ନୂଆଦିଲ୍ଲୀ,୧୪।୫: ଚଳିତ ନିର୍ବାଚନରେ ପ୍ରାର୍ଥୀ ସାଜିଥିବା ବଲିଉଡ୍ ଅଭିନେତାଙ୍କ ବିରୋଧରେ ଚାଲିଛି ୮ ମାମଲା। ତାଙ୍କ ପାଖରେ ଏକାଧିକ ଫ୍ଲାଟ, ମୁମ୍ବାଇରେ ଘର ଏବଂ ମନାଲିରେ ବଡ଼ ବଙ୍ଗଳା ରହିଛି। କୋଟି କୋଟି ଟଙ୍କାର ଅଚଳାଚଳ ସମ୍ପତ୍ତିର ମାଲିକାଣୀ ସେ। ହେଲେ ତାଙ୍କ ଉପରେ ୧୭ କୋଟିର ଋଣ ରହିଛି। କେବଳ ସେତିକି ନୁହେଁ ହଜାର ହଜାର ନିବେଶ ସାଙ୍ଗକୁ ଅନେକେ ଏଲ୍ଆଇସି ପଲିସି ମଧ୍ୟ ରହିଛି। ମଙ୍ଗଳବାର ମଣ୍ଡି ଆସନରୁ ଲୋକ ସଭା ନିର୍ବାଚନ ଲାଗି ନାମାଙ୍କନ ଦାଖଲ କରିବା ବେଳେ ସେ ନିଜର ସମ୍ପତ୍ତି ନେଇ ସବିଶେଷ ତଥ୍ୟ ଦେଇଛନ୍ତି।
କହିରଖୁଛୁ, କଙ୍ଗନା ଭାଜପା ଟିକେଟ୍ରେ ନିର୍ବାଚନ ଲଢ଼ୁଛନ୍ତି। ସେ ମଣ୍ଡି ଲୋକ ସଭା ଆସନରୁ ନିର୍ବାଚନୀ ମଇଦାନରେ ଓହ୍ଲାଇଛନ୍ତି। ସେ ମଣ୍ଡି ଉପଜିଲାପାଳଙ୍କ କାର୍ଯ୍ୟାଳୟରେ ପହଞ୍ଚି ନାମାଙ୍କନ ଦାଖଲ କରିଥିଲେ। ଏହି ସମୟରେ ତାଙ୍କ ସହ ବିଧାନସଭାରେ ନେତା ଥିବା ଜୟରାମ ଠାକୁର ଉପସ୍ଥିତ ରହିଥିଲେ। ଏହି ଆସନରେ ତାଙ୍କ ମୁକାବିଲା କଂଗ୍ରେସର ବିକ୍ରମାଦିତ୍ୟ ସିଂହଙ୍କ ସହ ହେଉଛି।
କଙ୍ଗନା ନିଜର ହଲଫନାମାରେ ଦର୍ଶାଇଛନ୍ତି ଯେ, ତାଙ୍କ ପାଖରେ ୨ ଲକ୍ଷ ନଗଦ ରହିଛି। ଏହାଛଡ଼ା ୮ ବ୍ୟାଙ୍କରେ ଆକାଉଣ୍ଟ ରହିଛି। ସେଥିରୁ ଗୋଟିଏରେ କୋଟିଏରୁ ଅଧିକ ଟଙ୍କା ଅଛି। ସେ ମଣିକର୍ନିକା ଫିଲ୍ସରେ ୯୯୯୯ ଶେୟାର ରଖିଛନ୍ତି, ଏହାଛଡ଼ା ମଣିକର୍ନିକା ସ୍ପେସ୍ କମ୍ପାନୀରେ କୋଟି କୋଟି ଟଙ୍କାର ନିବେଶ ରହିଛି। ୫୦ ଏଲ୍ଆଇସି ପଲିସି କରିଛନ୍ତି ସେ। ଏହାଛଡ଼ା ସେ ଅନେକ ଲୋକଙ୍କୁ ଋଣ ଦେଇଛନ୍ତି। ତାଙ୍କ ପାଖରେ ୩ ଗାଡ଼ି(୩.୯୧ କୋଟି, ୯୮ ଲକ୍ଷ, ୫୮ ଲକ୍ଷ)ର ରହିଛି। ଭେସ୍ପା ସ୍କୁଟର ମଧ୍ୟ ରହିଛି। ଚଣ୍ଡିଗଡ଼ରେ ୪ ଫ୍ଲାଟ, ମୁମ୍ବାଇରେ ଘର(୨୧ କୋଟି)ର, ଫ୍ଲାଟ(୧୬ କୋଟି) ମନାଲିରେ ବଙ୍ଗଳା(୧୫ କୋଟି)ର ରହିଛି। କଙ୍ଗନାଙ୍କ ପାଖରେ ୬.୭୦ କିଲୋଗ୍ରାମ ସୁନା ରହିଛି। ଏହାଛଡ଼ା ୬୦ କିଲୋ ରୂପା, ୧୪ କ୍ୟାରଟ୍ର ହୀରା ରହିଛି। ମୋଟ ସମ୍ପତ୍ତି ଦେଖିଲେ କଙ୍ଗନା ୯୧.୬୬ କୋଟି ଟଙ୍କା ସମ୍ପତ୍ତିର ମାଲିକାଣୀ।
