କଲ୍ୟାଣସିଂହପୁର, ୧୧/୯ (ଦୀପକ କୁମାର ପରିଡ଼ା): ନିୟମଗିରି ସୁରକ୍ଷା ସମିତିର ଆବାହକ ତଥା ସଭାପତି ଲଦ ସିକକାଙ୍କୁ ପୋଲିସ ଗିରଫ କରିବା ଘଟଣାକୁ ନେଇ କଲ୍ୟାଣସିଂହପୁର ଅଞ୍ଚଳରେ ତୀବ୍ର ଉତ୍ତେଜନା ପ୍ରକାଶ ପାଇଛି। ଲଦ ସିକକାଙ୍କୁ ତୁରନ୍ତ ନିଃସର୍ତ୍ତ ମୁକ୍ତ କରିବା ଦାବିରେ ଶତାଧିକ ଡଙ୍ଗରିଆ ଓ ସ୍ଥାନୀୟ ବାସିନ୍ଦା କଲ୍ୟାଣସିଂହପୁର ଥାନା ଘେରାଉ କରିଛନ୍ତି।
ଆନ୍ଦୋଳନକାରୀମାନେ ପାରମ୍ପରିକ ଅସ୍ତ୍ରଶସ୍ତ୍ର ଧରି ଥାନା ସମ୍ମୁଖରେ ପ୍ରତିବାଦ କରିଥିଲେ। ପରିସ୍ଥିତିକୁ ଦୃଷ୍ଟିରେ ରଖି ଥାନା ପରିସରରେ ବ୍ୟାପକ ପୋଲିସ ଫୋର୍ସ ମୁତୟନ କରାଯାଇଥିଲା। ଘଟଣାସ୍ଥଳରେ ରାୟଗଡ଼ା ଏସ୍ଡିପିଓ ଗୌରହରି ସାହୁ ପହଞ୍ଚି ଉତ୍ତ୍ୟକ୍ତ ଲୋକଙ୍କୁ ବୁଝାସୁଝା କରିଥିଲେ ମଧ୍ୟ ଅଞ୍ଚଳରେ ଉତ୍ତେଜନାପୂର୍ଣ୍ଣ ପରିସ୍ଥିତି ଜାରି ରହିଥିବା ଜଣାପଡ଼ିଛି।
ସୂଚନା ଅନୁଯାୟୀ, ଲଦ ସିକକା ଗତକାଲି ଦୁଇଟି ପୁରୁଣା ମାମଲା—ସି.ଟି. କେସ୍ ନମ୍ବର ୩୪୯/୨୦୧୭ ଏବଂ ୧୬୪/୨୦୧୯—ରେ କଳାହାଣ୍ଡି ଜିଲାର ଲାଞ୍ଜିଗଡ଼ସ୍ଥିତ ଜେଏମ୍ଏଫ୍ସି କୋର୍ଟରେ ହାଜର ହୋଇ ଜାମିନ ପାଇଥିଲେ। ଅପରାହ୍ନ ପ୍ରାୟ ସାଢ଼େ ୪ଟା ସମୟରେ ସେ ନିଜ ଆଇନଜୀବୀ ଓ ସହଯୋଗୀଙ୍କ ସହ ଫେରୁଥିବାବେଳେ ପୋଲିସ ଟିମ୍ ତାଙ୍କ ଗାଡ଼ିକୁ ଅଟକାଇ ତାଙ୍କୁ ନେଇଥିବା ଅଭିଯୋଗ ହୋଇଛି।
ଅଭିଯୋଗ ଅନୁଯାୟୀ, କଲ୍ୟାଣସିଂହପୁର ଆଇଆଇସି ଅଜିତ କୁମାର ପରିଡ଼ା, କେସିଙ୍ଗା ଏସ୍ଡିପିଓ ସନ୍ଦୀପ କୁମାର ମାଝୀ ଏବଂ ବିଶ୍ୱନାଥପୁର ଆଇଆଇସି କଳ୍ପନା ବେହେରାଙ୍କ ନେତୃତ୍ୱରେ ଆସିଥିବା ପୋଲିସ ଟିମ୍ ତାଙ୍କୁ ଅଟକାଇ ନେଇଥିଲେ।
