ନୂଆଦିଲ୍ଲୀ, ୧୫।୭- କପିଳ ଦେବ। ଭାରତୀୟ କ୍ରିକେଟ୍ରେ ଏକ ବେଶ୍ ପରିଚିତ ନାମ। ୧୯୮୩ ବିଶ୍ୱକପ୍ରେ ଭାରତକୁ ଚାମ୍ପିୟନ କରାଇ କ୍ରିକେଟ୍କୁ ଘରେ ଘରେ ପରିଚିତ କରାଇବାରେ ଏହି ହରିୟାଣା କ୍ରିକେଟର୍ଙ୍କ ଅବଦାନ ଅତୁଳନୀୟ କହିଲେ କିଛି ଅତ୍ୟୁକ୍ତି ହେବ ନାହିଁ। ୧୯୭୮ରେ ବିଶନ ସିଂ ବେଦୀଙ୍କ ଅଧିନାୟକତ୍ୱରେ ଅନ୍ତର୍ଜାତୀୟ କ୍ୟାରିୟର ଆରମ୍ଭ କରିଥିବା କପିଳ ପୂର୍ବତନ ଅଧିନାୟକ ଶ୍ରୀନିବାସ ଭେଙ୍କଟରାଘବନଙ୍କୁ ସବୁଠାରୁ ଅଧିକ ଭୟ କରୁଥିବା କହିଛନ୍ତି। ନିକଟରେ ପୂର୍ବତନ କୋଚ୍ ଡବ୍ଲ୍ୟୁଭି ରମନଙ୍କ ସହ ଏକ ସାକ୍ଷାତ୍କାର ଅବସରରେ କପିଳ ଏହା କହିଛନ୍ତି। ‘ମୁଁ ତାଙ୍କୁ ବହୁତ ଡରୁଥିଲି। ପ୍ରଥମତଃ ସେ କେବଳ ଇଂରାଜୀରେ କଥା ହେଉଥିଲେ। ଦ୍ୱିତୀୟତଃ ଆମେ ସମସ୍ତେ ତାଙ୍କ କ୍ରୋଧ ଜାଣୁ। ସେ ଯେତବେଳେ ଅମ୍ପାୟରିଂ କରୁଥିଲେ ସେତେବେଳେ ମଧ୍ୟ ବୋଲରଙ୍କୁ ଗାଳି ଦେଇଥାନ୍ତି। ୧୯୭୯ରେ ଆମେ ଯେତେବେଳେ ଇଂଲଣ୍ଡ ଗସ୍ତରେ ଯାଇଥିଲୁ ଏବଂ ସେ ଅଧିନାୟକ ଥିଲେ ମୁଁ ଏମିତି ଏକ ସ୍ଥାନ ଖୋଜୁଥିଲି ଯେଉଁଠିକି ସେ ମୋତେ ଦେଖିପାରିବେ ନାହିଁ’ ବୋଲି କପିଳ କହିଛନ୍ତି। ଭାରତର ଏହି ଅନ୍ୟତମ ଶ୍ରେଷ୍ଠ ଅଲ୍ରାଉଣ୍ଡର ଆହୁରି ମଧ୍ୟ କହିଛନ୍ତି, ଆମେ ବେଦୀ, ପ୍ରସନ୍ନା, ଚନ୍ଦ୍ରଶେଖର ଥିଲୁ। ସେମାନଙ୍କୁ ପ୍ରକୃତରେ ସେ କିଛି କହିପାରନ୍ତି ନାହିଁ। ଫଳରେ ସ୍ବାଭାବିକ ଭାବେ ସେ ମୋତେ ଯେତେବେଳେ ଦେଖିଥାନ୍ତି ହଠାତ୍ ରାଗିଯାଇଥାନ୍ତି। ଯେତେହୁ ମୁଁ ଅଧିକ ଭୋଜନପ୍ରିୟ ତେଣୁ ସର୍ବଦା ଗୋଟିଏ କୋଣରେ ବସି ଜଳଖିଆ ଖାଇଥାଏ। କାରଣ ସେ ଭାବିବେ ମୁଁ ସର୍ବଦା ଖାଉଛି। ପ୍ରକାଶଯୋଗ୍ୟ ଭେଙ୍କଟରାଘବନ ୧୯୬୦-୭୦ ଦଶକରେ ଭାରତର ଜଣେ ଶ୍ରେଷ୍ଠ ସ୍ପିନର ରହିଥିଲେ। ସେ ଭାରତ ପକ୍ଷରୁ ୫୭ ଟେଷ୍ଟ ମ୍ୟାଚ୍ ଖେଳି ୧୫୬ ଉଇକେଟ୍ ହାସଲ କରିଛନ୍ତି।
