ପବିତ୍ର ଭାରତ ମାଟିରେ ଫିରିଙ୍ଗି ପତାକା ଗଡ଼େଇ ଇଂରେଜଙ୍କୁ ତଡ଼େଇ ତ୍ରିରଙ୍ଗା ଉଡ଼େଇ କବାଟ କିଳି ଭଲଦିନ ଆସିବ ବୋଲି ବଡ଼ ଶରଧାରେ ଆ ଆ ବୋଲି ଡାକୁଛୁ l ପତିତପାବନଙ୍କ ରଥଯାତ୍ରା ଗହଳିରେ ଚକାଡୋଳା ଚାହିଁଥିବାବେଳେ ଶୃଙ୍ଖଳା ରକ୍ଷାକରୁଥିବା ଅତି ଭଦ୍ର ବ୍ୟକ୍ତି ଜଣକ ପାଖରେ ଠିଆହୋଇଥିବା ଯୁବତୀର ଅଙ୍ଗରେ ବାରମ୍ବାର କହୁଣି ଘଷୁଥିଲା , ଯିଏ ୬ ଦିନ ତଳେ ତା’ ବନ୍ଧୁମାନଙ୍କୁ ପଚାରି ବୁଝୁଥିଲା ସ୍ବାଧୀନତାର ଏତେ ବର୍ଷ ଗଲାଣି ଭଲଦିନ କେବେ ଆସିବ?
ଗଣ ବଳାତ୍କାରରେ ପୀଡ଼ିତା ଝିଅଟି ଗାଁରୁ ବୁଢ଼ାଜେଜେ ସାଥିରେ ଆସି ସୁବିଚାର ଆଶାରେ ଠିକଣା ଜାଗାରେ ପହଞ୍ଚିଯାଇଥିଲା l ତଳରୁ ଉପର ଜଣ ଜଣ କରି ତିନିଜଣ ବାବୁ ତାକୁ ଡାକିନେଇ ଷ୍ଟେଟ୍ମେଣ୍ଟ ନେଲେ l ସବୁଠୁ ବଡ଼ବାବୁ ପହଞ୍ଚତ୍ ଘଟଣାର ଏନ୍କ୍ୱାରି ନିମନ୍ତେ ଷ୍ଟେଟ୍ମେଣ୍ଟ ନେବାକୁ ଡାକିଲାବେଳେ ଭୋ ଭୋ କାନ୍ଦି ସେ କହୁଥିଲା, ଆଉ ଷ୍ଟେଟ୍ମେଣ୍ଟ ଦେଲେ ମୁଁ ମରିଯିବି ବାବୁ l ଗଲା ରବିବାର ରାତିରେ ଜବତ ହୋଇଥିବା ଚୋରା ଖାସି କାଟି ଭୋଜି ଖାଇବା ଆଗରୁ ବିଦେଶୀ ପାନୀୟ ପର୍ବରେ ଦେଶ ହିତକଥା ନ ଭୁଲି ଆଲୋଚନା କରୁଥିଲେ ଆମ ପାଇଁ ଭଲଦିନ କେବେ ଆସିବ?
