ଯୋଡ଼ା,୧୯ା୬(ମାନସ ମହାନ୍ତି): କେନ୍ଦୁଝର ଜିଲା ଯୋଡ଼ା ବ୍ଲକ୍ ଅନ୍ତର୍ଗତ ବିରିକଳା ପଞ୍ଚାୟତର ୫୨୦ନଂ. ଜାତୀୟ ରାଜପଥ ନିକଟରେ ଥିବା କାର୍ତ୍ତିକା ସାହିରେ ପାନୀୟ ଜଳ ସଙ୍କଟ ଦେଖାଯାଇଛି। ପ୍ରବଳ ତାରିରେ ପ୍ରଶାସନ ପକ୍ଷରୁ ଜଳ ଯୋଗାଣ ବ୍ୟବସ୍ଥା ନ ଥିବାରୁ ଲୋକେ ଜଳ ପାଇଁ ଡହଳବିକଳ ହେଉଛନ୍ତି। ଏ ନେଇ ପ୍ରଶାସନ ପକ୍ଷରୁ କୌଣସି ସହାୟତା ମିଳି ନ ଥିବା କାନପୁର ଡ୍ୟାମ ପାଇଁ ବିସ୍ଥାପିତ ହୋଇ ଉକ୍ତ ସାହିରେ ରହୁଥିବା ଲୋକେ କହିଛନ୍ତି।
ସୂଚନା ଅନୁଯାୟୀ, ଗତ କିଛି ବର୍ଷ ହେବ କାନପୁର ନଦୀବନ୍ଧ କାର୍ଯ୍ୟ ପାଇଁ ଗୋବିନ୍ଦପୁର ଓ ବିରିକଳା ଗ୍ରାମର ପ୍ରାୟ ୧୭ରୁ ଊଦ୍ଧର୍ବ ଭିଟାମାଟି ହରାଇଥିଲେ। ପରେ ବିରିକଳା ପଞ୍ଚାୟତର ୫୨୦ ନଂ. ଜାତୀୟ ରାଜପଥ ନିକଟରେ ଘର ନିର୍ମାଣ କରି ବସବାସ କରୁଛନ୍ତି। ବିସ୍ଥାପନ ଓ ଥଇଥାନ ନୀତି ଅନୁଯାୟୀ, ଯେଉଁ ଅଞ୍ଚଳରେ ୧୧ରୁ ଅଧିକ ପରିବାର ବସତି ସ୍ଥାପନ କରି ବାସ କରୁଥିବେ। ସେହି ଅଞ୍ଚଳର ମୌଳିକ ସୁବିଧା ସରକାର ଯୋଗାଇବେ। ଏଠାରେ ନିୟମକୁ ପ୍ରଶାସନ ଓ ପ୍ରକଳ୍ପ କର୍ତ୍ତୃପକ୍ଷ ଭୁଲିଯାଇଛନ୍ତି। ସରକାରଙ୍କ ପକ୍ଷରୁ ଏଠାରେ ନଳକୂପ, ପୋଖରୀ କିମ୍ବା କୂପ ଖନନ କରାଯାଇନାହିଁ। ଏଥିସହ ଜାତୀୟ ରାଜପଥର କାରଣ ସାହି ନିକଟରୁ ଉକ୍ତ ସାହିକୁ ସଂଯୋଗ ନିମନ୍ତେ ପିଚୁ ରାସ୍ତା, ବିଦ୍ୟୁତ୍ ସଂଯୋଗ ପ୍ରଭୃତି ସମସ୍ୟା ରହିଛି। କାନପୁର ନଦୀ ବନ୍ଧ ଯୋଜନା ପ୍ରକଳ୍ପ ନିମନ୍ତେ ତଥା କେନ୍ଦୁଝର ଜିଲାବାସୀଙ୍କ ସମୂହ ସ୍ବାର୍ଥ ପାଇଁ ନିଜର ଭିଟାମାଟିକୁ ସମର୍ପଣ କରିବା ପରେ ମଧ୍ୟ ବିସ୍ଥାପିତଙ୍କ ପ୍ରତି ପ୍ରଶାସନ ବୈମାତୃକ ମନୋଭାବ ପ୍ରଦର୍ଶନ କରୁଥିବା ବିସ୍ଥାପିତ ମହେଶ୍ୱର ସାମାଡ଼, ପୂର୍ଣ୍ଣଚନ୍ଦ୍ର ନାଏକ, ବଂଶୀ ସାମାଡ଼, ବିନୋଦ ସାମାଡ଼, ପାଲ ସାମାଡ଼, ଚନ୍ଦନ ମୁଣ୍ଡା, ଗୋବିନ୍ଦ ସାମାଡ଼ ପ୍ରମୁଖ କହିଛନ୍ତି। ପ୍ରକଳ୍ପ କର୍ତ୍ତୃପକ୍ଷ ଏ ବିଷୟରେ ଜାଣି ନଥିବା କହିଥିଲେ।
