ଅକଲାଣ୍ଡ,୨।୭: ଭାରତ ବିପକ୍ଷରେ ଆଇସିସି ବିଶ୍ୱ ଟେଷ୍ଟ ଚାମ୍ପିୟନଶିପ ଫାଇନାଲରେ ଜିତିବା ପରେ ନ୍ୟୁଜିଲାଣ୍ଡ ଖେଳାଳିଙ୍କ ଅନେକ ଫଟୋ ଭାଇରାଲ ହେବାରେ ଲାଗିଛି। ବିଜୟ ଉତ୍ସବ ପାଳନ କରୁଥିବା ଏହି ଫଟୋଗୁଡ଼ିକ ମଧ୍ୟରୁ ଗୋଟିଏ ଫଟୋ ଏପରି ଥିଲା ଯାହା ଫଳାଫଳ ବାହାରେ ଥିଲା। ନ୍ୟୁଜିଲାଣ୍ଡର ଅଧିନାୟକ କେନ ୱିଲିୟମ୍ସନ ଆଇସିସି ବିଶ୍ୱ ଟେଷ୍ଟ ଚାମ୍ପିଅନସିପ ଟାଇଟଲ ଜିତିବା ପରେ ବିରାଟ କୋହଲିଙ୍କ କାନ୍ଧରେ ମୁଣ୍ଡ ରଖିବାର ଏହି ଫଟୋ ଥିଲା। ଏହା କେବଳ ଆଲିଙ୍ଗନର ଫଟୋ ନ ଥିଲା ବରଂ ୱିଲିୟମସନ ବିରାଟଙ୍କ କାନ୍ଧରେ ଏପରି ମୁଣ୍ଡ ରଖିଥିଲେ ସତେ ଯେପରି ସବୁ ସରିଯାଇଛି ଏବଂ ସାଙ୍ଗକୁ ବିଶ୍ରାମ କରିବାର ସମୟ ଆସିଛି। କିୱି ଦଳ ୨୧ ବର୍ଷ ପରେ ଏକ ଆଇସିସି ଟୁର୍ନାମେଣ୍ଟ ଜିତିଥିଲା। ଅନ୍ୟପକ୍ଷରେ ଭାରତ ଦଳ ଫାଇନାଲରେ ଜିତିବାରେ ବିଫଳ ହୋଇଛି।
ଏକ ସପ୍ତାହ ପରେ ସାଉଥମ୍ପଟନରେ ଫାଇନାଲ ଜିତିବା ପରେ ସେ ବିରାଟ କୋହଲିଙ୍କ କାନ୍ଧରେ କାହିଁକି ମୁଣ୍ଡ ରଖିଥିଲେ ବୋଲି ୱିଲିୟମସନ ପ୍ରକାଶ କରିଛନ୍ତି। ସେ କହିଛନ୍ତି, ଏହା ବହୁତ ଭଲ ମୁହୂର୍ତ୍ତ ଥିଲା। ସେମାନେ ପ୍ରାୟତଃ ସମସ୍ତ ଫର୍ମାଟରେ ଆମର ଖେଳରେ ବେଞ୍ଚମାର୍କ ସେଟ କରନ୍ତି। ଆମେ ଜାଣିଥିଲୁ ଯେତେବେଳେ ତୁମେ ଭାରତ ବିପକ୍ଷରେ ଖେଳିବ, ତୁମେ ଯେଉଁଠାରେ ଥାଅ, ଏହା ଏକ କଷ୍ଟକର ଆହ୍ବାନ ହେବ। ଯେତେବେଳେ ତାଙ୍କୁ ପଚରାଗଲା ସେ କାହିଁକି ରସ ଟେଲରଙ୍କ ସହ ଉତ୍ସବ ପାଳନ କରିବା ପରିବର୍ତ୍ତେ ବିରାଟ କୋହଲିଙ୍କ କାନ୍ଧରେ ମୁଣ୍ଡ ରଖିଛନ୍ତି। ଏହି ପ୍ରଶ୍ନର ଉତ୍ତରରେ ୱିଲିୟମସନ କହିଛନ୍ତି, ବହୁ ବର୍ଷ ଧରି ବିରାଟଙ୍କ ସହ ତାଙ୍କ ବନ୍ଧୁତା ରହିଛି ଏବଂ ଏହା ଭଲ କ୍ଷଣ ଥିଲା। ସେ ଆହୁରି ମଧ୍ୟ କହିଛନ୍ତି, ଏହା ପ୍ରକୃତରେ ଭଲ ମୁହୂର୍ତ୍ତ ଥିଲା, ଆମର ବନ୍ଧୁତା ଏବଂ ସମ୍ପର୍କ କ୍ରିକେଟଠାରୁ ଗଭୀର, ଏହା ଆମେ ଦୁହେଁ ପରସ୍ପରକୁ ଭଲ ଭାବରେ ଜାଣୁ ବୋଲି ସେ କହିଛନ୍ତି।
