ଢେଙ୍କାନାଳ ଅଫିସ, ୩।୨ – ପ୍ରସିଦ୍ଧ ଶୈବପୀଠ କପିଳାସ ହେବ ଗ୍ରୀନ୍ କରିଡର। ମନ୍ଦିର ପରିସର ସମେତ ଆଖପାଖ ଅଞ୍ଚଳକୁ ମାର୍ଚ୍ଚ ୧ ସୁଦ୍ଧା ପ୍ଲାଷ୍ଟିକ ଏବଂ ପଲିଥିନ ମୁକ୍ତ କରାଯିବ। ଏଥିଲାଗି ଅଣ୍ଟା ଭିଡ଼ିଛି ପ୍ରଶାସନ। ଏ ସଂକ୍ରାନ୍ତରେ ମଙ୍ଗଳବାର ଜିଲା ଦେବୋତ୍ତର ବିଭାଗ ଏବଂ ବନ ବିଭାଗ ମଧ୍ୟରେ ବିସ୍ତୃତ ଆଲୋଚନା କରାଯାଇଛି। ଆସନ୍ତା ଜାଗରଯାତ୍ରା ପୂର୍ବରୁ ପୀଠକୁ ଗ୍ରୀନ୍ ଜୋନ୍ରେ ପରିଣତ କରିବାକୁ ନିଷ୍ପତ୍ତି ନିଆଯାଇଛି।
ମହାପ୍ରଭୁ ଶ୍ରୀଚନ୍ଦ୍ରଶେଖରଙ୍କୁ ଦର୍ଶନ କରିବାକୁ ପ୍ରତିବର୍ଷ ଦେଶବିଦେଶରୁ ହଜାର ହଜାର ଶ୍ରଦ୍ଧାଳୁ କପିଳାସ ଆସିଥାନ୍ତି। ସେମାନଙ୍କ ସହିତ ପୀଠକୁ ଆସିଥାଏ ଶତାଧିକ କୁଇଣ୍ଟାଲ ପଲିଥିନ ଏବଂ ପ୍ଲାଷ୍ଟିକ। ପୀଠ ପରିସର ଏବଂ ପାହାଡ଼ ପାଦ ଦେଶରେ ଥିବା ଦୋକାନରେ ଭୋଗ ଏବଂ ଜଳଖିଆ ବିକ୍ରି ହେଉଛି। ଦୋକାନୀମାନେ ସହଜରେ ବ୍ୟବସାୟ କରିବାକୁ ପଲିଥିନରେ ସାମଗ୍ରୀ ଦେଇଥାନ୍ତି। ବ୍ୟବହାର ପରେ ଏସବୁ ରାସ୍ତାଘାଟ, ମନ୍ଦିର ବେଢ଼ାରେ ପକାଇ ଦିଆଯାଉଛି। ମାଟିରେ ସହଜରେ ମିଶୁ ନ ଥିବା ଏଭଳି ବର୍ଜ୍ୟବସ୍ତୁ ମନ୍ଦିର ସୌନ୍ଦର୍ଯ୍ୟ ବିଗାଡ଼ିବା ସହ ପୂତ୍ତିଗନ୍ଧମୟ ପରିବେଶ ସୃଷ୍ଟି କରୁଛି। ଏହାର ପ୍ରଭାବରେ ନଷ୍ଟ ହେଉଛି ପ୍ରାକୃତିକ ଝରଣା ଏବଂ ସବୁଜବନାନୀ। ଅଭୟାରଣ୍ୟକୁ ଲାଗି ରହିଥିବାରୁ ପ୍ଲାଷ୍ଟିକ ବର୍ଜ୍ୟ ବନ୍ୟଜୀବନକୁ ମଧ୍ୟ ପ୍ରଭାବିତ କରୁଛି। ଆବର୍ଜନାକୁ ମାଙ୍କଡ଼, କୁକୁର, କାଉ ଟାଣି ନେଇ ରାସ୍ତାରେ ପକାଉଛନ୍ତି। ଏହିସବୁ ସମସ୍ୟାର ସ୍ଥାୟୀ ସମାଧାନ କରିବାକୁ ଦୀର୍ଘଦିନରୁ ଦାବି ହୋଇ ଆସୁଛି। ଏଥିଲାଗି ପୂର୍ବରୁ ବହୁବାର ପ୍ରୟାସ କରାଯାଇଥିଲେ ମଧ୍ୟ ଯୋଜନା ଫଳପ୍ରସୂ ହୋଇପାରିନାହିଁ। ତେବେ ମଙ୍ଗଳବାର ସମସ୍ୟା ସମାଧାନ ଲାଗି ଉଭୟ ବନ ବିଭାଗ ଏବଂ ଦେବୋତ୍ତର ବିଭାଗ ମଧ୍ୟରେ ମିଳିତ ବୈଠକ ଅନୁଷ୍ଠିତ ହୋଇଛି। ଜିଲା