ଭବାନୀପାଟଣା, ୨୨।୯(ଉତ୍ତମ କୁମାର ଦାଶ): କଳାହାଣ୍ଡି ଜିଲାର ଜଣେ ଅଗ୍ରଣୀ ଶିକ୍ଷାବିତ୍, ଆଦର୍ଶ ମାର୍ଗଦର୍ଶକ ତଥା ବିଶିଷ୍ଟ ରସାୟନ ବିଜ୍ଞାନ ପ୍ରଫେସର ଡକ୍ଟର ଗୋପବନ୍ଧୁ ବେହେରାଙ୍କର ୮୭ ବର୍ଷ ବୟସରେ ପରଲୋକ ହୋଇଯାଇଛି। ମଙ୍ଗଳବାର ପ୍ରତ୍ୟୁଷରେ ଭୁବନେଶ୍ୱର ସ୍ଥିତ ଏକ ଘରୋଇ ଡାକ୍ତରଖାନାରେ ଚିକିତ୍ସାଧୀନ ଅବସ୍ଥାରେ ସେ ଶେଷ ନିଶ୍ୱାସ ତ୍ୟାଗ କରିଛନ୍ତି। ତାଙ୍କର ବିୟୋଗରେ ସମଗ୍ର କଳାହାଣ୍ଡି ଜିଲା ତଥା ରାଜ୍ୟ ଶିକ୍ଷା ଜଗତରେ ଶୋକର ଛାୟା ଖେଳିଯାଇଛି।
ସ୍ୱର୍ଗତ ବେହେରା ୧୯୩୩ ମସିହା ଫେବ୍ରୁଆରୀ ୫ ତାରିଖରେ ଜୁନାଗଡ଼ ବ୍ଲକର ମହିଚଳା ଗ୍ରାମରେ ଜନ୍ମଗ୍ରହଣ କରିଥିଲେ। ସେ ନିଜ ଜୀବନସାରା ଶିକ୍ଷାର ପ୍ରସାର ଓ ବିକାଶ ପାଇଁ ସମର୍ପିତ ରହିଥିଲେ। ବିଶେଷ କରି କଳାହାଣ୍ଡିର ଶିକ୍ଷାଗତ ଉନ୍ନତି, କଳାହାଣ୍ଡି ବିଶ୍ୱବିଦ୍ୟାଳୟର ଗଠନ ଏବଂ ଏହାର ନୂତନ କ୍ୟାମ୍ପସ୍ ପ୍ରତିଷ୍ଠା ଦିଗରେ ତାଙ୍କର ଅବଦାନ ଅତୁଳନୀୟ ଥିଲା। ୧୯୯୯ ମସିହାରେ ଭବାନୀପାଟଣାରେ ‘କଳାହାଣ୍ଡି ଶିକ୍ଷା ବିକାଶ ପରିଷଦ’ ପ୍ରତିଷ୍ଠା କରି ସେ ଅଞ୍ଚଳରେ ଏକ ନୂତନ ଶିକ୍ଷା ବିପ୍ଲବର ସୂତ୍ରପାତ କରିଥିଲେ।
ତାଙ୍କର ଏହି ଅପୂରଣୀୟ କ୍ଷତିରେ ବିଭିନ୍ନ ମହଲରୁ ଗଭୀର ଶୋକବ୍ୟକ୍ତ କରାଯାଇଛି। ଜୁନାଗଡ଼ ବିଧାୟକ ତଥା ପୂର୍ବତନ ମନ୍ତ୍ରୀ କ୍ୟାପଟେନ ଦିବ୍ୟ ଶଙ୍କର ମିଶ୍ର ନିଜ ଫେସବୁକ୍ ପୋଷ୍ଟ ମାଧ୍ୟମରେ ପ୍ରଫେସର ବେହେରାଙ୍କ ବିୟୋଗରେ ଗଭୀର ଦୁଃଖ ପ୍ରକାଶ କରିବା ସହ ଅମର ଆତ୍ମାର ସଦ୍ଗତି କାମନା କରି ଶୋକସନ୍ତପ୍ତ ପରିବାରବର୍ଗଙ୍କୁ ସମବେଦନା ଜଣାଇଛନ୍ତି।