ନରିଆ ପ୍ରଧାନ ସୁରଟରୁ ଫେରି ଜମିବାଡ଼ି ବନ୍ଧା ପକେଇ ବ୍ୟାଙ୍କଲୋନ୍ ନେଇ ଛୋଟ କାରଖାନାଟାଏ କଲେ l ତିରିଶି ସରିକି ଲୋକଙ୍କୁ କର୍ମନିଯୁକ୍ତିଦେଇ ତାଙ୍କ ପରିବାର ପୋଷୁଥିବା କାରଖାନାକୁ ଜୋର୍ଦାର ଆଗେଇନେବାକୁ ପ୍ରତିମାସରେ ଇଲେକ୍ଟ୍ରି ବିଭାଗ ବାବୁ, ଶ୍ରମ ବିଭାଗ ବାବୁ, ଟିକସବାବୁ, ପରିବେଶ ସ୍ବଚ୍ଛକାରୀ ଦଳ ତଥା ଅନେକ ନେତୃଗଣ ଘନ ଘନ ଆଗମନକରି ଉପଦେଶ ଦେଉ ଦେଉ ଅଳ୍ପଦିନରେ ସବୁ ଚଳୁ ହୋଇଯିବାପରେ ଲୋନ୍ ଶୁଝିବାକୁ ବ୍ୟାଙ୍କବାଲାଙ୍କ ନୋଟିସରେ ନରି ଥରହର। ନରିଆ ଚୁଲି ଚାଳ ନିଲାମ ହୋଇଗଲା l ବିଭାଗୀୟ ବାବୁମାନେ ଅଫିସରେ ପ୍ରାୟ ଆଲୋଚନା ଜାରି ରଖିଥିଲେ ଭଲଦିନ କେବେ ଆସିବ ଆଉ ତାଙ୍କ ଖାତାରେ କଳାଟଙ୍କାର ଅଂଶଧନ ପନ୍ଦରଲକ୍ଷ ଜମାହେବ l ଟ୍ୟାକ୍ସ ଫାଙ୍କିଆସୁଥିବା ଟଙ୍କନିଧି ବାବୁ ଟଙ୍କାର ମହତ୍ତ୍ୱ ବୁଝି ଗୋଟାଏରୁ ଆଠ ଆଠଟା ଶୋ’ରୁମ୍ ଦୋକାନ ବିଭିନ୍ନ ସହରରେ ଖୋଲିସାରିଥିଲେ l ତଥାପି ବାବୁଙ୍କର ଦେଶ ହିତ ଚିନ୍ତା ଥିବାରୁ ଗ୍ରାହକମାନଙ୍କୁ ପଚାରି ବୁଝୁଥିଲେ, କହିପାରିବେକି ଭଲଦିନ କେବେ ଆସିବ? ଚାଷଜମି ସବୁ ପଡ଼ିଆ ପକେଇ, ସରକାରୀ ଅନୁଦାନ ହଡ଼ପକରି, ଯୁବକ୍ଳବର ବାବୁମାନେ ସଞ୍ଜରେ ଭୋଜିଭାତ ପିଆପିଇ ଆସର ଜମେଇକି ବି ଦେଶର ହିତ କଥା ଚିନ୍ତା କରୁଥିଲେ ଯେ ଭଲଦିନ କେବେ ଆସିବ l
ବୁଢ଼ାବାପାର ପେନ୍ସନ ଟଙ୍କାରେ ଲକ୍ଷେଟଙ୍କିଆ ମଟରସାଇକେଲ କିଣି ଗାର୍ଲଫ୍ରେଣ୍ଡ ଧରି ଘିରି ଘିରି ଚକ୍କର ମାରି ହଟ୍ପିଜା, ହଟ୍ଡ୍ରିଂକ୍ସ ପିଆଇ ମନକୁ କୁଲ୍ କୁଲ୍ କରୁଥିବା ପବନା, ପାର୍କରେ ପ୍ରେମିକାକୁ ପଚାରୁଥିଲା ଭଲଦିନ କେବେ ଆଉ ଆସିବ? ଦେଶୀ ଖାଦ୍ୟ ପୋଷାକ ବର୍ଜନକରି, ଦେଶୀଗାଈ ବିକ୍ରିକରି ବିଦେଶୀ କୁକୁରପାଳି, ଫରେନ୍ ଫୁଡ୍ ଖାଇ, ଫରେନ୍ ସଂସ୍କୃତି ଆପଣେଇ ପିଲାଙ୍କୁ ତାଙ୍କ ରାସ୍ତାରେ ଚାଲିବାକୁ ପ୍ରେରଣାଦେଇ ଆସୁଥିବା ଦାସବାବୁ ଓରଫ ନଣ୍ଡା, ଭେଣ୍ଡିଆମାନଙ୍କୁ ପଚାରଥିଲେ ଭାରତରେ ଆଉ ଭଲଦିନ ଆସିବ ତ? ମଧ୍ୟାହ୍ନଭୋଜନ ଚାଉଳ ଡାଲି ଅଣ୍ଡା ହଡ଼ପକାରୀ ଝିଅଙ୍କୁ ଅଲଗା ଇଙ୍ଗିତ କରୁଥିବା ରସିକ ସାର୍ ସହକର୍ମୀ ଶିକ୍ଷକମାନଙ୍କୁ ପଚାରନ୍ତି ଭଲଦିନ କେବେ ଆସିବ?
