ଲାଞ୍ଜିଗଡ,୧୨।୩(ଡି.ଏନ.ଏ.): ଦୀର୍ଘ ୨୦ବର୍ଷ ପର୍ଯ୍ୟନ୍ତ ପୁର୍ବତନ ମନ୍ତ୍ରୀ ବଳଭଦ୍ର ମାଝୀଙ୍କ କବଜାରେ ରହିଥିଲା ଲାଞ୍ଜିଗଡ ବ୍ଲକ ଅଧ୍ୟକ୍ଷ ପଦବୀ । ହେଲେ ଶନିବାର ବ୍ଲକ ଅଧ୍ୟକ୍ଷା ନିର୍ବାଚନରେ ଏଥିରେ ହୋଇଛି ପରିବର୍ତ୍ତନ। ସକାଳ ୯ଟାରେ ଅଜ୍ଞାତବାସରେ ଥିବା ୨୬ ପଞ୍ଚାୟତରେ ନିର୍ବାଚିତ ହୋଇଥିବା ପ୍ରାର୍ଥୀ-ପ୍ରାର୍ଥୀନୀ ମାନଙ୍କୁ ଭୋଟକେନ୍ଦ୍ରକୁ ଅଣାଯାଇଥିଲା । ଦିନ ୧୨ଟାରେ ନାମାଙ୍କନ ପତ୍ର ଦାଖଲ ହୋଇଥିଲା। ଏହି ପଦବୀ ଲାଗି କୁମଖାଲ ସମିତିସଭ୍ୟା ପ୍ରାର୍ଥୀନୀ ତଥା ପୁର୍ବତନ ଜିଲାପରିଷଦ ଅଧ୍ୟକ୍ଷା ଶ୍ରୀମତି ମାଝୀ ଓ ପୋଖରୀବନ୍ଧ ସମିତିସଭ୍ୟା ପ୍ରାର୍ଥୀନୀ କମଳା ପାତ୍ର, ୨ଜଣ ନାମଙ୍କନପତ୍ର ଦାଖଲ କରିଥିଲେ। ଦିନ ୧ଟାରେ ଭୋଟ ଗ୍ରହଣ କରାଯିବା ପରେ ଭୋଟ ଗଣିତି ହୋଇଥିଲା । ଏଥିରେ କମଳା ପାତ୍ର ୧୬ଖଣ୍ଡ ଭୋଟ ପାଇଥିବା ବେଳେ ଶ୍ରୀମତି ମାଝୀ ୧୦ଖଣ୍ଡ ଭୋଟ ପାଇଥିଲେ । ୬ଖଣ୍ଡ ଭୋଟରେ କମଳା ପାତ୍ର ବିଜୟ ଲାଭ କରିଥିଲେ । କମଳା ପାତ୍ରଙ୍କ ବିଜୟ ପରେ ସମର୍ଥକଙ୍କ ମଧ୍ୟରେ ଉତ୍ସାହ ଦେଖାଦେଇଥିଲା । କମଳା ପାତ୍ରଙ୍କ ନିକଟରେ ଶୁଭେଛୁଙ୍କ ସୁଅ ଛୁଟିଥିଲା ।
କହିରଖୁଛୁ, ୨୦ବର୍ଷ ହେଲା ଏହି ପଦବୀ ପୁର୍ବତନ ବିଜେଡିର ମନ୍ତ୍ରୀ ବଳଭଦ୍ରଙ୍କ ପରିବାର ଲୋକଙ୍କ ଅକ୍ତିଆରରେ ରହିଥିଲା। ତାଙ୍କ ସ୍ତ୍ରୀ ଦୁଇଥର ବ୍ଲକ ଅଧ୍ୟକ୍ଷା ପଦବୀରେ ରହିଥିବା ବେଳେ ତାଙ୍କ ଝିଆରୀ ସସ୍ମିତା ମାଝୀ ଓ ପୁତୁରା ଫକୀର ମୋହନ ମାଝୀ ଗୋଟିଏ ଥର ଲେଖାଏ ରହିଥିଲେ । ହେଲେ ଏହି ବ୍ଲକରେ ବିକାଶ ହୋଇପାରି ନାହିଁ। ଆଜି ମଧ୍ୟ ଦୁର୍ଗମ ଅଞ୍ଚଳର ଅନେକ ଗାଁରେ ଶିକ୍ଷା,ସ୍ବାସ୍ଥ୍ୟ,ପାନୀୟଜଳ ଓ ଗମନାଗମନ ଭଳି ମୈାଳିକ ସୁବିଧା ପହଞ୍ଚି ପାରିଲାନି। ଶେଷରେ ବଳଭଦ୍ରଙ୍କ ୨୦ବର୍ଷ ଶାସନର ଅବସାନ ଘଟିଛି । ଏହି ନିର୍ବାଚନ ସମୟରେ ଥୁଆମୁଳ ରାମପୁର ବିଡିଓ ଶୁଭକାନ୍ତ ନାଏକ ନିର୍ବାଚନୀ ଅଧିକାରୀ ଭାବେ କାର୍ଯ୍ୟ ତୁଲାଇ ଥିବା ବେଳେ ଶାନ୍ତି ଶୃଖଳା ପାଇଁ ଲାଞ୍ଜିଗଡ ଥାନାଧିକାରୀ ସତ୍ୟାନନ୍ଦ ପାତ୍ରଙ୍କ ନେତୃତ୍ୱରେ ଆଇଆରବି ପୋଲିସ ମୁତୟନ ହୋଇଥିଲେ।
