ଚଳଚ୍ଚିତ୍ର ଇଣ୍ଡଷ୍ଟ୍ରିର କିଛି ତାରକା କେବଳ ଅଭିନୟ ମାଧ୍ୟମରେ ଲକ୍ଷ ଲକ୍ଷ ଦର୍ଶକଙ୍କୁ ପ୍ରଭାବିତ କରନ୍ତି ନାହିଁ, ବାସ୍ତବ ଜୀବନରେ କିଛି ଅନୁକମ୍ପାମୂଳକ କାର୍ଯ୍ୟ କରି ମଧ୍ୟ ଲକ୍ଷ ଲକ୍ଷ ହୃଦୟକୁ ଜିତିଥାନ୍ତି। ଏହିପରି ତାରକା ତାଲିକାରେ ସଲମାନ ଖାନ, ଶାହାରୁଖ ଖାନ, ସୋନୁ ସୁଦଙ୍କ ପରି ଅନେକ ସେଲିବ୍ରିଟି ଅଛନ୍ତି। ଏବେ ଏହି ସାଲିକାରେ ସାମିଲ ହୋଇଛନ୍ତି, ସିଂଘମ ଅଭିନେତ୍ରୀ କାଜଲ ଅଗ୍ରୱାଲ। ଦକ୍ଷିଣ ଭାରତୀୟ ଚଳଚ୍ଚିତ୍ରରୁ ବଲିଉଡ ଡେଇଁଥିବା କାଜଲ ତାଙ୍କର ଜଣେ ପ୍ରଶଂସକଙ୍କୁ ସହାୟତାର ହାତ ବଢାଇଛନ୍ତି। ହାଇଦ୍ରାବାଦରୁ ଆସିଥିବା ଜଣେ ମହିଳା ପ୍ରଶଂସକଙ୍କ କଲେଜ ଫି’ ଦେଇଛନ୍ତି ସେ। ସୁମା ନାମକ ଜଣେ ଫାର୍ମାସି ଛାତ୍ରୀ କଲେଜ ଫି ଦେବାକୁ ତାଙ୍କ ପାଖରେ ଟଙ୍କା ନ ଥିଲା। ସେ ଟୁଇଟର ମାଧ୍ୟମରେ କାଜଲଙ୍କୁ ସାହାଯ୍ୟ ମାଗିଥିଲେ। ତାଙ୍କ ଆକାଉଣ୍ଟ ବିବରଣୀ ଶେୟାର କରି ସାହାଯ୍ୟ କରିବାକୁ ନିବେଦନ କରିଥିଲେ। କାଜଲ ବିଳମ୍ବ ନକରି ଛାତ୍ରୀଙ୍କ ଆକାଉଣ୍ଟକୁ ଟଙ୍କା ପଠାଇଥିଲେ।
ସୁମା ଏହି କାଜଲଙ୍କୁ ଟ୍ୟାଗ କରି ପୋଷ୍ଟରେ ଲେଖିଛନ୍ତି, ମୋର ଚାକିରି କିଛି ଦିନ ପୂର୍ବରୁ ଚାଲିଯାଇଛି, ଫଳରେ ମୁଁ ମୋର ପରବର୍ତ୍ତୀ ଅଧ୍ୟୟନ ଏମ୍ଫାର୍ମା ପାଇଁ ଟଙ୍କା ସଂଗ୍ରହ କରିପାରୁ ନାହିଁ, ଦୟାକରି ମୋର ଫି’ ଦେବାରେ ସାହାଯ୍ୟ କରନ୍ତୁ। କାଜଲଙ୍କ ପ୍ରତିନିଧୀ ସୁମାଙ୍କ ପୋଷ୍ଟକୁ ଦେଖି ସଙ୍ଗେ ସଙ୍ଗେ ଅଭିନେତ୍ରୀଙ୍କୁ ଜଣାଇଥିଲେ।ଏହା ପରେ କାଜଲ ତାଙ୍କ ଆକାଉଣ୍ଟକୁ ୧ ଲକ୍ଷ ଟଙ୍କା ଟ୍ରାନ୍ସଫର କରିଥିଲେ। ସୋସିଆଲ ମିଡିଆରେ କାଜଲଙ୍କ ଉଦାରତା ପୋଷ୍ଟ ଭାଇରାଲ ହେବାରେ ଲାଗିଛି।
