କନ୍ନୁର,୨।୨: କେରଳର କନ୍ନୁରରେ ଗୁରୁବାର ଏକ ହୃଦୟବିଦାରକ ଦୁର୍ଘଟଣା ଘଟିଛି। କାର୍ ସହିତ ଗର୍ଭବତୀ ମହିଳା ଓ ତାଙ୍କ ସ୍ବାମୀ ଜଳିଯାଇଛନ୍ତି। ନିଆଁର ଭୟାବହ ଏତେ ଥିଲା ଯେ, ଦମ୍ପତିଙ୍କୁ ବଞ୍ଚାଇବା ସମ୍ଭବପର ହୋଇପାରି ନ ଥିଲା। ମୃତ ଗର୍ଭବତୀ ମହିଳା ରୀଶା (୨୬) ଓ ସ୍ବାମୀ ପ୍ରିଜିଥ (୩୫)ଙ୍କ ଘର କୁୁଟ୍ଟିଆଟ୍ଟୁରରେ। ସୂଚନାଯୋଗ୍ୟ, ମହିଳାଙ୍କୁ ପ୍ରସବ ପୀଡ଼ା ହେବାରୁ ତାଙ୍କ ସ୍ବାମୀ ଏକ କାର୍ରେ ତାଙ୍କୁ ହସ୍ପିଟାଲକୁ ନେଇଯାଉଥିଲେ। ହେଲେ ହସ୍ପିଟାଲ ପହଞ୍ଚିବା ପୂର୍ବରୁ ହଠାତ୍ କାରରେ ନିଆଁ ଲାଗିଯାଇଥିଲା। କାର୍ରେ ନିଆଁ ଲାଗିବା ମାତ୍ରେ ପଛ ସିଟ୍ରେ ବସିଥିବା ଜଣେ ଶିଶୁ ସମେତ ୪ ଜଣ ଗାଡ଼ିରୁ ଓହ୍ଲାଇ ପଡ଼ିଥିବା ବେଳେ ଦମ୍ପତି କାର୍ରୁ ବାହାରି ପାରି ନ ଥିଲେ। ଘଟଣାର ସୂଚନା ପାଇ ଦମକଳ ବାହିନୀ ସେଠାରେ ପହଞ୍ଚି ନିଆଁକୁ ଆୟତ୍ତ କରିଥିଲା। ଦମ୍ପତ୍ତିଙ୍କୁ ଉଦ୍ଧାର କରି ଡାକ୍ତରଖାନା ନେବା ବେଳକୁ ସେମାନଙ୍କର ମୃତ୍ୟୁ ଘଟିଥିଲା। କାର୍ ଆଗ କାଚକୁ ଭାଙ୍ଗି ସ୍ଥାନୀୟ ଲୋକେ ଦମ୍ପତିଙ୍କୁ ଉଦ୍ଧାର କରିବାକୁ ଉଦ୍ୟମ କରିଥିଲେ ହେଁ ସେମାନେ ସଫଳ ହୋଇ ପାରି ନ ଥିଲେ। ତେବେ କାର୍ରେ ନିଆଁ ଲାଗିବାର କାରଣ ସ୍ପଷ୍ଟ ହୋଇନାହିଁ। ଯାନ୍ତ୍ରିକ ତ୍ରୁଟି ଯୋଗୁ ଦୁର୍ଘଟଣା ଘଟିଥିବା ସନ୍ଦେହ କରାଯାଉଛି। ଏକ୍ସପର୍ଟ ଟିମ୍ କାର୍ର ଯାଞ୍ଚ କରୁଥିବାବେଳେ ସ୍ଥାନୀୟ ପୋଲିସ ଘଟଣା ତଦନ୍ତ ଆରମ୍ଭ କରିଛି। ଅନ୍ୟପଟେ ଆହତଙ୍କୁ ହସ୍ପିଟାଲ ପଠାଯାଇଥିବା ବେଳେ ସେମାନେ ଆହତ ହୋଇନାହାନ୍ତି ବୋଲି କନ୍ନୁରର ସିଟି ପୋଲିସ କମିଶନର ଅଜିତ କୁମାର କହିଛନ୍ତି।
