ପାଟନା,୧୪ ।୯: ବିହାର ବିଧାନସଭା ନିର୍ବାଚନକୁ ନେଇ ରାଜନୀତି ହେଲାଣି ସରଗରମ । ଏଥର ଭାରତୀୟ ଜନତା ପାର୍ଟି(ଭାଜପା) ବାଜି ମାରିବାକୁ ଲକ୍ଷ୍ୟ ରଖିଥିବା ବେଳେ କଂଗ୍ରେସ ମଧ୍ୟ ସବୁ ପ୍ରକାର ପ୍ରସ୍ତୁତିରେ ରହିଛି । ଅନ୍ୟପଟେ ବଲିଉଡ୍ ଅଭିନେତ୍ରୀ କଙ୍ଗନା ରାନାୱତଙ୍କ ସହ ମହାରାଷ୍ଟ୍ର ସରକାରଙ୍କ ତୁତୁମେମେ ଭାଜପାକୁ ବେଶ୍ ସୁହାଇଛି । ଭାଜପା ଏହି ମାମଲାରେ ମହାରାଷ୍ଟ୍ର ସରକାରଙ୍କୁ ବିରୋଧ କରୁଥିବା ବେଳେ ଏବେ ବିହାର ରାଜନୀତି ସହ କଙ୍ଗନାଙ୍କୁ ଯୋଡି ଦିଆଯାଇଛି । ଭାଜପା କଙ୍ଗନାଙ୍କୁ ସମର୍ଥନ କରୁଥିବାରୁ ଆଲୋଚନା ହେଉଥିଲା କି ଏଥର ବିହାର ବିଧାନସଭା ନିର୍ବାଚନରେ କଙ୍ଗନା ହେବେ ଭାଜପାର ଷ୍ଟାର ପ୍ରଚାରକ । ଏହି ପ୍ରଶ୍ନର ଉତ୍ତର ଦେବାକୁ ଯାଇ ଏଥର ବିହାର ନିର୍ବାଚନ ଦାୟିତ୍ୱରେ ଥିବା ମହାରାଷ୍ଟ୍ରର ପୂର୍ବତନ ମୁଖ୍ୟମନ୍ତ୍ରୀ ତଥା ଭାଜପା ନେତା ଦେବେନ୍ଦ୍ର ଫଡନବିଶ କହିଛନ୍ତି ଭାଜପାର ଷ୍ଟାର ପ୍ରଚାରକ ଆବଶ୍ୟକ ନାହିଁ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଥାଉ ଥାଉ ଆଉ କାହାରି ଆବଶ୍ୟକତା ନାହିଁ ବୋଲି ଫଡନବିଶ କହିଛନ୍ତି ।
