ମୁମ୍ବାଇ: ବଲିଉଡର ଜଣାଶୁଣା ଫିଲ୍ମ ମେକର କରଣ ଜୋହର ତାଙ୍କର ହାଇସ୍କୁଲ କମେଡି ଫିଲ୍ମ ‘ଷ୍ଟୁଡେଣ୍ଟ ଅଫ ଦ ଇୟର’ର ତୃତୀୟ ଭାଗ ଆଣିବାକୁ ଯାଉଛନ୍ତି। ପ୍ରଥମ ଭାଗରେ ସେ ଆଲିଆ ଭଟ୍ଟ, ବରୁଣ ଧଓ୍ବନ ଏବଂ ସିଦ୍ଧାର୍ଥ ମାଲହୋତ୍ରାଙ୍କୁ ଫିଲ୍ମ ଇଣ୍ଡଷ୍ଟ୍ରିରେ ଲଞ୍ଚ କରିଥିଲେ। ପୁଣି ୭ ବର୍ଷ ପରେ ’ଷ୍ଟୁଡେଣ୍ଡ ଅଫ ଦ ଇୟର ୨’ରେ ସେ ଅନନ୍ୟା ପାଣ୍ଡେ ଏବଂ ତାରା ସୁତାରିୟାଙ୍କୁ ଏଣ୍ଟ୍ରି କରାଇଥିଲେ। ଏବେ ପୁଣି ୪ ବର୍ଷ ପରେ ନୂଆ ଟୁଇଷ୍ଟ ସହ ସଞ୍ଜୟ କପୁର ଓ ମହିପ କପୁରଙ୍କ ଝିଅ ଶନାୟା କପୁରଙ୍କୁ ଲଞ୍ଚ କରିବାକୁ ଯାଉଛନ୍ତି।
ମିଳିଥିବା ଏକ ରିପୋର୍ଟ ଅନୁଯାୟୀ, କରଣ ଜୋହର ଡିଜନି ପ୍ଲସ ହଟଷ୍ଟାର ସହ ମିଶି ‘ଷ୍ଟୁଡେଣ୍ଟ ଅଫ ଦ ଇୟର’କୁ ଏକ ଓ୍ବେବ ସିରିଜରେ ବଦଳାଇବାକୁ ଯାଉଛନ୍ତି। ଏମିତି ଶନାୟା କପୁର ସାଉଥ୍ ଆକ୍ଟର ମୋହନଲାଲଙ୍କ ପ୍ୟାନ ଇଣ୍ଡିଆ ଫିଲ୍ମ ‘ବୃଷଭ’ ମାଧ୍ୟମରେ ତାଙ୍କ ଅଭିନୟ କ୍ୟାରିୟର ଆରମ୍ଭ କରିବାକୁ ଯାଉଛନ୍ତି। ହେଲେ ‘ଷ୍ଟୁଡେଣ୍ଟ ଅଫ ଦ ଇୟର’ ସିରିଜ ମାଧ୍ୟମରେ ସେ ଓଟିଟି ଦୁନିଆରେ ପାଦ ରଖିବେ।
ମିଡିଆ ରିପୋର୍ଟ ଅନୁଯାୟୀ, ଏବେ ଓ୍ବେବ ସିରିଜର ସ୍କ୍ରିପ୍ଟ ଉପରେ କାମ ଚାଲିଛି। ସ୍କ୍ରିପ୍ଟ ସରିବା ପରେ ଚଳିତ ବର୍ଷ ହିଁ ଏହାର ପ୍ରଡକସନ ଉପରେ କାମ ଆରମ୍ଭ କରାଯିବ। ବର୍ଷର ଶେଷ ବେଳକୁ ଶୁଟିଂ ବି ଆରମ୍ଭ ହୋଇଯିବ। ସୂଚନାଯୋଗ୍ୟ, ଏବେ ପର୍ଯ୍ୟନ୍ତ ଓ୍ବେବ ସିରିଜର ଷ୍ଟୋରୀ ଲାଇନ ଓ କଳାକାରଙ୍କ ସମ୍ପର୍କରେ କୌଣସି ସୂଚନା ମିଳିନାହିଁ। କୁହାଯାଉଛି କି ଗୋଟିଏ ମାସ ମଧ୍ୟରେ ଓ୍ବେବ ସିରିଜର ଡାଇରେକ୍ଟରଙ୍କର ଚୟନ ହୋଇଯିବ।
