ଶାରଜା, ୫ା୧୦(ପି.ଟି.)-ଦୁଇଥର ଆଇପିଏଲ୍ ବିଜୟୀ କୋଲକାତା ନାଇଟ୍ ରାଇଡର୍ସ(କେକେଆର)ର ପୂର୍ବତନ ଅଧିନାୟକ ଗୌତମ ଗମ୍ଭୀରଙ୍କ ମତରେ ଇଅନ ମୋର୍ଗାନ ଓ ଆନ୍ଦ୍ରେ ରସେଲଙ୍କ ପରେ ଦୀନେଶ କାର୍ତ୍ତିକ ବ୍ୟାଟିଂ କରିବା ଲାଗି ଆସିଲେ ଭଲ। ଅନ୍ୟପକ୍ଷରେ ଟପ୍ ଅର୍ଡରରୁ ସୁନୀଲ ନାରିନ୍ଙ୍କୁ ବାଦ୍ ଦେବା ଉଚିତ। ମୁମ୍ବାଇ ଇଣ୍ଡିଆନ୍ସ ବିପକ୍ଷ ମ୍ୟାଚରେ ୩ନମ୍ବର ସ୍ଥାନରେ ବ୍ୟାଟିଂ କରିବାକୁ ଆସି କାର୍ତ୍ତିକ ୨୩ବଲ୍ରୁ ୩୦ରନ କରିଥିଲେ। ଏହା ବ୍ୟତୀତ ମୋର୍ଗାନଙ୍କ ଆଗରୁ ବ୍ୟାଟିଂ କରିବାକୁ ଆସି ସେ ଉଲ୍ଲେଖନୀୟ ରନ ସଂଗ୍ରହ କରିପାରି ନାହାନ୍ତି। ଶନିବାର ଦିଲ୍ଲୀ କ୍ୟାପିଟାଲ୍ସ ବିପକ୍ଷରେ ୫ ନମ୍ବର ସ୍ଥାନରେ ବ୍ୟାଟିଂ କରି ଉଇକେଟକିପର ବ୍ୟାଟ୍ସମ୍ୟାନ ୬ରନ ସ୍କୋର କରିଥିଲେ। ମୋର୍ଗାନ (୧୮ ବଲ୍ରୁ ୪୪) ଏବଂ ରାହୁଲ ତ୍ରିପାଠୀ (୧୬ ବଲ୍ରୁ ୩୬) ଯଥାକ୍ରମେ ୬ଷ୍ଠ ଓ ୮ମ ସ୍ଥାନରେ ଆସି ରନ୍ ଚେଜ୍ ବେଳେ ଆଶା ସଞ୍ଚାର କରିଥିଲେ। ବ୍ୟାଟିଂ ଅର୍ଡରରେ ରାହୁଲ ତ୍ରିପାଠୀଙ୍କୁ ପଦୋନ୍ନତି ଦେବା ଉଚିତ। ଦିନେଶ କାର୍ତ୍ତିକ ୬ ନମ୍ବର ସ୍ଥାନରେ ଖେଳନ୍ତୁ। କିନ୍ତୁ ମୋର୍ଗାନ କିମ୍ବା ରସେଲଙ୍କ ପୂର୍ବରୁ ନୁହେଁ। ସୁନୀଲ ନାରିନ୍ଙ୍କୁ ୮ମ କିମ୍ବା ୯ମ ସ୍ଥାନରେ ପଠାଯିବା ଉଚିତ ବୋଲି ଗମ୍ଭୀର ଏକ ସାକ୍ଷାତ୍କାରରେ ପ୍ରକାଶ କରିଛନ୍ତି। ଭାରତର ପୂର୍ବତନ ଓପନର କହିଛନ୍ତି ୧୯ତମ ଓଭରରେ ସ୍ପିନର ବରୁଣ ଚକ୍ରବର୍ତ୍ତୀ (୧/୪୯)ଙ୍କୁ ପଠାଇବା କାର୍ତ୍ତିକଙ୍କ ନିଷ୍ପତ୍ତି ଭୁଲ୍ ଥିଲା। ଏହି ବୋଲର ଗୋଟିଏ ଓଭରରେ ୨୦ ରନ ଦେଇଥିଲେ। ୧୮ତମ, ୧୯ତମ ଓ ୨୦ତମ ଓଭରରେ ଦଳର ଶ୍ରେଷ୍ଠ ବୋଲରଙ୍କୁ ବୋଲିଂ ଦେବା କଥା। ବୋଲିଂ ପାଇଁ ସ୍ପିନର ଚାହୁଁଥିଲେ ପ୍ୟାଟ୍ କୁମିନ୍ସ, ସୁନୀଲ ନାରିନ୍ଙ୍କୁ ପଠାଯାଇ ପାରିଥାନ୍ତା। ପୂର୍ବ ମ୍ୟାଚଗୁଡ଼ିକରେ ଭଲ ପ୍ରଦର୍ଶନ କରିଥିବା ଇଭେନ ମାଭିଙ୍କୁ ମଧ୍ୟ ଦାୟିତ୍ୱ ଦିଆଯାଇ ପାରିଥାନ୍ତା। ଆନ୍ଦ୍ରେ ରସେଲ୍ଙ୍କୁ ମଧ୍ୟ ବ୍ୟବହାର କରିପାରିଥାନ୍ତୋ।
