କାନପୁର,୨୦ ।୭: ଉତ୍ତର ପ୍ରଦେଶର କାନପୁରରେ ବିଗ ଡାଟା ସପ୍ଟୱେୟାର, ଆୟକର ବିଭାଗ ଓ ଜିଏସ୍ଟି ରେଜିଷ୍ଟ୍ରେଶନର ଯାଞ୍ଚରୁ କାନପୁର ରାସ୍ତା କଡରେ ଠେଲାରେ ପାନ, ଚାଟ, ସିଙ୍ଗଡା ବିକ୍ରି କରୁଥିବା ୨୫୬ ଜଣ ଲୋକ କୋଟିପତି ବୋଲି ଜଣାପଡିଛି । ଏହାସହ କେତେଜଣ କବାଡି ବାଲାଙ୍କ ନିକଟରେ ୩-୩ଟି କାର ସହ କୋଟି କୋଟି ଟଙ୍କାର ସମ୍ପତ୍ତି ରହିଥିବା ଜଣାପଡିଛି । ଉତ୍ତର ପ୍ରଦେଶ କାନପୁରରେ ଆୟକର ବିଭାଗର ଯାଞ୍ଚ ସମୟରେ ଏମିତି ଚମକାଇବା ଭଲି ତଥ୍ୟ ସାମ୍ନାକୁ ଆସିଛି । କେବଳ ସେତିକି ନୁହେଁ ଛୋଟ ଛୋଟ ବ୍ୟବସାୟୀ ଓ ଔଷଧ ବ୍ୟବସାୟୀ କୋଟିପତି ବୋଲି ଜଣାପଡିବା ସହ ଫଳ ଦୋକାନ କରିଥିବା ଅଧିକାଂଶ ବ୍ୟବସାୟୀଙ୍କର ଏକର ଏକର ସମ୍ପତ୍ତି ଥିବା ଜଣାପଡିଛି । ହେଲେ ଏମାନେ କେହି ଆୟକର ଦେଉ ନାହାନ୍ତି । ତେବେ ଆୟକର ବିଭାଗକୁ ଗରିବ ବୋଲି ଦେଖାଉଥିବା ଏହି ବ୍ୟକ୍ତିମାନଙ୍କ ଉପରେ ଗୁଇନ୍ଦା ନଜର ରଖାଯାଇଥିଲା । ଗଳି କନ୍ଦିରେ ଭଲ ବ୍ୟବସାୟ କରୁଥିବା ଲୋକଙ୍କ ଉପରେ ନଜର ରଖିବା ପରେ ଏହା ସାମ୍ନାକୁ ଆସିଛି । ଆଉ ଏବେ ଯେଉଁ ତଥ୍ୟ ସାମ୍ନାକୁ ଆସିଛି ତାହା ସମସ୍ତଙ୍କ ହୋସ୍ ଉଡାଇ ଦେଇଛି । ଗଣମାଧ୍ୟମ ସୂତ୍ରରୁ ଜଣାପଡିଛି କି କାନପୁରର ଅଧିକାଂଶ ବ୍ୟବସାୟୀ ଜିଏସ୍ଟି ରେଜିଷ୍ଟ୍ରେଶନ ବାହାରେ ଟଙ୍କାଟିଏ ବି ଦେଇ ନାହାନ୍ତି । ହେଲେ ୪ ବର୍ଷ ମଧ୍ୟରେ ୩୭୫ କୋଟି ଟଙ୍କାର ସମ୍ପତ୍ତି କ୍ରୟ କରିଛନ୍ତି । ପାନ ଦୋକାନ କରିଥିବା କେତେଜଣ ବ୍ୟବସାୟୀ କରୋନା ସମୟରେ ପାଖାପାଖି ୫ କୋଟି ଟଙ୍କାର ସମ୍ପତ୍ତି କ୍ରୟ କରିଥିବା ଜଣାପଡିଛି । ସେହିପରି ୨ ଜଣ କବାଡି ବାଲା ୨ ବର୍ଷରେ ୧୦ କୋଟିରୁ ଅଧିକ ଟଙ୍କାର ସମ୍ପତ୍ତି କିଣିଛନ୍ତି ।
