ବେଙ୍ଗାଲୁରୁ,୧୯।୭: କର୍ନାଟକରେ କରୋନା ଦ୍ରୁତ ଗତିରେ ବୃଦ୍ଧି ପାଉଛି। ବେଙ୍ଗାଲୁରୁରେ ସର୍ବାଧିକ ମାମଲା ସାମ୍ନାକୁ ଆସୁଛି। ଫଳରେ ୨୨ ଜୁଲାଇ ପର୍ଯ୍ୟନ୍ତ ଏଠାରେ ଲକ୍ଡାଉନ୍ ଘୋଷଣା କରାଯାଇଛି। ବଢୁଥିବା ମାମଲା ମଧ୍ୟରେ ରାଜ୍ୟର ଜଣେ ମନ୍ତ୍ରୀ ହଠାତ୍ ରାତିରେ କେସି ଜେନେରାଲ ହସ୍ପିଟାଲ ପରିଦର୍ଶନ କରିଥିଲେ। ଏହି ହସ୍ପିଟାଲରେ ୧୧୨ ଜଣ ରୋଗୀଙ୍କ ପାଇଁ ମାତ୍ର ୨ ଜଣ ନର୍ସ କାମ କରୁଛନ୍ତି। ରାଜ୍ୟ ଶିକ୍ଷା ମନ୍ତ୍ରୀ କେ ସୁଧାକର କହିଛନ୍ତି ଯେ, ପ୍ରକୃତରେ ୧୦ ରୋଗୀଙ୍କ ପାଇଁ ଜଣେ ନର୍ସିଂ କର୍ମଚାରୀ ରହିବା ଉଚିତ। କିନ୍ତୁ ଏଠାରେ ଦୁଇଜଣ ନର୍ସ ୧୧୨ ରୋଗୀଙ୍କ ଯତ୍ନ ନେଉଛନ୍ତି। ଏହି ମାତ୍ରାରେ କାର୍ଯ୍ୟ କରିବା ମାନବିକ ଭାବରେ ସମ୍ଭବ ନୁହେଁ ବୋଲି ସେ କହିଛନ୍ତି।
ମେଡିକାଲ ଅଧୀକ୍ଷକ ଡକ୍ଟର ବି.ଆର ଭେଙ୍କଟେଶ ସୂଚନା ଦେଇଛନ୍ତି ଯେ, ହସ୍ପିଟାଲର ୫୯ ଜଣ କର୍ମଚାରୀ କରୋନା ଜୀବାଣୁ ସଂକ୍ରମିତ ହୋଇଛନ୍ତି। ଏହି କାରଣରୁ ଡାକ୍ତରଖାନାରେ କର୍ମଚାରୀଙ୍କ ଅଭାବର ସମ୍ମୁଖୀନ ହେଉଛୁ ବୋଲି ସେ କହିଛନ୍ତି।
