ଓ୍ବାଶିଂଟନ୍, ୨୬ା୯: ସୌରମଣ୍ଡଳର ବୃହତ୍ତମ ଗ୍ରହ ବୃହସ୍ପତି ପ୍ରାୟ ୬ ଦଶନ୍ଧି ପରେ ସୋମବାର ପୃଥିବୀର ସବୁଠୁ ନିକଟତର ହେବାକୁ ଯାଉଛି। ୧୯୬୩ ପରେ ଏହି ବିଶାଳକାୟ ଗ୍ରହକୁ ଜ୍ୟୋତିର୍ବିଜ୍ଞାନୀମାନେ ରାତିସାରା ପାଖରୁ ଦେଖିପାରିବେ ବୋଲି ଆମେରିକୀୟ ମହାକାଶ ସଂସ୍ଥା ନାସା ପକ୍ଷରୁ କୁହାଯାଇଛି। ଏହି ସମୟରେ ବୃହସ୍ପତି ସୂର୍ଯ୍ୟଙ୍କ ଠିକ୍ ବିପରୀତ ଦିଗରେ ରହିବ। ବୃହସ୍ପତି ଏଭଳି ଦିଗ ବଦଳାଇବା ସ୍ଥିତିକୁ ବୈଜ୍ଞାନିକ ଭାଷାରେ ‘ଅପୋଜିଶନ’ କୁହାଯାଏ। ଅପୋଜିଶନ ଯୋଗୁ ବୃହସ୍ପତି ପୃଥିବୀ ପୃଷ୍ଠରୁ ପ୍ରତୀୟମାନ ହେବ।
ସାଧାରଣ ବାଇନାକୁଲାରରେ ମଧ୍ୟ ଏହି ଦୃଶ୍ୟକୁ ଦେଖିହେବ। ବୃହସ୍ପତି ପାଇଁ ଅପୋଜିଶନ ଏକ ସାଧାରଣ ପ୍ରକ୍ରିୟା। ପ୍ରତି ୧୩ ମାସରେ ଏହି ଗ୍ରହ ସୂର୍ଯ୍ୟଙ୍କ ବିପରୀତ ଦିଗକୁ ଆସିଥାଏ। ଅପୋଜିଶନ ସ୍ଥିତିରେ ଥିବାବେଳେ ବୃହସ୍ପତି ଅନ୍ୟ ଦିନଗୁଡ଼ିକ ତୁଳନାରେ ଅଧିକ ବଡ଼ ଏବଂ ଉଜ୍ଜ୍ୱଳ ଦେଖାଯାଏ। ହେଲେ ୧୯୯୩ ମସିହା ପରଠାରୁ ପ୍ରଥମ ଥର ପାଇଁ ବୃହସ୍ପତି ପୃଥିବୀର ସବୁଠୁ ନିକଟତର ହେବାକୁ ଯାଉଛି। ପୃଥିବୀରୁ ଏହି ଗ୍ରହର ଦୂରତା ୬୦୦ ନିୟୁତ ମାଇଲ୍ ବା ପ୍ରାୟ ୯୬,୫୬,୦୬, ୪୦୦ କିଲୋମିଟର। ତେବେ ସୋମବାର ତାହା ପ୍ରାୟ ୩୬୭ ନିୟୁତ ମାଇଲ ବା ୫୯,୦୬,୨୯,୨୪୮ କିଲୋମିଟର ଦୂରତାକୁ ହ୍ରାସ ପାଇବ। ୧୯୬୩ରେ ମଧ୍ୟ ବୃହସ୍ପତି ପ୍ରାୟ ସମାନ ଦୂରତାରୁ ପ୍ରତୀୟମାନ ହୋଇଥିଲା। ଟେଲିସ୍କୋପ୍ରେ କୌଣସି ଉଚ୍ଚ ଏବଂ ଶୁଷ୍କ ସ୍ଥାନରୁ ଅନ୍ଧାରରେ ବୃହସ୍ପତିକୁ ଦେଖିହେବ। ଉଚ୍ଚକୋଟୀର ଟେଲିସ୍କୋପ୍ ଜରିଆରେ ବୃହସ୍ପତି ଚାରିପଟେ ବୁଲୁଥିବା ଉପଗ୍ରହ ମଧ୍ୟରୁ ୩ କିମ୍ବା ୪ଟିକୁ ମଧ୍ୟ ଦେଖାଯାଇପାରିବ ବୋଲି ନାସାରେ ଗବେଷକ ଆଦମ କୋବେଲସ୍କି କହିଛନ୍ତି। ବଡ ଟେଲିସ୍କୋପରେ ବୃହସ୍ପତିର ଗ୍ରେଟ୍ ରେଡ୍ ସ୍ପଟ୍ ଏବଂ ବ୍ୟାଣ୍ଡ୍କୁ ମଧ୍ୟ ଦେଖିହେବ।
ସୂର୍ଯ୍ୟ ଚାରିପଟେ ସମ୍ପୂର୍ଣ୍ଣ ପରିକ୍ରମା ପାଇଁ ୩୬୫ ଦିନ ସମୟ ନେଇଥାଏ। ବୃହସ୍ପତି ୪୩୩୩ ଦିନରେ ସୂର୍ଯ୍ୟଙ୍କ ଚାରିପଟେ ଥରେ ଘୂର୍ଣ୍ଣନ କରିଥାଏ। ବୃହସ୍ପତିର ଉପଗ୍ରହ ୟୁରୋପାରେ ବରଫ ସମୁଦ୍ର ରହିଥିବା ନାସା ବୈଜ୍ଞାନିକ ଦାବି କରୁଥିବାବେଳେ ସେଠାରେ ଜୀବନ ଧାରଣ କରିବା ଭଳି ପରିବେଶ ରହିଥିବା ସେମାନେ ଆଶା କରୁଛନ୍ତି। ଏ ଦିଗରେ ଅଧିକ ଗବେଷଣା ପାଇଁ ନାସା ୨୦୨୪ ଅକ୍ଟୋବରରେ ୟୁରୋପା କ୍ଲିପର ସ୍ପେସ୍କ୍ରାଫ୍ଟ ପଠାଇବାକୁ ଯୋଜନା କରିଛି।
