ପ୍ରକାଶ।
