ନୂଆଦିଲ୍ଲୀ,୧୭।୧: କେନ୍ଦ୍ର ସରକାର ନ୍ୟାୟପାଳିକାକୁ ସମ୍ପୂର୍ଣ୍ଣ ନିୟନ୍ତ୍ରଣ କରିବା ଲାଗି ଚାହୁଁଛନ୍ତି। ସେଥିପାଇଁ ଯୋଜନାବଦ୍ଧ ଢଙ୍ଗରେ ବିବାଦ ସୃଷ୍ଟି କରାଯାଉଛି ବୋଲି ସୋମବାର କଂଗ୍ରେସ ଅଭିଯୋଗ କରିଛି। କଲେଜିୟମ ବ୍ୟବସ୍ଥାର ପୁନର୍ଗଠନ ଲାଗି କେନ୍ଦ୍ର ଆଇନ ମନ୍ତ୍ରୀ କିରେନ ରିଜିଜୁ ଦେଇଥିବା ପ୍ରସ୍ତାବ ନ୍ୟାୟପାଳିକା ଲାଗି ବିଷ ଔଷଧ ବୋଲି କଂଗ୍ରେସ କହିଛି। ବିଚାରପତି ଚୟନ ଲାଗି ଥିବା କଲେଜିୟମରେ କେନ୍ଦ୍ର ଓ ରାଜ୍ୟ ସରକାରଙ୍କ ପ୍ରତିନିଧିଙ୍କୁ ସାମିଲ କରିବା ଲାଗି ରିଜିଜୁ ସିଜେଆଇ ଡି.ଓ୍ବାଇ. ଚନ୍ଦ୍ରଚୂଡ଼ଙ୍କୁ ପତ୍ର ଲେଖିବା ପରେ କଂଗ୍ରେସ ସାଧାରଣ ସମ୍ପାଦକ ଜୟରାମ ରମେଶ ସୋମବାର ଏହାର ସମାଲୋଚନା କରିଛନ୍ତି।
ବ୍ୟବସ୍ଥାପିକା କାର୍ଯ୍ୟରେ ନ୍ୟାୟପାଳିକା ହସ୍ତକ୍ଷେପ କରୁଥିବା ପୂର୍ବରୁ ଉପରାଷ୍ଟ୍ରପତି ଅଭିଯୋଗ କରିଥିଲେ। ଆଇନମନ୍ତ୍ରୀ ଅନେକ ସମୟରେ ନ୍ୟାୟପାଳିକାକୁ ସମାଲୋଚନା କରୁଛନ୍ତି। ନ୍ୟାୟପାଳିକା ସହ ବିବାଦ ଲାଗି ଯୋଜନାବଦ୍ଧ ଭାବେ ଏଭଳି କରାଯାଉଛି, ଯେପରି ଏଥିରେ ହସ୍ତକ୍ଷେପ କରାଯାଇ ସମ୍ପୂର୍ଣ୍ଣ ନିୟନ୍ତ୍ରଣକୁ ନିଆଯାଇପାରିବ। କଲେଜିୟମରେ ସଂସ୍କାର ଆବଶ୍ୟକ। କିନ୍ତୁ ସରକାର ଯାହା ଚାହୁଁଛନ୍ତି, ତାହା ସମ୍ପୂର୍ଣ୍ଣ ବଶ୍ୟତା। ଏହା ନ୍ୟାୟପାଳିକା ଲାଗି ବିଷ ବଟିକା ସଦୃଶ ବୋଲି ଜୟରାମ ଟୁଇଟ୍ କରିଛନ୍ତି।
କେଶବାନନ୍ଦ ଭାରତୀ ରାୟକୁ ଉପରାଷ୍ଟ୍ରପତି ଜଗଦୀପ୍ ଧନକରଙ୍କ ସମାଲୋଚନା ନ୍ୟାୟପାଳିକା ଉପରେ ଅଦ୍ଭୁତ ଆକ୍ରମଣ ବୋଲି ପୂର୍ବରୁ କଂଗ୍ରେସ ନେତା କହିଥିଲେ। ୧୯୭୩ରେ ସୁପ୍ରିମକୋର୍ଟଙ୍କ କେଶବାନନ୍ଦ ଭାରତୀ ରାୟକୁ କେହି ସମାଲୋଚନା କରିଥିବା ୧୮ ବର୍ଷର ଏମ୍ପି କାର୍ଯ୍ୟକାଳ ମଧ୍ୟରେ ସେ କେବେ ଶୁଣି ନ ଥିବା ଜୟରାମ କହିଥିଲେ। ଏପରିକି ଭାଜପା ନେତା ତଥା ବିଶିଷ୍ଟ ଆଇନଜୀବୀ ଅରୁଣ ଜେଟ୍ଲି ମଧ୍ୟ ଉକ୍ତ ରାୟକୁ ଉଚ୍ଚ ପ୍ରଶଂସା କରିଥିଲେ। ଅଥଚ ବର୍ତ୍ତମାନର ରାଜ୍ୟ ସଭା ଅଧ୍ୟକ୍ଷ ଏହାକୁ ଭୁଲ୍ କହିବା ଆଶ୍ଚର୍ଯ୍ୟଜନକ ବୋଲି ଜୟରାମ ପୂର୍ବରୁ ଟୁଇଟ୍ କରିଥିଲେ।