ଅପରପକ୍ଷରେ, ରାୟଗଡ଼ା ଜିଲାର ବିଭିନ୍ନ ଥାନାରେ ଲଦ ସିକକାଙ୍କ ନାମରେ ପ୍ରାୟ ୧୧ଟି ମାମଲା ବିଚାରାଧୀନ ରହିଥିବା ସହ ତାଙ୍କ ବିରୋଧରେ ପୂର୍ବରୁ ୱାରେଣ୍ଟ ଜାରି ହୋଇଥିବାରୁ ପୁଲିସ ଏହି କାର୍ଯ୍ୟାନୁଷ୍ଠାନ ଗ୍ରହଣ କରିଥିବା ଜଣାପଡ଼ିଛି। ଏହି ଘଟଣାକୁ ନେଇ ନିୟମଗିରି ସୁରକ୍ଷା ସମିତି ପକ୍ଷରୁ କଲ୍ୟାଣସିଂହପୁର ଆଇଆଇସିଙ୍କ ଜରିଆରେ ରାୟଗଡ଼ା ଆରକ୍ଷୀ ଅଧୀକ୍ଷକଙ୍କୁ ଏକ ଜରୁରୀ ସ୍ମାରକପତ୍ର ପ୍ରଦାନ କରାଯାଇଛି।
ସମିତି ପକ୍ଷରୁ ଅଭିଯୋଗ କରାଯାଇଛି ଯେ, ସିକକାଙ୍କୁ ନେଇଯିବା ସମୟରେ ତାଙ୍କ ଆଇନଜୀବୀ ନରେନ୍ଦ୍ର ମହାନ୍ତିଙ୍କୁ କୌଣସି ଲିଖିତ ‘ଆରେଷ୍ଟ ମେମୋ’ ପ୍ରଦାନ କରାଯାଇ ନ ଥିଲା କିମ୍ବା ଗିରଫଦାରୀର ଆଇନଗତ ଆଧାର ସ୍ପଷ୍ଟ କରାଯାଇ ନ ଥିଲା। ସେହିପରି, ଗିରଫ ପରେ ଲଦ ସିକକାଙ୍କୁ କେଉଁ ସ୍ଥାନରେ ରଖାଯାଇଛି, ସେ ସମ୍ପର୍କରେ ଥାନା କିମ୍ବା ଜିଲା ଏସ୍ପିଙ୍କ କାର୍ଯ୍ୟାଳୟ ପକ୍ଷରୁ କୌଣସି ଆନୁଷ୍ଠାନିକ ସୂଚନା ମିଳି ନ ଥିବା ସମିତି ପକ୍ଷରୁ କୁହାଯାଇଛି।
ନିୟମଗିରିର ଜଳ, ଜଙ୍ଗଲ, ଜମି ଓ ଜୀବିକା ସୁରକ୍ଷା ପାଇଁ ଚାଲିଥିବା ଗଣତାନ୍ତ୍ରିକ ଆନ୍ଦୋଳନକୁ ଦମନ କରିବା ଉଦ୍ଦେଶ୍ୟରେ ଏଭଳି ପଦକ୍ଷେପ ନିଆଯାଇଥିବା ନିୟମଗିରି ସୁରକ୍ଷା ସମିତି ଅଭିଯୋଗ କରିଛି। ଲଦ ସିକକାଙ୍କୁ ତୁରନ୍ତ ମୁକ୍ତ କରିବା ସହ ସମଗ୍ର ଘଟଣାର ନିରପେକ୍ଷ ତଦନ୍ତ କରିବାକୁ ସମିତି ଦାବି କରିଛି। ଯଦି ତାଙ୍କୁ ଶୀଘ୍ର ମୁକ୍ତ କରା ନ ଯାଏ, ତେବେ ଆଗାମୀ ଦିନରେ ଆନ୍ଦୋଳନକୁ ଜିଲାବ୍ୟାପୀ ତୀବ୍ର କରାଯିବ ବୋଲି ସମିତି ଚେତାବନୀ ଦେଇଛି। ତେବେ ଏହି ଘଟଣା ସମ୍ପର୍କରେ ପୋଲିସ ପକ୍ଷରୁ ଏପର୍ଯ୍ୟନ୍ତ କୌଣସି ଆନୁଷ୍ଠାନିକ ପ୍ରତିକ୍ରିୟା ମିଳିପାରିନାହିଁ।