ଏମିତିକି ଡେଥ୍ ସାର୍ଟିଫିକେଟ ଦେବାକୁ ମାତ୍ର ଏଗାର ହଜାର ଟଙ୍କା ଦାବିକରି ଭିଜିଲାନ୍ସ ହାତରେ ଧରାପଡ଼ିଥିବା ସଚ୍ଚୋଟ ଡାକ୍ତର, ଚାକିରି ଦେବାକୁ କହି କୋଟି କୋଟି ଟଙ୍କା ନେଇଥିବା ନେତା ଏକାଠି ମିଶି ପାଟିରେ ଚିକିନ ତନ୍ଦୁରି ପୂରାଉ ପୂରାଉ ଲୁହ ଛଳଛଳ ଆଖିରେ ପ୍ରଶ୍ନ କରୁଥିଲେ ଭଲଦିନ କେବେ ଆସିବ? ପୈତୃକ ସମ୍ପତ୍ତିର ଚଉଦଶହ ଗୁଣା ବଢ଼େଥିବା ମାର୍କାମରା ବାବୁ ଏବେ ବିରୋଧୀଦଳରେ ବସି ଶାସକଦଳଙ୍କୁ ପ୍ରଶ୍ନକରୁଥିଲେ ଭଲଦିନ କେବେ ଆସିବ, କଳାଧନ କେବେ ମିଳିବ?
ପରକୀୟା ପ୍ରୀତିରେ ଲିପ୍ତ ପ୍ରେମିକା, ତା’ ପ୍ରେମିକ ସହ ମିଶି ଗିରସ୍ତକୁ ମାରି ଦିଟା ଛୁଆ ଛାଡ଼ି ଫେରାରହୋଇ ଯିବାପରେ ତା’ ପ୍ରେମିକକୁ ପଚାରୁଥିଲା- ଆମର ଆଉ ଭଲଦିନ କେବେ ଆସିବ? ଆଉ ଆମ ସଂସାର କେମିତି ଆଗକୁ ଯିବ।
ଅଗଷ୍ଟ ପନ୍ଦର ଦିନ ନାତି, ମନ୍ତ୍ରୀଙ୍କ ଭାଷଣ ଶୁଣି ହାତରେ ଲଡ଼ୁ ଧରି ଆସି ମତେ କହିଲା.. ଆମର ଭଲଦିନ ଆସିସାରିଛି l ଆମକୁ ମାଗଣା ମଧ୍ୟାହ୍ନଭୋଜନ, ଅଣ୍ଡା, ଭାତଡାଲମା, ପୋଷାକ, ବହି ମିଳୁଛି l ନ ପଢ଼ିଲେ ବି ପାସ୍ କରେଇଦିଆଯାଉଛି l ଦଣ୍ଡମୁକ୍ତ ପାଠପଢା ଘୋଷଣା ହୋଇଥିବାରୁ ମାଡ଼ ଭୟ ବି ଛାଡି ଯାଇଛି l
ମୁଁ ତା’ ମୁହଁକୁ ଅନେଇ ଭାବୁଥିଲି… ଆରେ ହଁ ହଁ l ଯେବେଠୁଁ ଦୋଷୀମାନେ ମିଶି ପୋଲିସଙ୍କୁ ପିଟିଲେଣି, ଟୋଲ୍ ଫ୍ରି ନମ୍ବର ଦେଖି ଛାତ୍ରମାନଙ୍କୁ ସାର୍ମାନେ ଡରିଲେଣି…. ସେବେଠୁ ତ ଭଲଦିନ ଆସିସାରିଲାଣି l
-ମଙ୍ଗରାଜପୁର, ପୁରୀ
ମୋ:୭୦୦୮୧୮୮୮୪୭
