ବେଙ୍ଗାଲୁରୁ,୨୩।୩: କର୍ନାଟକ ହିଜାବ ବିବାଦରେ ରାୟ ଶୁଣାଇଥିବା ହାଇକୋର୍ଟ ବିଚାରପତିଙ୍କୁ ହତ୍ୟା ଧମକ ଦେଇଥିବା ଅଭିଯୁକ୍ତଙ୍କୁ ଗିରଫ କରାଯାଇଛି। କର୍ନାଟକ ପୋଲିସ ଉକ୍ତ ଅଭିଯୁକ୍ତଙ୍କୁ ତାମିଲନାଡୁରୁ ଗିରଫ କରିଛି। ଏନେଇ ମଙ୍ଗଳବାର ରାଜ୍ୟର ଗୃହ ମନ୍ତ୍ରୀ ଅରାଗା ଜ୍ଞାନେନ୍ଦ୍ର ସୂଚନା ଦେଇଛନ୍ତି। ଉକ୍ତ ଅଭିଯୁକ୍ତଙ୍କୁ ବୁଧବାର କର୍ନାଟକ ପୋଲିସ ଏକ ୱାରେଣ୍ଟ ଜାରି କରିବା ପରେ ତାମିଲନାଡୁରୁ ରାଜ୍ୟକୁ ଅଣାଯିବ। ଅଭିଯୁକ୍ତ ଜଣଙ୍କ ହେଉଛନ୍ତି ରହମାଥୁଲ୍ଲା ତାଙ୍କୁ ମଦୁରାଇରୁ ଗିରଫ କରାଯାଇଛି ବୋଲି ସେ କହିଛନ୍ତି। ସୂଚନାଯୋଗ୍ୟ, କର୍ନାଟକରେ ହିଜାବ ବିବାଦରେ ୩ଜଣ ବିଚାରପତି ରାୟ ଶୁଣାଇବା ପରେ ରହମାଥୁଲ୍ଲା ଏକ ଭିଡିଓ ଜାରି କରି ହତ୍ୟା ପାଇଁ ସେମାନଙ୍କୁ ଧମକ ଦେଇଥିଲେ। ତେବେ ଧମକ ମିଳିବା ପରେ ଏହି ବିଚାରପତିମାନଙ୍କୁ କର୍ନାଟକ ପ୍ରଶାସନ ସୁରକ୍ଷା ଯୋଗାଇ ଦେଇଥିଲେ। ଏହି ୩ଜଣ ବିଚାରପତିଙ୍କୁ ମୁଖ୍ୟମନ୍ତ୍ରୀ ବାସବରାଜ ବୋମ୍ମାଇ ଓ୍ବାଇ ବର୍ଗର ସୁରକ୍ଷା ପ୍ରଦାନ କରିଥିଲେ। ଏଥିସହ ବିଧାନସଭା ପୋଲିସ ଷ୍ଟେସନରେ ଦାଖଲ ହୋଇଥିବା ଅଭିଯୋଗର ପୁଙ୍ଖାନୁପୁଙ୍ଖ ତଦନ୍ତ କରିବାକୁ ଡିଜି ଓ ଆଇଜିଙ୍କୁ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଥିଲେ।