ବନଖଣ୍ଡ ଅଧିକାରୀ ଏବଂ ଉପଜିଲାପାଳ ତଥା ଦେବୋତ୍ତର ଅଧିକାରୀ ଏ କ୍ଷେତ୍ରରେ ମିଳିତ ଭାବେ କାମ କରିବାକୁ ନିଷ୍ପତ୍ତି ନେଇଛନ୍ତି। ସେହିପରି କପିଳାସ ପାଦଦେଶରେ ଥିବା ପ୍ରାଣୀ ଉଦ୍ୟାନକୁ ମଧ୍ୟ ଗ୍ରୀନ କରିଡରରେ ସାମିଲ କରାଯାଇଛି। ଚଳିତବର୍ଷ ଯେ କୌଣସି ପ୍ରକାରେ ଏହି ଅଭିଯାନକୁ ସଫଳ ରୂପ ଦେବାକୁ ଯୋଜନା ରହିଛି।
ଚଳିତବର୍ଷ କରାଯିବ ପ୍ଲାଷ୍ଟିକ୍ ଫ୍ରି ଜୋନ୍
କପିଳାସ ପୀଠ ଏବଂ ଅଭୟାରଣ୍ୟକୁ ଚଳିତବର୍ଷ ପ୍ଲାଷ୍ଟିକ୍ ଫ୍ରି କରିବାକୁ ଯୋଜନା କରାଯାଇଛି। ମାର୍ଚ୍ଚ ୧ ସୁଦ୍ଧା ସମ୍ପୂର୍ଣ୍ଣ ଅଞ୍ଚଳକୁ ଗ୍ରୀନ୍ ଜୋନରେ ପରିଣତ କରିବାକୁ ଉଦ୍ୟମ ଆରମ୍ଭ ହୋଇଛି। ଏଥିରେ ଦେବୋତ୍ତର ବିଭାଗ ସହଯୋଗ କରୁଛି।
-ଡା. ପ୍ରକାଶଚାନ୍ଦ ଗୋଗିନେନି, ଡିଏଫ୍ଓ
ଶ୍ରଦ୍ଧାଳୁଙ୍କୁ ସଚେତନ କରାଯିବ
ଜାଗର ଯାତ୍ରା ପୂର୍ବରୁ କପିଳାସ ପୀଠକୁ ପ୍ଲାଷ୍ଟିକ ଏବଂ ପଲିଥିନ ମୁକ୍ତ କରାଯିବ। ଏଥିପାଇଁ ଡିଏଫ୍ଓଙ୍କ ସହ ଆଲୋଚନା ହୋଇଛି। ପୀଠକୁ ଆସୁଥିବା ଶ୍ରଦ୍ଧାଳୁଙ୍କୁ ସଚେତନ କରାଯିବା ଲାଗି ଆବଶ୍ୟକ ପଦକ୍ଷେପ ନିଆଯିବ।
-ସାଫଲ୍ୟ ମଣ୍ଡିତ ପ୍ରଧାନ, ଜିଲା ଦେବୋତ୍ତର ଅଧିକାରୀ
ସ୍ବାଗତଯୋଗ୍ୟ ପଦକ୍ଷେପ
ବିଶ୍ୱପ୍ରସିଦ୍ଧ ଶୈବପୀଠ କପିଳାସକୁ ପ୍ଲାଷ୍ଟିକ୍ ଫ୍ରି ଜୋନ୍ କରିବା ନିଷ୍ପତ୍ତି ସ୍ବାଗତଯୋଗ୍ୟ। ମନ୍ଦିର ନିକଟରେ ଅଭୟାରଣ୍ୟ ଥିବାରୁ ଏହା ଜରୁରୀ। ଆବର୍ଜନା ପକାଇବାକୁ ଡଷ୍ଟବିନ୍ ସହ ସଫେଇ ଲାଗି ପଦକ୍ଷେପ ନିଆଯିବ ଉଚିତ।
-ପ୍ରଦ୍ୟୁମ୍ନ ରଥ, ପରିବେଶବିତ୍
ସ୍ବଚ୍ଛତା ସମସ୍ତଙ୍କ ନୈତିକ କର୍ତ୍ତବ୍ୟ
ମନ୍ଦିର ବେଢ଼ାରେ ସ୍ବଚ୍ଛତା ରକ୍ଷା ସମସ୍ତଙ୍କ ନୈତିକ କର୍ତ୍ତବ୍ୟ। କପିଳାସ ପୀଠ ଜିଲାର ଗୌରବ। ଏହାର ସୁରକ୍ଷା, ପରିଚ୍ଛନ୍ନତା ଲାଗି ସମସ୍ତେ ବଦ୍ଧପରିକର ହେବା ଉଚିତ। ସବୁଜିମା, ବନ୍ୟଜନ୍ତୁ ଏବଂ ଜଳସ୍ରୋତର ସୁରକ୍ଷା ଲାଗି ଏହା ଜରୁରୀ।
-ଦୀପ୍ତିମୟୀ ଲେଙ୍କା, ପରିବେଶବିତ୍
