ନୂଆଦିଲ୍ଲୀ/ବେଙ୍ଗାଲୁରୁ,୧୦।୫: କର୍ନାଟକ ବିଧାନସଭା ନିର୍ବାଚନ ପାଇଁ ବୁଧବାର ମତଦାନ ଶେଷ ହୋଇଛି। ଏହି ପରିପ୍ରେକ୍ଷୀରେ ବିଭିନ୍ନ ଗଣମାଧ୍ୟମ ପକ୍ଷରୁ ହୋଇଥିବା ଏକ୍ଜିଟ ପୋଲ୍ ଫଳାଫଳ ପ୍ରକାଶ ପାଇଛି। କେତେକ ଗଣମାଧ୍ୟମ ସଂସ୍ଥା ଦ୍ବାରା କରାଯାଇଥିବା ଏକ୍ଜିଟ ପୋଲ୍ରେ କଂଗ୍ରେସ ସରକାର ଗଠନ କରିପାରେ ବୋଲି ଆକଳନ କରାଯାଇଛି। ଏପରି କି କେତେକ ସଂସ୍ଥା ଦ୍ୱାରା କରାଯାଇଥିବା ଆକଳନରେ କର୍ନାଟକରେ ଝୁଲା ବିଧାନସଭା ହେବ ବୋଲି ଆକଳନ କରାଯାଇଛି। ମୋଟାମୋଟି ଭାବେ କର୍ନାଟକରେ ମେଣ୍ଟ ସରକାର ହୋଇପାରେ ବୋଲି କୁହାଯାଉଛି। ଏକ୍ଜିଟ ପୋଲ୍ ଅନୁସାରେ ଗତ ଥର ଅପେକ୍ଷା କଂଗ୍ରେସ ଫାଇଦାରେ ରହିଥିବା ସୂଚନା ମିଳୁଛି। ଏନେଇ କର୍ନାଟକରେ ଜେଡିଏସ୍ ମଧ୍ୟ କିଙ୍ଗ୍ମେକର ଭୂମିକା ନିର୍ବାହ କରିପାରେ ବୋଲି ମଧ୍ୟ ଆକଳନ ହେଉଛି।
କର୍ନାଟକ ବିଧାନସଭାର ମୋଟ ୨୨୪ଟି ଆସନ ପାଇଁ ନିର୍ବାଚନ ହୋଇଥିବା ବେଳେ ସରକାର ଗଠନ ପାଇଁ ୧୧୩ ମ୍ୟାଜିକ ନମ୍ବର ରହିଛି।
ଏବିପି ନ୍ୟୁଜ-ସି ଭୋଟର ଭାଜପାକୁ ୮୩-୯୫ ସିଟ୍ ଦେଉଥିବା ବେଳେ କଂଗ୍ରେସକୁ ୧୦୦-୧୧୨ ଏବଂ ଜେଡିଏସ୍ ୨୧-୨୯ ଓ ଅନ୍ୟ ଦଳକୁ ୨-୬ ସିଟ୍ ମିଳିପାରେ ବୋଲି ଆକଳନ କରିଛି। ସେହିପରି ଇଣ୍ଡିଆ ଟୁଡେ- ଆକ୍ସି ମାଁ ଇଣ୍ଡିଆ ଭାଜପାକୁ ୬୨-୮୦ଟି ଆସନ ଦେଉଥିବା ବେଳେ କଂଗ୍ରେସ ୧୨୨-୧୪୦ ଆସନ ପାଇ ସରକାର ଗଠନ କରିପାରେ ବୋଲି ଆକଳନ କରିଛି। ସେହିପରି ଟାଇମ୍ସ ନାଓ ଭାଜପାକୁ ୮୫ ଆସନ ଦେଉଥିବା ବେଳେ କଂଗ୍ରେସ ୧୧୩ ଆସନରେ ବିଜୟ ହେଉଥିବା ଆକଳନ କରିଛି।
ରିପବ୍ଲିକ ଟିଭି ଏବଂ ପି ମର୍କ ଭାଜପାକୁ ୮୫-୧୦୦ ଆସନ ଦେଉଥିବା ବେଳେ କଂଗ୍ରେସ ୯୪- ୧୦୮ ଆସନ ପାଇବ ବୋଲି ଆକଳନ କରିଛି। ଜେଡିଏସ୍ ୨୪- ୩୨ ଆସନ ପାଇବ ବୋଲି ଅନୁମାନ କରିଛି। ଅନ୍ୟାନ୍ୟ ପ୍ରାର୍ଥୀଙ୍କ ହାତକୁ ୨-୬ ଆସନ ଯିବା ଆକଳନ କରିଛି।
ଟିଭି ୯ ଭାରତବର୍ଷ ଓ ପୋଲ୍ଷ୍ଟାର୍ଟ ପକ୍ଷରୁ ମିଳିତ ଭାବେ କରାଯାଇଥିବା ଏକ୍ଜିଟ ପୋଲ୍ ଅନୁସାରେ ଭାଜପାକୁ ୮୮-୯୮ ଆସନ ମିଳିବା ସମ୍ଭାବନା ଥିବା ବେଳେ କଂଗ୍ରେସ ୯୯-୧୦୯ ଆସନ ପାଇବ ବୋଲି ଆକଳନ କରିଛି। ସେହିପରି ଜେଡିଏସ୍ ୨୧-୨୬ ଆସନ ଲାଭ କରିବାକୁ ଯାଉଥିବା ବେଳେ ଅନ୍ୟାନ୍ୟ ପ୍ରାର୍ଥୀଙ୍କ ହାତକୁ ୦-୪ ଆସନ ଯିବାର ସମ୍ଭାବନା ରହିଛି ବୋଲି ଏକ୍ଜିଟ ପୋଲରେ ଦର୍ଶାଯାଇଛି।
ଜି ନ୍ୟୁଜ ଓ ମ୍ୟାଟ୍ରାଇଜ୍ ପକ୍ଷରୁ ମିଳିତ ଭାବେ କରାଯାଇଥିବା ଏକ୍ଜିଟ ପୋଲ ଅନୁସାରେ ଭାଜପାକୁ ୭୯-୯୪ ଆସନ ମିଳିବା ସମ୍ଭାବନା ଥିବାବେଳେ କଂଗ୍ରେସ ୧୦୩-୧୧୮ ଆସନ ପାଇବ। ସେହିପରି ଜେଡିଏସ୍ ୨୫-୩୩ ଆସନ ଲାଭ କରିବାକୁ ଯାଉଥିବା ବେଳେ ଅନ୍ୟାନ୍ୟ ପ୍ରାର୍ଥୀଙ୍କ ହାତକୁ ୨-୫ ଆସନ ଯିବାର ସମ୍ଭାବନା ରହିଛି।
